Nehemia 9 - Bibilia Ilagano Lya Kale 2015

Baisilaeli kūtambūūla shibi shabo

¹ Ū mu lūshikū lwa makūmi abīlī n'inè lwa ng'weji gwenūyo, a Baisilaeli bibilinga hamò kūlw'ikanza lya kūfunga. Baalī bazwalile shizwalo sha magūnīla, nū kū mitwe yabo baalī bisaamagūlīla lūbuubu.

² A Baisilaeli abo baalī baalekana nabo pye a banhū ba mahanga, bakīmīīla būtambūūla ī shibi shabo nī sha bakūlūgenji babo.

³ Bīmīīla aho baalī, būtūmamīla lobo ya lūshikū kūshisoma ī shitabo sha shilagīlo sha ng'wa SEEBA Mulungu wabo; na lobo yīngī bītūmamīla mu kūtambūūla, na kūnamya SEEBA, ū Mulungu wabo.

⁴ Balawī balebe, ba Yeshua, Bani, Kadimieli, Shebania, Buni, Shelebia, Bani, Kenani, baalī bīmīīla ha lūtala bakūnilīīlaga ū SEEBA Mulungu wabo n'ilaka lya higūlya.

⁵ Hūna a Balawī, a ba Yeshua, Kadimieli, Bani, Hashabuneya, Shelebia, Hosidia, Shebania, Pesahiya, būhaya, “Īmīīlagi munkumīlīje ū SEEBA Mulungu wing'we, ūyo alī wa welelo na welelo. Ī lina lyako ī litaale līkumīlījiwe, nīyo līgūngūhiwe higūlya no no no kūtinda kakumīlīgīje na kagongoolele kose.”

Kūlomba mu koolecha wiza bo ng'wa SEEBA

⁶ Ū bebe hū ūlī SEEBA ūmò wike. Hū bebe ūlī meeja w'igūlū, na a mapandī ga ng'wigūlū ayo galī kwigūlya kūtinda igūlū, na a mabità ayo galīmo. Nī sī ūlī meeja wayo, hamò nī shose īsho shilī muyo, na a manyanza nī shose īsho shilī mugo. Ūkashinhaga bebe ū būpanga pyī ī shikolo, na a mabità ga ng'wigūlū gakakūlamyaga bebe.

⁷ Ū bebe ūlī SEEBA Mulungu, hū bebe ūkansola Abulamu, ūng'wīnja mu sī ya Ūlū ya Bakalidayo, hūna ūng'wilīka lina lya Abulahamu.

⁸ Ūkamona ī ng'holò yakwe gīkī yalī nshikaanu ū kūlī bebe, hūna lūūlū ūbeeja ilagane nang'hwe, gīkī ūkūng'winha ī sī ya Bakanaani, Bahītī, Baamoni, Bapelizi, Bayebusi, na Bagiligashi. Na ng'hana ūshikīlīja ū kwisagīja kwako, nguno ūlī ntūngīlīja.

⁹ A bakūlūgenji bise nabo aho balī mu sī ya Misili ūkabūbona ū būluhi wabo, nū kūlīla kwabo ūkigwa ū kū nyanza ī yaza.

¹⁰ Ū kūlī Falao na a batūmami bakwe, na a banhū bose a ba mu sī yakwe ūkabeeja shimanīkījo sha kūkumya kūlwa koolekeja būdūla wako. Nguno walī ūbūdeebile ū wibonya ūbo babīītīlaga a bakūlūgenji bise. Hūna lūūlū wibeegeja lina, īlo kūshisha na lelo īyī līlīho lyīmīīlile.

¹¹ Hama ī nyanza wīgabanhya, bīkīlanhya bo kūshimīza hasī nyūmu; alīyo abo babakūūbījaga gīkī babadime, a bene ūbakenaagūlīla ū mu būjiba bo nyanza yenīyo; būlibīla libilibi gīt'iwe mu minzī mashimu.

¹² Ū mu kūbatongeela, ī līīmi watūmamīlaga ng'hīngī y'ilunde, alīyo ī būjikū ng'hīngī ya moto kūlwa kūbatiimīla ū mu nzīla īyo babītīlaga.

¹³ Ūkika a ha lūgūlū lwa Sinai, ūbayombya kūfuma ng'wigūlū; ūbinha kahelele na shilagīlo shigoloolile na shitūngīlīgije, hamò na malange na katongeelele kawiza.

