Nehemia 6 - Bibilia Ilagano Lya Kale 2015

Nzīla ja kūgwisha ng'holò

¹ Ū Sanibalati nū Tobia, nū Geshemu, na a Balabu, hamò na banishi bise a bangī aho bawīlwa gīkī nīzengile būpya ī ndugu, na gīkī twīchibile pye ūmo yalī īhomagūkile, nūūlū īkī kūshika ikanza lyenīlo naalī nataalī ū kwītūūla ī milyango a ha mibita,

² ū Sanibalati nū Geshemu būnitūmīla nhūng'wa balīhaya gīk, “Nzūgū tūmanhīje kwigūngūli līmò lyaho lya mu mbūga ya Ono.” Alīyo baalī n'iganiko lya kūnīītīla yabūbi.

³ Nūbatūmīla nhūng'wa nalībawīla, “Ū nene nalī na nīmo ntaale no ū kūūnū, natūdūla ū kwiza ū kwenūko; nibūlī nize kūhooya ning'we kwenūko, nagūleke ū nīmo gwīmīīle?”

⁴ Bakashisha ng'hangala inè bakūmanagūnitūmīla nhūng'wa ja mbika yenīyo, nane nabashokeja gīko dūhū.

⁵ Nose ū Sanibalati ūtūma ntūmami wakwe, wiza abūkije nyalūba mu nkono, alīyo yalī itakundīkīgije;

⁶ yandīkilwe gīkī, “Gwakumūkile ū mu banhū ba mahanga gwa gīkī, ū bebe na a Bayudaya mutogilwe kūgoma; nīyo nū Geshemu alīhaya gīkī ū mhayo gwenūyo gūlī chene ng'hana. H'ī nguno yene mulīyīzenga ī ndugu, hama ū bebe ūlī na ng'hūmbū ja kūbiza ntemi wabo.

⁷ Hūna lūūlū witūūlīlile bahangi ū mu Yelusalemu, bakūhangaga kūlwa nguno yako; bakūhayaga gīkī, ‘Alīho ntemi ū mu sī ya Būyudaya!’ Alilūūlū, ū mhayo gwenūyū gūkūshika ū kūlī ntemi, na lūūlū nzūgū tūgūhooyele.”

⁸ Nane nūntwalīla ishosho nūng'wīla, “Īyo ūlīyīhaya yenīyo ītīho, mamihayo ga kūfuma mu ntwe gwako dūhū a genayo.”

⁹ Ī ng'hūmbū jabo a banhū benabo pye a bose jalī kūtūkanga; nguno biganikaga, “Tūbolohye a makono gabo gagayī ī nguzu, balemeelwe ū kūgūshikanya ū nīmo.” Ee SEEBA Mulungu, gaguzuhyage a makono gane.

¹⁰ Lwise lūmò nakaja kū ng'wa Shemaya ng'witūnja o ng'wa Delaya, ng'wana Mehetabeli; walī wilugalīla mu kaya yakwe. Ūniwīla, “Bebe tūjage mu numba ya ng'wa Mulungu, tūkikale mu hekalu twīlugale nī milyango ya hekalu, nguno balīho banhū balīhaya kwiza kūkūbūlaga; bakwiza ī būjikū bakūbūlage!”

¹¹ Alīyo nūhaya, “Ū nene ng'wenūyū napeele gete? Nūūlū ū munhū wa kūbiza gītī nene ūpeelela mu hekalu kūlwa kūhaya kūpīja būpanga bokwe? Natingīlaga mo ū nene ū ng'wenūmo!”

¹² Nakadeeba gīkī ū munhū ng'wenūyo walī atatūmilwe na Mulungu, alīyo wanihangīlaga ū būhangi wenūbo kūlwa nguno ya ng'wa Tobia na Sanibalati abo baalī bangodisha.

¹³ Walī wahongwa gīkī anikange nilalīle, nīīte shibi mu nzīla yenīyo; bapandīke nzīla ya kūnibila isū lyabūbi badūle kūnisondagūla.

¹⁴ Mulungu wane, ng'wizūkagwe ū Tobia nū Sanibalati, kūlwa mihayo īyo bīyītile yenīyo; pyī nū ng'hangi nkīma ū Noadia, na a bahangi a bangī abo balī na ng'hūmbū ja kūnogohya.

Nzenga ya ndugu kūshila

¹⁵ Hūna lūūlū ū nīmo gwa kwīzenga ī ndugu gūshila mu lūshikū lwa makūmi abīlī n'itanò ng'weji gwa Elūli; gūbiza gwasola ikanza lya shikū makūmi atanò n'ibīlī.

¹⁶ A banishi bise aho bagwigwa ū mhayo gwenūyū, na a banhū ba mahanga ayo gaalī gatūpīndije būbona, a banishi bise būgwa ng'holò. Nguno bakabona hape gīkī ū nīmo gwenūyū gwatūmamilwe mu būgunanhi bo ng'wa Mulungu wise.

¹⁷ Ū mu shikū jenījo a banhū a bataale bataale a ba mu sī ya Būyudaya bikalaga bakūntwalīlaga nyalūba ū Tobia, nū wei ū Tobia wabenhelaga ī nyalūba jakwe.

¹⁸ Nguno bingī ū mu sī ya Būyudaya walī wabilahīja, īkī ū wei walī nkwīlīma o ng'wa Shekania, ng'witūnja o ng'wa Ala. Hama ū ng'witūnja wakwe ū Yehohanani walī wantoola nshīke o ng'wa Meshulamu ng'witūnja o ng'wa Belekia.

¹⁹ Hama a higūlya ya yenīyo, bikalaga bakūniwīlaga ī ya wiza bokwe; hūna nū wei baja kūng'wīla īyo nīhayaga, hūna ū Tobia wanitūmīla nyalūba ja kūnikanga.