Nehemia 3 - Bibilia Ilagano Lya Kale 2015

Nzenga kwandya

¹ Ū ngabīji ntaale ū Eliyashibu na a bagabīji biye bandya ū kūzenga, bandīja ha mita gwa ng'holo; būgweja hūna būgatūūla a malugalīlo gaho. Bakagweja kūshisha kū numba ndīhu y'igana, na kū numba ndīhu ya Hananeli.

² Bana Yeliko nabo bandīja aho akagelela ū ng'wenūyo, hanuma ya bana Yeliko ūzenga Zakuli ng'witūnja o ng'wa Imuli.

³ Bitūnja ba ng'wa Hasenaa nabo būgūzenga ū mita go ndīlo. Būgūtūūlīla ī migamba yago, na a malugalīlo na mizumali, na a mapagīgījo gaho.

⁴ Ūlondeela Melemosi ng'witūnja o ng'wa Ulia ng'wana Hakozi, nang'hwe ūzenga ibudīka ho. Ū kwīnga a halī wei ūzenga Meshulamu ng'witūnja o ng'wa Belekia, ng'witūnja o ng'wa Meshezabeli, ū kwīnga a halī ng'wenūyo ūzenga Sadoki ng'witūnja o ng'wa Baana.

⁵ Hanuma ya henaho būzenga bana Tekoa, alīyo a bataale babo batagemile gete ū kūkuumya a ha nīmo go ng'wa SEEBA wabo.

⁶ Ū mita gwa kale gūkazengwa na Yoada ng'witūnja o ng'wa Pasea, hamò na Meshulamu ng'witūnja o ng'wa Besodeya. Būgūtūūlīla ī migamba yago, na a malugalīlo na mizumali, na a mapagīgījo aho gaalī gigeleelilwe kūtūūlwa.

⁷ Ū kwīnga a ha benabo būzenga bana Gibeoni na Misipali, ūmò wabo walī Melatia, wa kūfuma Gibeoni, ūngī walī Yadoni muna Melonosi. Ī sī jenījo jalī ha sīlīlī ya nsugi wa sī ya kū nkīlo gwa mongo.

⁸ Ūlondeela Uzieli ng'witūnja o ng'wa Halihaya, walī ūmò wa basuji ba shikolo sha zahabu. A ha numa ya ng'wenūyo Hanania, ng'wene walī meeja wa maguta ga būlenji, nang'hwe ūzenga. A benabo bībeegeleja ī Yelusalemu kūshisha kū ndugu ngalī.

⁹ Lefaya ng'witūnja o ng'wa Huuli, ūyo walī nsugi w'ipandī līmò lya nzengo gwa Yelusalemu nang'hwe ūzenga ī libudīka īlo līkalondeela hoi.

¹⁰ Yedaya ng'witūnja o ng'wa Haluma nang'hwe ūlūnganīja a halī ng'wenūyo, ūzenga ibudīka lya kwilola nī numba yakwe. Hatushi ng'witūnja o ng'wa Hashabuneya nang'hwe ūzenga kūnondeela ū ng'wenūyo.

¹¹ Malikīya ng'witūnja o ng'wa Halimu na Hashubu ng'witūnja wa Pahati-moabu ongeja ibudīka līngī, wīzenga nī numba ī ndīhu ī ya bapembi ba moto.

¹² Hanuma ya ng'wenūyo ūzenga Shalumu ng'witūnja o ng'wa Haloheshi, nang'hwe walī nsugi wa nusu ya nzengo gwa Yelusalemu; akagunanhwa na bashīke bakwe.

¹³ Ū mita gwa kū longa gūzengwa na Hanuni hamò na bana Zanoa. Aho bagūzenga būgūtūūlīla malugalīlo na mizumali, na a mapagīgījo aho gaalī gigeleelilwe kūtūūlwa. Bongeja hangī ū kūzenga, itogolo lya būlīhu bo mhambala gītī magana atanò, būkashika kū mita gwa kū mapalala.

¹⁴ Alīyo ū mita gwa kū mapalala ū gwene gūzengwa na Malikīya ng'witūnja o ng'wa Lekabi, ūyo walī nsugi w'ipandī lya Beti-hakelemu. Akagūzenga hūna ūgūtūūlīla malugalīlo na mizumali, na a mapagīgījo aho gaalī gigeleelilwe kūtūūlwa.

¹⁵ Ū mita gwa kū lūzwīlo gūkazengwa na Shalumu ng'witūnja o ng'wa Koli-hoze, ūyo walī nsugi w'ipandī lya Misipali. Aho wagūzenga hūna ūgūtūūlīla n'ikundīkījo a higūlya, hanuma ūgūtūūlīla malugalīlo na mizumali, na a mapagīgījo aho gaalī gigeleelilwe kūtūūlwa. Nī ndugu ya h'ilambo lya Siloamu, bbihī na ngūnda gwa ntemi, wīzenga ūūkashika ū kū malinhīlo ga kūja kū nzengo go ng'wa Daūdi.

