Nehemia 7 - Bibilia Ilagano Lya Kale 2015

Kūsolwa Hanaani na Hanania

¹ Aho yamala ū kūzengwa ī ndugu, nī milyango yaho nūmala ūkwītūūla būlī gwene h'ipandī lyago, hūna būsolwa balang'hani ba ha milyango na a bīmbi, na a Balawī.

² Ū Hanaani ū ng'wanong'wise nūntūūla kūbiza ntaale wa nzengo gwa Yelusalemu, hamò na Hanania ūyo walī ntaale w'ibità lya bashilikale ba mu nzengo, nguno walī ntūngīlīja hangī munhū walogohano kūlī Mulungu kūtinda ūmo baalī a banhū a bingī.

³ Nūbawīla, “Yaya ū kūyūlugūlwa ī mibita ya Yelusalemu kūshisha lyanagalūka ī līīmi. A balang'hani ba ha milyango ya ha mibita ūlū bataalī balang'hanile bawīlagi gīkī ī milyango īyikala īlugalilwe na kūpagījiwa. Nīyo a balang'hani basolanhyagi kūfuma mu bikaji ba mu Yelusalemu; būlī kwipandī īlo ahelelilwe, na būlī ng'wene kwilola na kaya yakwe.”

Abo bakashoka kūfuma Babuloni

⁴ Gwike ū nzengo gwalī ntaale no, alīyo a banhū ba kwikala moi baalī bagehu, nī numba jalī jitaalī ū kūzengwa.

⁵ Hūna ū Mulungu wane ūnitūūlīla iganiko ū mu ng'holò yane, lya kūbakuminga pye a banhū a bataale bataale, na a batongeeji; na a banhū a bangī dūhū, gīkī bandīkwe kūlondeela ndūgū ja kaya jabo. Nūshibona ī shitabo sha kwihela kwa ndūgū ja banhū abo baalī batonga ū kūshoka. A mina ayo nakagapandīka ayo gaalī gandīkilwe mo gaalī aya:

⁶ Aba hū bene a banhū abo bakashoka kūfuma sī ya Babuloni, ū ng'wikanza lya kūshoka kwa banhū abo baalī bading'wa būsaamiwa; abo ntemi Nebukadineza wa Babuloni walī wabasaamīja kwenūko. (Aho bashoka bakikala Yelusalemu na Būyudaya, būlī munhū kū nzengo gwa ng'wawe.

⁷ Baalī hamò na Zelubabeli, Yeshua, Nehemia, Selaya, Lelaya, Modekai, Bilishani, Misipali, Bigivai, Nehumu, na Baana.) Ī lisaabu lya bagosha ū mu banhū a Baisilaeli benabo lyalī īlī:

⁸ A ba shibyalīlwe sha ng'wa Paloshi baalī shihūmbī shibīlī n'igana na makūmi mpungatī na babīlī.

⁹ A ba ng'wa Shefatia baalī magana adatū na makūmi mpungatī na babīlī.

¹⁰ A ba ng'wa Ala baalī magana atandatū namakūmi atanò na babīlī.

¹¹ Ba ng'wa Pahati-moabu, (bahilya Yeshua na Yoabu) baalī shihūmbī shibīlī na magana anaane n'ikūmi na banaane.

¹² Ba ng'wa Elamu baalī shihūmbī shimò na magana abīlī na makūmi atanò na bane.

¹³ Ba ng'wa Zatū baalī magana anaane na makūmi anè na batanò.

¹⁴ Ba ng'wa Zakai baalī magana mpungatī na makūmi atandatū.

¹⁵ Ba ng'wa Binui baalī magana atabdat na makūmi anè banaane.

¹⁶ Ba ng'wa Bebai baalī magana atandat namakū abīlī na banaane.

¹⁷ Ba ng'wa Azigadi baalī shihūmbī shibīlīi na magana adatū na makūmi abīlī na babīlī.

¹⁸ Ba ng'wa Adonikamu baalī magana atandat na makūmi atandatū na mpungatī.

