Ng'hūngū 2 - Bibilia Ilagano Lya Kale 2015

Nsango kūlwa shibi sha banhū

¹ Ū SEEBA wankundīkīgije ū Sayuni ilunde lya būpelanu bokwe būtaale! Ī likūjo lya Isilaeli walyīngije ū ng'wigūlū ūlīponya hasī; Ū mu lūshikū lwa būpelanu wakwe atawizūkilwe nūūlū ū būtūūlo bo mhambala jakwe.

² Ū Seeba wabūmilile pyī ū wikalo bo ng'wa Yakobo na shigongo yaya, ī ng'hambī ja ng'wa Yuda ja kūpīlīla wajikambagūlile kūlwa būdaki bokwe. Ū būtemi wenūbo na a basugi baamo wabūgwishije hasī mu būdalahwa.

³ Būl'ipembe walīpogolile ū mu Isilaeli kūlwa būdaki būtaale. Ū nkono gwakwe gwa būlyo akagūsunda aho wiza ng'wanishi kūūbūka. Ū mulī Yakobo ūbīta apembekile gītī ndali ja moto gūkūbbebbenaga būlī shene īsho shilī mu nzīla.

⁴ Akabanga būta bokwe gītī ng'wanishi, ū nkono gwakwe gwa būlyo gūlinda milīmo. Bose pye abo baalī basoga kūlola wabayagagije gītī ng'wanishi; Ī liheema lya Sayuni ūlitīīla būpelanu bokwe gītī moto.

⁵ Ū Seeba wabizile gītī ng'wanishi, wamilile ū Isilaeli; wajimilile pyī ī numba jakwe j'ikūlū, nī ng'hambī ja kūpīlīla ūjikenaagūla. Wang'ongegegije ū Yuda būpīna na ng'hūngū.

⁶ Ū wikalo bokwe owītile kūbiza gītī ngūnda gūtī na shose shose; ī lipandī lyakwe lya kwibilingīla walīkambagūlile; Ū SEEBA wang'wītile ū Sayuni ajīībe Ī shikū jakwe ja shigukulu, pyī nī sabato kūūko; kūlwa būpelanu wakwe būtaale, wabaponije a batemi na a bagabīji.

⁷ Ū SEEBA wagūlemile ū ng'walīlo gwakwe, nī lipandī lyakwe lyeela ūlīleka. Nī ndugu ja numba j'ikūlū lya Yelusalemu wajitūūlile mu makono ga banishi. Baashikile ū mu numba ya ng'wa SEEBA bandya kūyoganya, gītī balī ng'wikanza lya shigūkulu.

⁸ Ū SEEBA wabonile ayīkambūle Ī ndugu īyo īpīndīlīgije Sayuni; wīsolelile lūgoye kwigoloola, ū nkono gwakwe atagūlemegije ū kūkenaagūla. Ī ndugu jalīlile būpīna, pye na a makīgījo gajo; shose shenīsho shakenaagūkile.

⁹ Ī mibita ya zengo yalibīlile hasī; a mapagīgījo gaho gaabīnzagūkile gūkenaagūka. Ū ntemi waamo na a basugi baamo balī kū mahanga mu būding'wa, Ī shilagīlo shitīho ī haha, na a bahangi baamo batūpandīkaga shakoolechiwa kūfuma kūlī SEEBA.

¹⁰ A banamhala ba Sayuni babizilikala bibbadīkaga hasī balī sele sele, bakwisaamulīlaga lūbuubu kū mitwe, kūnū bazwaalile myenda ya magūnīla. A bashīke ba mu Yelusalemu balīdīīla biyinamīīlaga.

¹¹ A miso gane gaasedeekile nose kūlwa kūlīla; ū mu gatī nalī na būluhi būtaale no, Ī ng'holò yane yidīkile hasī kūlwa kūkenaagūlwa kwa banhū bane; nguno a baana na a beleele bakūgwaga mhūngīli mu mapanda ga mu nzengo.

