Nehemia 5 - Bibilia Ilagano Lya Kale 2015

Nehemia kūbagunanha bahabī

¹ Nahayimanīla bandya kūlīla a banhū na a bake babo, kūlwa nguno ya badūgū babo a Bayudaya.

² Bamò balīlaga balīhaya, “A bise na a bitūnja bise na bashīke bise tūlī bingī no, tūtūdūla ū kūpīla ūlū tūtapandīkile shilīwa.”

³ Bangī bahayaga, “Tūleega a malaale gise nī migūnda yise ya mizabibu, pyī dūhū nī numba jise, gīkī tūpandīke shilīwa, kūlwa nguno ya nzala.”

⁴ Na bangī hangī būyūhaya, “Tūlī na magasa, nguno tūkūsolaga hela ja banhū, gīkī tūpandīke ja kūtoba goodi ya ntemi, kūlwa malaale gise nī migūnda yise ya mizabibu.

⁵ Hama nīyo nūūlū īkī a badūgū bise balī mīlī na mininga gise gete, na a bitūnja bise balī gīt'ūmo balī a bitūnja babo, alīyo nahene īkūtwigeleelaga kūbatūūla mu būsese a bitūnja bise na a bashīke bise. Nīyo ī haha bashīke bise bamò balī mu būsese, alīyo tūtī nabo ū būdūla; nguno a malaale gise nī migūnda yise ya mizabibu ī haha sabo ya bangī.”

⁶ Aho nawigwa ū būlīji wabo nū wibūūji wenūbū, nakasaaya no.

⁷ Nahayūyideedeng'hanya ī yenīyī ū mu ntwe gwane, nūbawīla a bataale na a batongeeji, “A bing'we mukūbasabīlaga a biching'wi!” Hūna nūbilinga lūbanza lūtaale lwa kwīhooyela ī mihayo yabo.

⁸ Nūhaya, “A bise tūkūgemaga gīt'ūmo būlī ū būdūla wise, kūbagūla a badūgū bise a Bayudaya, kūfuma ū kū banhū ba mahanga ūko bajinjiwa mu būsese. Alīyo a bing'we mulīyūbajinja a badūgū bing'we, gīkī tūjingījiwe hangī a bise!” Būhuumūla sele, nguno bakagayiwa ū gwa kūshosha.

⁹ Nongeja kūbawīla nalīhaya, “Īyo mulīyīta yenīyī yabūbi no, ītang'wigeleelilwe kūshimīzīla mu logohano lwa ng'wa Mulungu wise, tūtizikala tūkūsondagūlagwa na a banishi bise, a banhū ba mahanga?

¹⁰ Ū nene na a badūgū bane tūkūfunyaga hela na shilīwa gīkī bayūlanda a banhū; hūna lūūlū ū mhayo gwa kūbapandīkīla solobo banhū gwenūyū gūche!

¹¹ Bashokejagi wangū a malaale gabo, nī migūnda yabo ya mizabibu, nī ya mizeituni, pyī nī numba jabo; nī solobo īyo ng'wapandīka kūlwa kūbanyeekeja, īyī īmò ya ng'wigana ya kūfuma ū mu hela, nū mu shilīwa nū mu divai, nū mu maguta.”

¹² Būhaya, “Tūkūbashokeja nīyo toyaga ū kūbanyeekeja shikolo shose shose, tūkwīta gīt'ūmo ūlīhayīla.” Hūna nūbitana a bagabīji, nūbilahīja a bataale na a basugi benabo gīkī bakwīshikīlīja īyo bakisagīja kwīyīta.

¹³ Nūgung'humūla nī ng'hanjo yane; kūnū nalīhaya, “Ū Mulungu ni angung'humūlage gīkī būlī ng'wene ūyo alaleke ū kūshikīlīja ū kwisagīja kwakwe; ang'wīnje ū mu numba yakwe, nū mu milīmo yakwe. Ū munhū wa mbika yenīyo akūgung'humūlwa gīko, īngījiwe būlī shikolo.” Pyī ū lūbanza lūhaya, “Alichene mu kūnkumīlīja SEEBA. Na ng'hana a banhū bīta gīt'ūmo kwalī ū kwisagīja kwabo.

Shilīwa sha malīngīīla

¹⁴ Na hangī a higūlya ya henaho, kūfuma aho nasolwa kūbiza nsugi ū mu sī ya Būyudaya, ū mu ng'waka gwa makūmi abīlī gwa ntemi Atashasta, kūshisha ng'waka gwa makūmi adatū n'ībīlī, hū kūhaya myaka ikūmi n'ībīlī, ī shilīwa īsho shalī shihelilwe kūlwa kaya ya nsugi natashilile ū nene ng'wenekīlī, nūūlū a badūgū bane.

¹⁵ Alīyo a basugi abo baalī batongi aho nataalī ū nene, baalī babaseseja a banhū nigo ndito no, nguno nūūlū īkī bapandīkaga ī shilīwa nī divai, alīyo a higūlya ya yenīyo, bahadīkījaga kwinhwa na shipande shitanò sha feza. Na a bagunanhi babo nabo babakoyaga no a banhū; alīyo ū nene natīītile ī yenīyo kūlwa nguno naalī nang'ogohile Mulungu.

¹⁶ Naalī nifunya gete ū kū nīmo gwa ndugu yenīyo, pye a banhū bane baalī balolelile henaho, tūtadimile sī nūūlū hado.

¹⁷ Hama a higūlya ya henaho, Bayudaya na batūmami ba selekali ba kūshika igana na makūmi atanò, baalīīlaga a ha meza yane; kūleka kūbisaaba abo bizaga kūtūlola kūfuma kū mahanga ayo gaalī gatūpīndije.

¹⁸ Būlī lūshikū yasīnzagwa nzīkū ya ng'ombe, na ng'holo ng'īnu itanò, na magoko ayo nabeegejiagwa ū nene. Hama būlī shikū ikūmi yenhagwa divai ningī ya būlī mbika. Ī chene napandīkaga shenīshi dūhū, alīyo nahene hū natahadīkile gīkī nayūpandīka ī shilīwa īsho shalī shing'wigeleelilwe nsugi; nguno a banhū benaba balī na nigo ndito no.

¹⁹ Mulungu wane, nizūkagwe kūnīītīla yawiza kūlwa yose īyo nabīītīla a banhū benaba.