¹⁹ Ba ng'wa Bigivai baalī shihūmbī shibīlī na makūmi atandatū na mpungatī.

²⁰ Ba ng'wa Adini baalī magana atandat na makūmi atanò na batanò.

²¹ Ba ng'wa Ateeli, (bahilya Hezekia) baalī makūmi kenda na banaane.

²² Ba ng'wa Hashumu baalī magana adatū na makūmi abīlī na banaane.

²³ Ba ng'wa Bezai baalī magana adatū na makūmi abīlī na bane.

²⁴ Ba ng'wa Halipu baalī igana n'ikūmi na babīlī.

²⁵ Ba ng'wa Gibeoni baalī makūmi kenda na batanò.

²⁶ Banhū ba Betelehemu na Netofa baalī igana na makūmi anaane na banaane.

²⁷ Banhū ba Anasosi baalī igana na makūmi abīlī na banaane.

²⁸ Banhū ba ng'wa Azimaveti baalī makūmi anè na babīlī.

²⁹ Banhū ba Kiliasalimu, Kefila, na Beeloti baalī magana mpungatī na makūmi anè na badatū.

³⁰ Banhū ba Lama na Geba baalī magana atandatū na makūmi abīlī n'ūmò.

³¹ Banhū ba Mikimashi baalī igana na makūmi abīlī na babīlī.

³² Banhū ba Beeseli na Ai baalī igana na makūmi abīlī na badatū.

³³ Banhū ba ng'wa Nebo baalī makūmi atanò na babīlī.

³⁴ Banhū ba ng'wa Elamu ū ūngī baalī shihūmbī shimò na magana abīlī na makūmi atanò na bane.

³⁵ Banhū ba ng'wa Halimu baalī magana adatū na makūmi abīlī.

³⁶ Banhū ba Yeliko baalī magana adatū na makūmi anè na batanò.

³⁷ Banhū ba ng'wa Lodo, Hadidi, na Ono baalī magana mpungatī na makūmi abīlī n'ūmò.

³⁸ Banhū ba ng'wa Senaa baalī shihūmbī shidatū na magana kenda na makūmi adatū.

³⁹ A bagabīji ba numba ya ng'wa Yedaya, (bahilya Yeshua) baalī magana kenda na makūmi mpungatī na badatū.

⁴⁰ Ba lūganda lwa Imeeli baalī shihūmbī shimò na makūmi atanò na babīlī.

⁴¹ Ba lūganda lwa Pashuli baalī shihūmbī shimò na magana abīlī na makūmi anè na mpungatī.

⁴² Ba lūganda lwa Halimu baalī shihūmbī shimò n'ikūmi na mpungatī.

⁴³ A Balawī ba lūganda lwa Yeshua na Kadimieli, (bahilya Hodavia) baalī makūmi mpungatī na bane.

⁴⁴ Bīmbi a ba shibyalīlwe sha ng'wa Asafu baalīigana na makūmi anè na banaane.

⁴⁵ Balang'hani ba ha milyango ya ha hekalu, ba shibyalīlwe sha ng'wa Shalumu, Ateeli, Talimoni, Akubu, Hatita, na Shobai. A benaba baalī igana na makūmi adatū na banaane.

⁴⁶ Batūmami ba mu hekalu: Ba shibyalīlwe sha ng'wa Ziha, Hasufa, Tabaosi.

⁴⁷ Ba lūganda lwa ng'wa Kelo, Sia, Padoni,

⁴⁸ Ba lūganda lwa ng'wa Lebana, Hagaba, Shalimai,

⁴⁹ Ba lūganda lwa ng'wa Hanaani, Gideli, Geheli.

⁵⁰ Ba lūganda lwa ng'wa Leaya, Lezini, Nekoda,

⁵¹ Ba lūganda lwa ng'wa Gazamu, Uza, Pasea,

⁵² Ba lūganda lwa ng'wa Besai, Meunimu, Nefusimu,

⁵³ Ba lūganda lwa ng'wa Bakibuki, Bakufa, Halihuli.