¹⁶ Hanuma yakwe ūzenga Nehemia ng'witūnja o ng'wa Azibuki, ūyo walī nsugi wa nusu y'ipandī lya Beti-zuli; ūbeegeleja kūshisha ipandī īlo lyalī lilolile na mashigo ga ng'wa Daūdi, ūkolobela ajile ūūkashika kwitaba lya kūsīmvwa na banhū, na kū numba ya bagosha ba mbagashūla.

¹⁷ Ū kwīnga a henaho būzenga Balawī, ha sīlīlī ya būtongeeji bo ng'wa Lehumu ng'witūnja o ng'wa Bani. Ūbīmbīkanwa na Hashabia, ūyo walī nsugi wa ibudīka lya sī ya Keila, ū ng'wenūyo ūzenga ī libudīka īlo lyalī ū mu sī īyo walī ayīsugile.

¹⁸ Hanuma ya henaho banhū ba ng'wigūngūli būzenga ha sīlīlī ya būtongeeji bo ng'wa Binui ng'witūnja o ng'wa Henadadi, nsugi wa nusu y'ipandī lya Keila.

¹⁹ Hanuma yakwe ū ng'wenūyo, Ezeli ng'witūnja o ng'wa Yeshua, nsugi wa Misipali, ūzenga ibudīka līngī kwandīja ha kuluba ya ha būtongi w'ipandī lya kūlinha ūjile kū numba ya kūtūūlīla shilanga.

²⁰ Hanuma ya ng'wenūyo, Baluki ūzenga hangī ipandī līngī kūfuma a ha kuluba henaho kūshisha kū numba ya ng'wa Eliyashibu, ū ngabīji ntaale.

²¹ Hanuma ya ng'wenūyo, Melemosi ng'witūnja o ng'wa Ulia, ng'wana Hakozi, ūzenga ibudīka līngī kwandīja ha nyango gwa kwingīla mu gwalugwa ya ng'wa Eliyashibu ū ngabīji ntaale, kūshisha ūko yalī īgelile ī numba yakwe.

²² A bagabīji abo bikalaga kū mizengo ya hanze, nabo būzenga kwandīja aho akalebela ū ng'wenūyo.

²³ Hanuma ya benabo būzenga ba Benjamini na Hashubu kū būtongi bo numba yabo. Hūna a ha numa yabo, Azalia ng'witūnja o ng'wa Maaseya, ng'wana Anania, ūzenga bbihī nī numba yakwe.

²⁴ Ū kūnondeela ū ng'wenūyo Binui ng'witūnja o ng'wa Henadadi, ūzenga ibudīka līngī kwandīja ha numba ya ng'wa Azalia, kūshisha ūpīnda ūūkashika kū kuluba.

²⁵ Hūna Palali ng'witūnja o ng'wa Uzai ūzenga h'ipandī lyalī lilolile nī kuluba, hamò nī numba ī ndīhu īyo yalī īpulung'hanije ū kū numba ya kwigūlya ī ya h'ikūlū, ūūkashika bbihī na numba ya balang'hani. Hanuma yakwe ū ng'wenūyo ūzenga Pedaya ng'witūnja o ng'wa Paloshi.

²⁶ A batūmami ba mu hekalu, abo bikalaga kū lūgūlū lwa Ofeli, nabo būzenga ibudīka lilolelile nū mita gwa kū minzī, kūjīlīīla kīya, nū kū numba ndīhu īyalolelagwa kūfuma kūle.

²⁷ Kwīngīīla aho bakagelela a benabo, bana Tekoa būzenga ibudīka līngī, kwandīja a ha numba ndīhu ī nhaale īyalolelagwa kūfuma kūle, būkashika kū ndugu ya Ofeli.

²⁸ A bagabīji nabo būzenga kū būtongi wa mita gwa falasa, būlī ng'wene kūlīngīsīīla ūmo īgelelile ī numba yakwe.

²⁹ Ūlondeela Sadoki ng'witūnja o ng'wa Imeeli, nang'hwe ūbeeja kūlīngīsīīla ūmo yalī īgelelile ī numba yakwe. Hanuma ya ng'wenūyo Shemaya ng'witūnja o ng'wa Shekania, ūyo walī nang'hani wa ha mita gwa kū kīya, ūzenga nang'hwe.

³⁰ Hanuma yakwe ū ng'wenūyo, Hanania ng'witūnja o ng'wa Shelemia na Hanuni, ng'witūnja wa katandatū o ng'wa Zalafu ūzenga ibudīka līngī. A ha numa yabo a benabo, Meshulamu ng'wana Belekia ūzenga ibudīka bbihī na a haho yalī ng'hambī yakwe.

³¹ Hanuma ya ng'wenūyo, Malikīya; nang'hwe walī ūmò wa basuji ba shikolo sha zahabu, ūzenga ūūkashika ūko yalī numba ya batūmami ba mu hekalu, na ya basūlūja, kū būtongi wa mita gwa kūlolwa; ūūkashika na kū chumba īsho shalī higūlya ya kuluba.

³² Hama a ha gatī ya chumba ī sha higūlya ya kuluba na mita gwa ng'holo, būzenga babeeja ba shikolo sha zahabu na basuluja.