Ng'hūngū 3 - Bibilia Ilagano Lya Kale 2015

Yelemia kūlīla kūlw'ihanga lyakwe

¹ Ū nene naabītile mu būluhi būtaale kūlwa nang'ha go būpelanu bokwe.

² Wanipeegije ūnibītya mu giiti, ūmo lītīmo isana.

³ Nīyo akanitūlaga gwa gwa gwa, līīmi ji gūlīnitūla ū nkono gwakwe.

⁴ Ī nyama ya mīlī gwane nī likūnza washisedeekije; a maguha gane ūgabīnzagūla.

⁵ Wanizengeelile igoobe lyūnipīndīlīja ūnigītīīla makoye na būlūlū.

⁶ Wanīītile kūbiza wa kwikala mu giiti gītī banhū abo baacha kale.

⁷ Wanipīndīlīgije ndugu kose kose natizūdūla kūpeela; hūna ūnibohya minyololo midito.

⁸ Nūūlū nitane kūnū nakūlīlaga ū kūlomba kwane akakūhangījaga.

⁹ Ī nzīla yane wīchibile na mawe, ūbūliganya ū būbītīlo bone.

¹⁰ Ū kūlī nene wabizile gītī ndūba Īlīkūngīla, gītī shimba yibandīīlga.

¹¹ Wanihulumūlile ūnīnja ū mu nzīla ūūkanigunzagūla, ūnileka natī na wa kūniguna.

¹² Wabūdutile ū būta bokwe ūyūnilasa na masonga gakwe.

¹³ Masonga ga kwīngīīla mu ntana gwakwe gūnilasa ī ng'holò yane.

¹⁴ Ī haha ū kū banhū bane nalī līshikolo lya kwineenelegejiwa. Līīmi bbu bakūnilīngaga mu mīmbo.

¹⁵ Wanitindagīlile malūlū nookala, ūnibimbeeja ndūlū.

¹⁶ Wanigalagagije mu lūbuubu, a mino gane ūgabīnzagūlīla ha mashoololo ga mawe.

¹⁷ Ū būpanga wane botaajiwe ī mhola, ū wiza naawībile ūmo būlī.

¹⁸ Ī haha nakwiwīlaga gīkī, Ū wiza bone bojimīīlile, nī shisho naalisagīlagwa ū kūlī SEEBA shanigayile.

¹⁹ Nakūwizūkagwa ū būluhi wane nū kūtagaalīja kwane; pyī nū būlūlū ūbo bonikoyaga gītī ndūlū.

²⁰ Shose shenīshi nakūshiizūkagwa yachongomeela ī ng'holò yane.

Kwisagīlwa kwa ng'wa Yelemia

²¹ Gwike gūūyū mhayo nakagwizūkagwa, h'ī chene nalī na kwisagīlwa:

²² Tūtashilile pye kūlwa nguno ū būtogwa bo ng'wa SEEBA būtaale no, nguno ī shigongo shakwe shitī sha kūkalīka,

²³ būlī dilū būkeelaga shilī shipya; ū kūsanyiwa kwako kūlī kūtaale no.

²⁴ Ū nene nakiwīlaga gīkī, “Ū SEEBA h'ūyo alī ngabo gwane, hūna lūūlū nakūng'wisagīlwa we.”

²⁵ Ū SEEBA wawiza no ū kū banhū abo kwisagīlwa kwabo kūlī mulī we; ū kūlī munhū ūyo ūnkooba we.

²⁶ Chiza no ū kūbūlindīīla mu būlembeezu ū būpīji bo ng'wa SEEBA.

²⁷ Īlī chiza ū munhū atūmame milīmo midito mu wiyūmīlīja aho ataalī ng'walūki.

²⁸ Ikale iyene mu būlembeezu, nguno ī yenīyo winhagwa na SEEBA.

²⁹ Ū nomo gwakwe agūlang'hane mu widoohya, nguno hamo kwadūla kūbiza kūtaalī ho kwisagīlwa.

³⁰ Ūlū munhū alīhaya kūntūla ipī antegele Isaya, nūūlū magooke ni gang'wihoolekelage.

³¹ Nguno ū SEEBA atabaponyaga ilalī a banhū.

³² Nūūlū wenha mhayo gwa kūpīnīhaja, nahene alī na shigongo; nguno ū būtogwa bokwe būtaale no.

³³ Ū wei gūtanyejaga ū gwa kūbenhela a banhū makoye nūūlū būpīna.