¹⁴ Nī sabato jako ī neela ūbamanīkīja, ūbinha na kahelele, hamò na malange, na shilagīlo mu nzīla ya ng'wa Musa ntūmami wako.

¹⁵ Ūyūbinha shilīwa sha kūfuma ng'wigūlū, gīkī ūbīngīje ū lūtuubo lwabo, ūbinha na minzī kūfuma mu shiganga kūlwa kūbīngīja notà yabo; ūbawīla bingīle ū mu sī yenīyo bakīdime, īyo walī wabūūcha nkono gwako ūbilahīlīla gīkī ūkūbinha ībize yabo.

¹⁶ Alīyo a bakūlūgenji bise benabo, bakagang'hanaja nhingo, būlema ū kūgalondeela a malange gako.

¹⁷ Būlema gete ū kūdegeleka, batashizūkilwe ī shītīle sha kūkumya īsho walī wabeeja mubo; būgang'hanaja nhingo. Hūna ū mu būshitigwa wabo būsola ntongeeji wa kūbashosha mu būsese hangī. Alīyo nahene ū bebe īkī ūlī Mulungu nekeja, Mulungu wa shigongo na nsaatwa wa banhū, hama ūtapelanaga wangū, nīyo okalalile būtogwa, ūtabalekanīgije

¹⁸ nūūlū aho bakibeegeja shiikolile sha ndama, hūna biwīla gīkī, “Ū ng'wenūyū hū ng'wene ū mulungu wing'we, ūyo wang'wīnja ū mu sī ya Misili, pyī nūūlū aho bīītaga mihayo ya būsondagūji būtaale.

¹⁹ Hama nūūlū ū ng'witogolo ūtabalekile īkī ū bebe ūlī nsaatwa wa banhū; ī ng'hīngī y'ilunde ītoyile ū kūbatongeela ū mu nzīla yabo a makanza ga līīmi; nūūlū ī ng'hīngī ya moto ītoyile ū kūbatiimīla a makanza ga būjikū ū mu nzīla īyo yalī ībigeleelilwe kwībītīla.

²⁰ Nū Moyo wako ūbinha gīkī abalange, nī eemanu yako ūtabīngīgije ū mu milomo yabo, nūūlū bakolwa notà wabinhaga a minzī ga kūng'wa.

²¹ Bakashisha ikanza lya myaka makūmi anè balī ng'witogolo, ūbalang'hanile dūhū; batagayiwe shose shose, nūūlū batakoyiwe būzuuka kūlwa kūmala shizwalo, nī mhambala jabo jitabimbile.

²² Ūkabinha mabūtemi na mahanga, nī sī ījo jalī kūle no no no ūbahelela kūbiza jabo; ī sī ya ng'wa Sihoni ntemi wa Heshiboni bīdima, nī ya ng'wa Ogi, ntemi wa Bashani.

²³ Ū būbyīle wabo ūkabongeja, būkwīla gīt'ūmo jilī sonda ja ng'wilunde, hūna ūbenha ū mu sī īyo walī wabawīla bakūlūgenji babo kwingīla na kwīdima ībize yabo.

²⁴ Na ng'hana a banhū ba shibyalīlwe shabo bingīla moi, būkīdima ī sī yenīyo yūbiza yabo. A bana Kanaani abo bikalaga ū mu sī yenīyo ūbapyena kūlwa nguno yabo; a bana Kanaani benabo ūbatūūla mu makono gabo, pye na a batemi babo, na a banhū ba mu sī yenīyo, gīkī babīītīle gīt'ūmo batogelilwe boi.

²⁵ Bakadima mizengo īpīndīlījiwe ndugu, na malaale gawiza; būdima na numba jokalile shikolo shisoga sha būlī mbika, na nzwinzī ījo jalī jisīmbilwe ng'hana ng'hana, na migūnda ya mizabibu na ya mizeituni, na mitī mingī ya matwajo. Bandya kūlya, bigūta būgīna, būyūyegela ū mu wiza wako ū būtaale.”

Banhū ba ng'wa Mulungu kūgoma

²⁶ Alīyo nahene bakabiza bashitiigwa, būkūgomela. Ī shilagīlo shako būshinhīla ngongo; būyūbabūlaga a bahangi bako abo babahūgūlaga gīkī bakūshokele, bīīta mihayo mitaale ya būsondagūji būbi no.

