Ng'hūngū 1 - Bibilia Ilagano Lya Kale 2015

Yelusalemu kūgwa mu būpīna

¹ Ū nzengo ūyo gwalī gokalile banhū ni kinehe gwabiza dalali gīkī! Ūyo gwalī ntaale mu mahanga ī haha gūlī gītī nkīma nchīlwa; ūyo ī kale walī n'ikūjo mu mahanga gose gītī ngole, wabizile nsese kū bangī!

² Ī haha būjikū pe akūlījiagwa būpīna, abange ng'wanikī ookalile mijūūlūlū ya shisoji kū matama, ūyo atī na wa kūnūngūja ū mu bitogwa bakwe pye a bose. A binhya biye baang'wijombokile; Ī haha pye banisha bakwe!

³ Hanuma ya makoye mataale na kūluha kwingī, ū Yuda alī mu būding'wa kū mahanga, atī n'ipandī lya kwifuulīla. A bakūūbīja bakwe bampandīkile alī mu mayanga mataale.

⁴ A makūūwa ga kūja Sayuni galīīlīla, nguno baagayile a ba kūja koi ū kūjūlamya. Ī haha ī mibita yakwe īlī buyīkī, a bagabīji bakwe bakūgang'hīlaga, a banhya ba mu ng'wakwe balīkoya; alī mu būpīna būtaale no.

⁵ A banishi bakwe baabizile bataale bakwe, a bilwisha bakwe balī mu kwifuula. Ū SEEBA wang'wenhelile būpīna kūlwa nguno ī shibi shakwe shingī no. A baana bakwe balī mu būsese, balī mu būding'wa ha sīlīlī ya banishi babo.

⁶ Ī likūjo lya ng'wa Sayuni lyajimīīlile pyī ī lyose; a bagole bakwe ī haha babange saala jabītwa chū, jikūjaga jūgwa nzīla ngima kūlwa kūbapeela bapeeja baajo.

⁷ Ū mu shikū jakwe ja kūluha na kūyūnga sagala, ū Yelusalemu akūshiizukagwa Ī shikolo sha mpango, īsho shalī shakwe mu shikū ja kale. A banhū bakwe aho badumīlwa na banishi babo, atilongile wa kūngunanha. A banishi bakwe bakūnolaga bansekeela kūlwa nguno ya kūkenaagūlwa kwakwe.

⁸ Ū Yelusalemu wīta shibi shitaale, h'ī nguno ya kūsosohala no no no. Pye abo baalī bankūgije bandalahile, nguno bībonile ī minala ya dūūhū yakwe.

⁹ Ū būsoso bokwe boolī būdaamīīlile kū shizwalo shakwe; alīyo walī atīyiganikaga ī ya shikū ja kū būtongi. Wagwile kagwīle kabūbi no; hama atilongile wa kūnūngūnja. “Ee SEEBA, ū ng'wanishi wane wanipyenile, kūlolage ū kūluha kwane!”

¹⁰ Pyī ī shikolo shakwe sha mpango shasolilwe na ng'wanishi; ū ng'wipandī lyakwe lyeela gingīlile mahanga gataamanile Mulungu, wabonile na miso gakwe wei ng'wenekīlī banhū balingīla, abo bebe ūlemile gīkī batizūsangīla mu kwibilinga kwa bako.

¹¹ Pye a banhū bakwe balīdaaya bakūkoobaga shilīwa. Ī shikolo shabo sha mpango bakūshikaabaga bapandīke shilīwa bikale bapanga. “Ee SEEBA, lolaga ūniiganikīle; nguno nalīsondagūlwa no!”

¹² Bing'we babīti, būlī mutūdīlīlaga? Ilalangījagi mubone. Alīho nani ūngī ūyo alī na makoye gītī gane ayo gaanigwīlile, ayo SEEBA wanenhelile mu lūshikū lwa būpelanu bokwe būtaale?

¹³ Wanenhelile moto kūfuma kwigūlya, ūgwenheela mu maguha gane. Wanitegelile ntego ūnigwasha a magūlū gane, hūna ūninyamula nūshoka numa. Wanīngīgije pyī ī shose, ūnileka nakūsola solaga ng'holò līīmi tole.

¹⁴ Ī shibi shane washikūbanīgije, pyī ī shose ūshitunga na nkono gwakwe shūbiza ijoki idito mu nhingo yane; ū SEEBA wajibbipile pyī ī nguzu jane, hūna ūnitūūla mu makono ga banhū abo natadūgije kūbīmīla.

¹⁵ Ū SEEBA wabalemile pye a bashilikale bane abo nalī nabo; wasamīlile ibità lya kwiza kūbashigina a badinha bane. Ū SEEBA wampandagīlile ū Yuda ng'wikamīlo lyakwe lya mizabibu.

¹⁶ “H'ī nguno yene nalīīlīla, na a miso gane galīhūūma shisoji. Na atīho ūyo alī bbihī gīkī anilūngūje, ndūhū wa kūdūla kūnitimbya ng'holò. A baana bane batī na shiigunaanīlo, nguno ū ng'wanishi hū mpyeni.”

¹⁷ Ū Sayuni alīgoloola makono gakwe, alīyo atīho ū wa kūnūngūja; ū SEEBA wahelile gīkī a bazenganwa biye ū Yakobo babize banishi bakwe. Ū Yelusalemu wabizile shikolo shisoso ū mubo.

¹⁸ Ū SEEBA ng'wene ntūngīlīja, alīyo ū nene naashigomela ī shilagīlo shakwe. Igwagi bing'we banhū bose, wideedeng'hanyagi ū būluhi wane. A bitūnja bane na a bashīke bane balī mu būsaamiwa ī haha.

¹⁹ Abo tūl'isangī līmò nakihamba ū kabapeeleela alīyo būnigwisha. A bagabīji bane na a banamhala būshila kūcha mumo nzengo, bakwiyangayangīlaga kūhemeela shilīwa sha kūbagunanha bikale bapanga.

²⁰ Ee SEEBA, kūbonage ū kūzwangana kwane! Ū mu gatī nalī na būluhi būtaale no, nazwanganile no ū mu ng'holò yane, nguno naalī nakūgomela. Ī hanze līlīko līlūshū līlīīlya; ū mu gatī namo icha dūhū.

²¹ A banhū bakūwigwaga ū būlīji wane, alīyo atīho ū wa kūnilūngūja. A banishi bane bakwigwaga ūmo naazwanganīlile; bakwīyegelaga īyo wīyītile. Lwenhage ū lūshikū ūlo walūhaya, nabo babize gīt'ūmo nalī ū nene.

²² Pyī ū būbi wabo ni būshikage ū kūlī bebe; bīītīlage ūmo wanīītīlile ū nene kūlwa nguno ya shibi shane shose. Nalī na kūlīla kūtaale no, nī ng'holò yane īkūsaatagwa.