Nehemia 4 - Bibilia Ilagano Lya Kale 2015

Sanibalati na Tobia

¹ Ū Sanibalati aho wigwa gīkī twandije kwīzenga ī ndugu, akasaaya, hangī ūpelana no; nīyo ūyūbasondagūla a Bayudaya.

² Ūyomba kū būtongi wa banwani biye, na bashilikale ba Samalia badegelekile; ūhaya, “A Bayudaya a bagokolo gokolo aba balīīta mhayo kī shi ī gete? Bakwīzenga gete ī ndugu yabo? Bakūfunya shitambò? Bakūmala mu lūshikū lūmò dūhū? A mawe ayo gakenaagūlwa moto genayo, nīyo hangī galī mu malūndo ga mapalala gīko, bakūdūla gete ū kūgasoboola bagatūmamīle hangī?”

³ Baalī bihelile na Tobiasi ū muna Amoni; nang'hwe ūhaya, “Angū nabo balīzenga ndugu ya mawe ī gīko, alīyo nūūlū lījidīvī dūhū ūlū lyīdang'hamīla līlīhaya kūlinha hoi, līkwīgwisha!”

⁴ Ee Mulungu wise, yigwage ī yīnīyo, nguno tūlīsondagūlwa noi; bashokejage ū būsondagūji wabo, būbidīkīle ha mitwe yabo boi benekīlī. Batūūlage mu makono ga mahanga ga sī ja kūle gabajane nding'wa.

⁵ Nū būbi wabo ūtizūbūkundīkīja, pyī nī shibi shabo ūtizūshijimya ū kū būtongi wako, nguno balībasondagūla no a bazengi!

⁶ Na ng'hana a bise tūja nago dūhū ū nīmo gwa kwīzenga ī ndugu, nose yūdimana pyī ī ndugu, kūshisha ha nusu ya būgūngūhu wayo. Nguno a banhū batūmamaga na ng'holò īmò.

⁷ Alīyo ū Sanibalati nū Tobia, na Balabu balebe, na Baamoni na a bana Ashidodi aho bigwa gīkī ū nīmo go kwīzenga ī ndugu ya Yelusalemu gūlīja chiza, na gīkī a mahomagūkīle galīja gūchiwa, bakongeja ū kūsaaya.

⁸ Būlomana bizunīlīja a bose, gīkī bize kūgūdumīla ū nzengo gwa Yelusalemu, na kwenha nsambo moi.

⁹ Alīyo a bise tūnomba ū Mulungu wise, hanuma tūtūūla balang'hani ba kūyūlang'hana līīmi na būjikū, kwīhangīja īyo bahayaga kwīyīta.

Balang'hani kūhelwa chiza

¹⁰ Gwike twahayimanīla a banhū ba Yuda bayūhaya, “Yabanojaga ī milīmo a binhīlīja ba bazengi, hama na a malūndo ga makambagūkīle mingī no, tūlīlemeelwa ū kūgūtūmama ū nīmo gwa kūzenga ī ndugu.”

¹¹ A banishi bise nabo būyūhaya, “Tūkūbisanganīja batamanile; nū kūtūbona batūdūla, bakūhayimanīla tūlī mumo dūhū tūbabūlage, gūche ū nīmo.”

¹² Alīyo a Bayudaya abo bikalaga bbihī na a banishi bise, bakakwīja a makanza bakwizaga batūwīla, “A banishi bakwikobya kūfuma hose pyī ūko bazengile, bize batūdumīle.”

¹³ Hūna lūūlū nūtūūla banhū kū numa ya ndugu, būlī hene aho yalī ītaalī nguhī, aho haalī hataalī ng'waje. Nūyūbatūūla kūlondeela ndūgū jabo, nīyo būlī bene balī na shū jabo, machimu, na būta.

¹⁴ Aho nīlola chiza ī mihayo, nīmīīla nūbawīla a bataale na a batongeeji na a banhū a bangī; nūhaya, “Mutabogohage ng'wizūkagwi ū SEEBA ūyo alī ntaale na wa kogohwa, mubalwīlīīle a badūgū bing'we, na a bitūnja bing'we, na a bashīke bing'we, na a bake bing'we nī kaya jing'we.”

¹⁵ A banishi bise aho bigwa gīkī twīdeebile ī long'we yabo, nī gīkī ū mhayo gwabo wagūsagambūlile ū Mulungu, a bise pye tūshoka ū kū ndugu; būlī ng'wene kū nīmo gwakwe.

¹⁶ Hūna kwandīja lūshikū lwenūlo a batūmami bane nūbagaba magel'abīlī, bamò būyūtūmama ū nīmo gwa nzenga, a bangī babūkije machimu, mūda, būta, na shilanga shingī. A batongeeji bīmīīla hīgīyī ū kū numa ya Bayudaya,

¹⁷ abo bazengaga ī ndugu. A babūūcha ba shikolo batūmamīlaga nkono gūmò, ū gūngī gūdimile shilanga.

¹⁸ Na būlī nzengi wazengaga alī na lūshū lwakwe alūtungile mu nkīmbīlī. Alīyo ū mfuuji wa mhembe, ū ng'wene wikalaga bbihī na nene.

¹⁹ Hūna nūbawīla a bataale na batongeeji, na a banhū a bangī, “Ū nīmo gwenūyū gūlī ntaale, nīyo twasambaalaga no a ha ndugu.

²⁰ Alilūūlū, ūlū ng'wigwa ī mhembe yalīlīla ha lebe, nzūgi koi mutūgunanhe. Ū Mulungu wise akūtūlwīlīīla!”

²¹ Tūja nago ū nīmo, ī nusu ya banhū bikalaga badimile machimu kwandīja dilū makīngo kūshisha sonda jandya kūfuma.

²² Hama ū mu shikū jenījo nūbawīla a banhū, “Būlī ntūmami na ngunanhi wakwe ni babizagikala mu Yelusalemu ī būjikū, bayūtūgunanha kūlang'hana ī būjikū, ī līīmi batūmama ū nīmo.”

²³ Ū mu shikū jenījo wal'atīho ūyo wazulaga ī shizwalo shakwe; ū nene ng'wenekīlī, na a badūgū bane, na a banhū bane, na a balang'hani abo bikalaga hamò nū nene; būlī munhū wikalaga na shilanga shakwe pye a makanza, nūūlū ni ajile kū minzī.