⁵⁴ Ba lūganda lwa ng'wa Baziluti, Mehida, Hasha,

⁵⁵ Ba lūganda lwa ng'wa Balikosi, Sisela, Tema,

⁵⁶ Ba lūganda lwa ng'wa Nezia na Hatifa.

⁵⁷ Shibyalīlwe sha batūmami ba ng'wa Solomoni: Ba shibyalīlwe sha ng'wa Sotai, Hasofeleti, Pelida,

⁵⁸ Jaala, Dalikoni, Gideli,

⁵⁹ Shefatia, Hatili, Pokeleti-hazibaimu, na Amoni.

⁶⁰ A batūmami ba mu hekalu na a banhū ba shibyalīlwe sha batūmami ba ng'wa Solomoni baalī magana adatū na makūmi kenda na babīlī.

⁶¹ A banhū aba bakiza kūfuma kū mizengo ya Teli-mela, Teli-hasha, Kelubi, Adoni na Imeeli. Gwike bakalemeelwa ū koolecha ī ndūgū ja bakūlūgenji babo, nūūlū ī fumo yabo, ūlū gīkī ng'hana baalī bamò ba Baisilaeli.

⁶² Ba shibyalīlwe sha ng'wa Delaya, Tobia na Nekoda baalī magana atandatū na makūmi anè na babīlī.

⁶³ A ba kūfuma mu bagabīji baalī: Ba shibyalīlwe sha ng'wa Hobaya, Hakozi na Bazilai (ū ng'wenūyo walī wantoola nshīke o ng'wa Bazilai muna Gileadi, nūūlū īkī nang'hwe witanagwa ī lina lyenīlo).

⁶⁴ A benaba bakagakooba no a mina gabo ū mu kwihela kwa shandīkwa, alīyo batagapandīkile. Hūna lūūlū būkomanyiwa bīnjiwa ū ng'wigelè lya bagabīji, būbalwa kūbiza balī basoso.

⁶⁵ Hūna lūūlū ū nsugi wa sī ūlagīla batizūshilya ī shilīwa ī sheela no no no, kūshisha igele ngabīji ūyo adūgije kūlola mihayo bo kūtūmamīla Ulimu na Sumimu.

⁶⁶ A banhū bose baalī bashikile shihūmbī makūmi anè na shibīlī na magana adatū na makūmi atandatū,

⁶⁷ kūleka kūbabala a batūmami babo a bagosha, na a bakīma abo baalī shihūmbī mpungatī na magana adatū na makūmi adatū na mpungatī. Hama baalī na bīmbi bagosha na bakīma magana abīlī na makūmi anè na batanò.

⁶⁸ Na falasa magana mpungatī na makūmi adatū n'itandatū, nzobe nhaale magana abīlī na makūmi anè n'itanò,

⁶⁹ ngamīla magana anè na makūmi adatū n'itanò, na nzobe shihūmbī shitandatū na magana mpungatī na makūmi abīlī.

⁷⁰ Bamò ba batongeeji ba kaya jabo bakafunya shakwinha kūlwa nguno yago ū nīmo; ū nsugi ūfunya kilo inaane na nusu ja zahabu, mabakuli makūmi atanò, ng'hanjo magana atanò na makūmi adatū ja bagabīji.

⁷¹ Bamò ba batongeeji ba kaya ja bakūlūgenji būfunya kilo igana na makūmi atandatū n'inaane ja zahabu, ja kūtūūla mu mfuko kūlwa nguno ya nīmo; na kilo shihūmbī na magana abīlī na makūmi atanò ja feza.

⁷² A banhū abo bakasaaga pye a bose būfunya kilo igana na makūmi atandatū n'inaane ja zahabu, igana makūmi anè ja feza, na ng'hanjo makūmi atandatū na mpungatī ja bagabīji.

⁷³ A bagabīji na a Balawī, na a balang'hani ba ha milyango, na a bīmbi, hamò na banhū bamò na bamò; na a batūmami ba mu hekalu, na a Baisilaeli a bose bakashikīla mu mizengo yabo. A Baisilaeli būbiza balembeela mu mizengo yabo. A ho gwashika ng'weji gwa mpungatī.