Nehemia 13 - Bibilia Ilagano Lya Kale 2015

Kwikomanya na mahanga

¹ Ū mu lūshikū lwenūlo shūsong'wa ī shitabo sha ng'wa Musa, bigwa a banhū; yūbonwa handīkilwe moi gīkī ū mu Baamoni na a Bamoabu, atīho nūūlū ūmò wa kūzunīlījiwa kwisangīja ū mu kwibilinga kwa banhū ba ng'wa Mulungu.

² Nguno batabasūng'wanhile a Baisilaeli mu kūbinha shilīwa nūūlū minzī ga kūng'wa, alīyo a ha ng'wanya gwaho bakangodisha Balaamu kūbazuma. (Gwike ū Mulungu wise ūlīgalūcha ī lizumo lyūbiza mbango.)

³ A banhū aho bigwa gīko būbakomanya pye a banhū abo baalī ba kūfuma mu ba mahanga, bīnga ū mu Baisilaeli.

Shiseme sha ng'wa Tobia kūfunyiwa hanze

⁴ Aho lītaalī ū kūshika īlikanza lyenīlī, ū ngabīji Eliashibu walī watūūlwa kūbiza ntaale wa chumba sha kūlang'hanīla shikolo ū mu numba ya ng'wa Mulungu wise. Hūna lūūlū īkī walī nwani ng'wiye o ng'wa Tobia,

⁵ ūnsolela chumba shalīho shitaale, ī kwandya shatūmamīlagwa kūtūūlīla shitambò sha būsu, būbbani, shiseme, na zaka ja shilīwa, na divai mhya, hamò na maguta; shikolo īsho shalī shilagīlilwe kūlwa kūtūmamīla Balawī, bīmbi, na a balang'hani ba ha mibita. Shabīkagwa mo nī shakwinha īsho shafunyiagwa kūlwa bagabīji.

⁶ Ī yenīyo aho īlīītwa naalī natīho ū nene, nguno ū mu ng'waka gwa makūmi adatū n'ībīlī go ng'wa Atashasita alī ntemi wa Babuloni, nakashoka ū kūlī ntemi. Gahayūbīta makanza malebe nūnomba hangī ū ntemi anizunīlīje,

⁷ ng'hana ūnizunīlīja nūshoka ī Yelusalemu. Aho nashika koi hū nīsanga ī soso ya ng'wa Eliashibu īyo walī wīyīta, kūlwa kūng'winha ū Tobia chumba ū ng'wibīndo lya mu numba ya ng'wa Mulungu.

⁸ Nakadaka no, nūgafunya ū mu chumba pye a mashikolo ga ng'wa Tobia, nūgaponanja hanze.

⁹ Nūlagīja sheejiwe ī chumba, hūna nūshitūūla moi hangī ī shikolo sha mu numba ya ng'wa Mulungu, nī shitambò sha būsu, nū būbbani.

Shiigunaanīlo sha batūmami

¹⁰ Nūbona na gīkī a Balawī baalī boya ū kwinhwa īsho shalī shihelilwe kūlwa kūbagunanha, na lūūlū pye a Balawī abo bīītaga ī milīmo ū ng'wikanza lya kūlamya, baalī bashoka kū malaale gabo.

¹¹ A batongeeji nūbadūka; nūbabūūja, “Nibūlī ī numba ya ng'wa Mulungu yalekanījiwe gīko?” Hanuma ya henaho nūbitana pye a bose, nūbatūūla būlī munhū h'ipandī lyakwe.

¹² Hūna a banhū ba Yuda bandya hangī kwenha ū mu chumba sha kūbīkīla, ī zaka jabo ja shilīwa, divai mhya na a maguta.

¹³ A ha nīmo gwa kūshilang'hana ī chumba sha kūbīkīla shikolo nūbatūūla hoi ba Shelemia ū ngabīji, na Sadoki nangi wa shilagīlo, na Nawī ūmò lina lyakwe Pedaya. Ū ngunanhi wabo nūnsola Hanaani, ng'witūnja o ng'wa Zakuli, ng'wana Matania; nguno a banhū benaba baalī bamanīkile gīkī badūgije kūsanyiwa. Hūna lūūlū binhwa ū nīmo gwa kūyūbagabīla a bichabo ī shikolo shenīsho.

¹⁴ Ee Mulungu wane, nizūkagwe ū mu mhayo gwenūyū, na hangī ūtizūgūfuta ūyo naagwītile mu wishigwa būtaale kūlwa nguno ya numba ya ng'wa Mulungu wane.