²⁷ Hūna lūūlū ū bebe ūbatūūla mu makono ga banishi babo, būbaluhya; alīyo aho baluhiwa na a banishi babo būkūlīlīīla, nang'ho īkī ūlī na shigongo shitaale, ūbigwa kūfuma ū ng'wigūlū, ūbatūmīla bapīja ba kūbapīja kūfuma ū mu makono ga banishi babo.

²⁸ Alīyo aho balembeela dūhū, bīīta hangī yabūbi ū mu miso gako. Nang'ho ūbaleka hangī mu makono ga banishi babo būbasuga. Alīyo aho balīla hangī, wigwa kūfuma ū ng'wigūlū. Īkī ūlī na shigongo shitaale wikalaga ū kūbapījaga ng'hangala na ng'hangala.

²⁹ Aho wabahūgūla gīkī bashishokele hangī ī shilagīlo shako, būdalaha dūhū, būleka ū kūgigwa a malange gako, bīīta shibi kūlwa kūshidalaha ī shilagīlo shako, īsho ūlū munhū ūshishikīlīja akūbiza mpanga. Ū mu būgūnu wabo wenūbo būkwinhīla ngongo, būjigang'hanaja nhingo, būlema ū kwigwa.

³⁰ Īkakwīla ī myaka ūkwiyūmīlījaga nabo, kūnū ūkūbahūgūlaga na Moyo wako, mu nzīla ya bahangi; alīyo nahene batadīlīīlile. Hūna lūūlū ūbatūūla mu makono ga mahanga ga banhū abo baalī bazenganilwe nabo.

³¹ Alīyo īkī ūlī na shigongo shitaale, ūtabamalile pye, nūūlū ūtabalekanīgije; nguno ū bebe ūlī Mulungu nchīji wa shigongo, na nsaatwa wa banhū.

³² “Alilūūlū ī haha SEEBA Mulungu wise, bebe ūyo ūlī Mulungu ntaale, na wa būdūla, hangī wa kogohwa; bebe ūyo ūkadimīīlaga ilagane lyako mu būtogwa būtī wa kūshila, ūtizūgabona a makoye gise gīkī galī mado; a makoye genayo gaatūgwīla a bise banhū bako kwandīja mu shikū ja batemi ba Baashulu kūshisha lelo īyī. Tūlī mu makoye mataale no a bise benekīlī na a batemi bise, na a batongeeji bise na a bagabīji bise, pye na a bahangi bise na basīswe.

³³ Ū mu yose īyo yatūgwīlaga, ū bebe ūkatūmamīlaga būtūngīlīja gwa; ūkīītaga mu wishigwa, alīyo a bise twīta mu būhūbi.

³⁴ A batemi bise, na a batongeeji bise, na a bagabīji bise, na a basīswe, batashilondeelile ī shilagīlo shako, batagadīlīlile a malange gako, nūūlū ū būhūgūji ūbo wabinhaga.

³⁵ Nūūlū aho balī ū mu būtemi wabo, aho babūyegelaga ū wiza wako būtaale ū kūbo, ūbo wabīītīlaga ū mu sī īyo walī wabinha ī ngalī na yawiza, nahene batakūtūmamīlile ū bebe, nūūlū batagalūkile balekane nī nzīla jabo ī jabūbi.

³⁶ Alīyo ūlībona ī haha gīkī tūlī basese, basese mu sī īyo walī wabinha bakūlūgenji bise, gīkī bagalūmbe a matwajo gaamo, nī shikolo shawiza ī shabūyaga īsho shikigelaga moi.

³⁷ Ī sī yenīyī īlī na shikolo shingī no, alīyo kūlwa nguno ya shibi shise, ī shikolo shayo pyī ī shose shikajanagwa na batemi abo wabīīta kūbiza basugi bise. Batūsugile a bise benekīlī, nī mitugo jise, na lūūlū bakatwītīlaga ūmo batogelilwe boi benekīlī; nīyo tūlī mu makoye mataale no!”

Abo bakatūūla mina gabo h'ilagane

³⁸ “Alilūūlū kūlwa yose yenīyī, tūlībeeja ilagane lya kūshinga ho, īlo tūlīlyandīka; hūna a batongeeji bise, na a Balawī, na a bagabīji bise balītūūlīle meng'ho jabo.”