³⁴ Mihayo gītī: Kūbapandagīla hasī pye a batungwa,

³⁵ kūng'wīngīja munhū ng'hana yakwe Īyo īng'wigeleelilwe kū būtongi bo ng'wa Mulungu Ntaale,

³⁶ na kūkenaagūla būlamulwa bo banhū mu mabanza; pyī ī yenīyī ū SEEBA atītogilwe!

³⁷ Nani ūyo akahayaga mhayo gwashikīīla ūlū SEEBA atagūhelile?

³⁸ A mayanga nī mihayo ī misoga, shitafumaga kūlī Mulungu Ntaale?

³⁹ Nibūlī ū munhū ū mpanga adugume kūlwa kwinhwa nsango nguno ya shibi shakwe?

Būkomigi kūlwa kūnshokela SEEBA

⁴⁰ Tūjigīsīlījagi ī nzīla jise, tūjilole tūjibone ūmo jilī; tūnshokelagi SEEBA.

⁴¹ Tūnugūlīlagi Mulungu wa ng'wigūlū ī ng'holò jise, tūmūūkīje makono tūnombe tūlīhaya:

⁴² Tūkahūba kūlwa kūgoma, nang'ho ūtatūlekegije.

⁴³ Alīyo ūkikundīkīja būpelanu, hūna ūyūtūkūūbīlīja watūbūlaga ndūhū na kūtūchīla shigongo.

⁴⁴ Ī haha wikundīkīja ilunde, ndūhū kūlomba kwa kūkūpandīka.

⁴⁵ Ū mu mahanga ga mu sī watwītile kūbiza mapalala na būsoso.

⁴⁶ Pye a banishi bise bakūtwanīīlaga.

⁴⁷ Tūkiimaalīlilwe lyogohya na mitego, hamò na kūyagaala na mayanga.

⁴⁸ A miso gane gakūhūūmaga myongo ya shisoji kūlwa nguno ya kūkenaagūlwa kwa banhū bane.

⁴⁹ A miso gane gatooya ū kūsela Ī shisoji, gatifuula na hado yaya,

⁵⁰ kūshisha ū SEEBA alole kūfuma ū kwigūlū abone.

⁵¹ Īyo nakwībonaga na miso gane balīītīlwa pye a bashīke ba mu nzengo gwa ng'wise Īkūniminyaga no ū mu ng'holò.

⁵² Abo balī na wanishi kūlī nene na nguno ītīho, baalūnihīīgaga gītī noni.

⁵³ Baanihombokegije ng'wichongo nataalī mpanga, būyūniponda mo na mawe;

⁵⁴ na minzī gūnihūūmīīla ganilibīje kūshisha nū ntwe gwane; niganika gīkī nahaya kūcha.

⁵⁵ Ee SEEBA, kwīngīīla ng'wichongo ishimu naakūlīlīīlile mu lina lyako;

⁵⁶ Waniigwile nalīdaaya: “Ūtizichibīja matū ūleke ū kwigwa ū kūlīla kwane kwa kūkooba kūgunanhwa.”

⁵⁷ Aho naakwitana ūkanegeela ūniwīla, “Ūtogohage!”

⁵⁸ Ee Seeba, wanilwīlīīlile ū mu makoye gane, ūnipīja ū būpanga wane.

⁵⁹ Ee SEEBA, wībonile ī mibi Īyo nīītīlilwe. Nilwīlīīlage ū mu mihayo yane.

⁶⁰ Ū bebe ūmanile ūmo banikolelilwe; nī ī yose īyo balomanile kūnīītīla wīmanile.

⁶¹ Ee SEEBA, ū bebe ūkawigwaga ū būsondagūji wabo; nī yose īyo bakalomanaga kūnīītīla,

⁶² Īyo banishi bane bakikalaga balihwehwetela na kūduguma līīmi tole kūlwa nguno yane.

⁶³ Balolage gete a benabo! Nguno būlī hene aho balī, babize bigashije nūūlū bīmīīlile, bakikalaga bīmba mīmbo ga kūnilīnga nene dūhū!

⁶⁴ Ee SEEBA, balīpage īyo ībigeleelilwe; kūlenganīla nī yīyo bakīyītaga na makono gabo.

⁶⁵ Babbokujage ī ng'holò jabo; bagwisījage ī lizumo lyabo.

⁶⁶ Bakūūbīlījage mu būpelanu ūbayagaje bashile gete a ha sīlīlī y'igūlū lya ng'wa SEEBA.