¹² Bakūhongeelaga balī mu makono ga baninabo, kūnū būbadayīīla balīhaya, “Shilī halī ī shilīwa nī sha kūng'wa?” Balī gītī banhū batūlile būgumīlwa balīshilīlīkīīla,

¹³ Ee Yelusalemu, nakūwīle mhayo kī? Nakwikolanīje na shikolo kī? Ee Sayuni, nakwinhe shigemeng'hejo kī nadūle kūkūlūngūja? Nguno ī ligulaagīje lyako ishimu no, gītī būjiba bo nyanza. Nani ūyo adūgije ū kūkūpīja?

¹⁴ Īyo baakūhangīlaga a bahangi bako Ītī na solobo, yalī ya nyachilūchilū; batakoolekegije hape ī shibi shako gīkī babūhangīje ū būding'wa wako. Baakwinhaga mihayo ya būlomolomo kūlwa kūkūjimīīja.

¹⁵ Pye abo bakūbītaga bbihī nang'ho balīyipaala makono kūnū būshingisha mitwe kūlwa nguno yako; bakwībbyeedelejaga ī Yelusalemu balīhaya: “Ū gwenūyū hū gwene ū nzengo ūyo gwalī na lūkumo lūsoga kwīheeba pyī Ī mizengo? Hū gwene ūyo gwenhaga būyegi mu sī?”

¹⁶ Pye a banishi bako bakūkwanīīlaga būkūbbyeedeleja na kūkūshūūnūlīla mino mu būdalahi; kūnū balīhaya, “Twankala ū ng'wenūyo. Ū lwenūlū hū lūshikū ūlo twalī tūlūlindīīlile mu kwisagīlwa; nose twalūbona!”

¹⁷ Ū SEEBA wīyītile īyo walī ayīhelile, wagūshikīlīgije ū mhayo gwakwe ūyo agūlagīlile kūfuma shikū ja kale. Ū bebe wakūgwishije ndūhū na kūkūchīla shigongo, wanekelile ū ng'wanishi ikumīlīje kūlwa kūkūheeba; a banishi bako wabagūngūhije.

¹⁸ Ī ng'holò ja banhū jilīnīlīīla SEEBA. Bebe ndugu ya Sayuni, ī shisoji shako ni shihūūmage gītī mongo līīmi na būjikū; yaya ū kūlembeela, ūtizūgifuuja a miso gako.

¹⁹ Nūūlū būjikū būkaga ūlīle! Ū būjikū ūlū būlandya kwingīla, ī ng'holò yako yitage gītī minzī kū būtongi bo ng'wa SEEBA; mūūkījage a makono gako ūnīlīīle kūlwa būpanga wa baana bako abo balīnanulwa nzala būlī mu nhūūng'wanhīlo ja makūūwa.

²⁰ “Ee SEEBA, lolaga ūtwiganikīle; Alīho nani ūyo wabīta kūng'wītīla mhayo gūlī gīkī? Nibūlī nose a bakīma bayūlya matwajo ga nda jabo, a baana babo abo bakabalelaga? Nibūlī a bagabīji na a bahangi babūlagīlwe ng'wipandī lyeela lya ng'wa SEEBA?

²¹ Bose bado na bataale baagwile, balī mu lūbuubu lwa mu mapanda; līlūshū lyabagwisangije a badinha bane, na a basūmba na a banhya. Ūkababūlaga mu lūshikū lwa būpelanu wako; ūbayagaja na shigongo yaya.

²² Ūkalaalīka banishi ba kūnogohya bize banigobanīle kose kose, gītī ūlīlaalīka bizi ba kū shigukulu. Abo naabalela na kūbakūja, ng'wanishi ūbakenaagūla mu lūshikū lo būpelanu bo ng'wa SEEBA; atilongile nūūlū ūmò wa kūpīla, nūūlū kūpūlūgūka.”