Ī sabato shiigelile īkūjiwe

¹⁵ Ū mu shikū jenījo nūbona gīkī ū mu sī ya Būyudaya a banhū bakūpandagīlaga mizabibu mu makamīlo kūlwa kūbeeja divai, ha lūshikū lwa sabato. Na bangī bizaga na nzobe jabo jibūkije shilīwa, divai, mizabibu, mitini, na miligo yīngī ya shikolo sha būlī mbika. Ī shose shenīshi bashenhaga Yelusalemu a ha lūshikū lwa sabato. Nūbahūgūla ū mu mhayo gwa kūjinja shilīwa ū mu lūshikū lwenūlo.

¹⁶ Baalīho banhū ba Tulo bikalaga ū mu nzengo, benhaga ndīlo na shikolo shabo shingī sha būlī mbika, kwiza kūbajingīja a bana Būyudaya ba mu Yelusalemu, a ha lūshikū lwa sabato.

¹⁷ Nūbadūka a bataale ba Yuda; nūbawīla, “Mhayo kī nago ū gwa malofu gwenūyū ng'wandije kūgwīta, nose mukūlūsosohajaga ū lūshikū lwa sabato?

¹⁸ A basīng'we batītile nabo mihayo ya mbika yenīyī dūhū, kūshisha nose ū Mulungu wise ūtwenhela ū būkenaagūji ū bose wenūbū a bise nū nzengo gwenūyū?” Ī haha mulongeja kwīyenhela makoyī ī Isilaeli kūlwa kwīsosohaja ī sabato!

¹⁹ Hūna nūlagīja gīkī ī milyango īyūlugalwa aho ītaalī kwingīla ī sabato, ūlū handya kūbiza na giiti a ha mibita; hama yaya ū kūlugūlwa kūshisha ībīte ī sabato. Nūtūūla banhū bane a ha mibita, bayūlemeja ī miligo ū kwingījiwa a ha lūshikū lwa sabato.

²⁰ A basūlūja na a bajinja ba shikolo sha būlī mbika, būshisha gītī ng'hangala ibīlī gīko bakwizaga balaalīja ī hanze ya nzengo gwa Yelusalemu.

²¹ Alīyo nūbahūgūla nalībawīla, “Bing'we nibūlī mukūlaalaga a ha ndugu? Oyagi, ūlū mulikale mukwītaga gīko nakūmudima!” Kūfuma ikanza lyenīlo booya ū kwiza a ha sabato.

²² Hūna nūbalagīla a Balawī biyeeje, bize bayūlang'hana a ha mibita, ū lūshikū lwa sabato lwikale lwela. Ee Mulungu wane, nizūkagwe nū mu mhayo gwenūyū, na hangī ūnoolekeje wiza kūlenganīla nū mumo būlī ū būtaale wa būtogwa wako.

Witooleeji na mahanga kūleng'wa

²³ Nīyo hangī ū mu shikū jenījo nūbabona bagosha bamò na bamò ū mu bana Būyudaya batoola bakīma ba Ashidodi, Amoni, na Moabu.

²⁴ Ī nusu ya baana babo batūmamīlaga lūlīmi lwa bana Ashidodi, nūūlū lūmò lwa ndīmi ī ja banhū a bangī; alīyo ū lūlīmi lwa Shiyudaya baalī batadūgije ū kūlūtūmamīla.

²⁵ Bakanisaayīcha no, nūbadūka na kūbadūka; bamò babo nūyūbatūla najidutūūla ī nzwīlī jabo jadubbūka. Nūbahadīkīja kwilahīla mu lina lya ng'wa Mulungu; nūbawīla, “Yaya ū kūbazunīlīja a bashīke bing'we ū kūtoolwa na a bitūnja babo, nūūlū mutizūbasolela a bitūnja bing'we a bashīke babo gīkī babatoole, yaya nūūlū kūbasola kūlwa nguno ying'we.

²⁶ Ī gīsī, ū ntemi Solomoni atītile shibi kūlwa nguno ya bakīma ba mbika yenīyī? Ū mu mahanga na mahanga ga mu sī, walī atīho ntemi wa kūbiza gītī wei, ū Mulungu wakwe walī antogilwe no, nīyo ū Mulungu ūng'wīta kūbiza ntemi wa Isilaeli ī yose; alīyo nahene nūūlū ū wei bakang'hūmbūūla a bakīma ba mahanga, ūgwa mu shibi.

²⁷ Alilūūlū, twikale tūmudegelekile dūhū na a bing'we mugwīte ū mhayo gwa malofu gwenūyū ū gwa kūngomela Mulungu wise, mu nzīla ya kūtoola bakīma ba mahanga?”

²⁸ Ūmò wa bitūnja ba ng'wa Yehoyada ū ng'witūnja o ng'wa Eliyashibu, ū ngabīji ntaale, walī nkwīlīma o ng'wa Sanibalati, ū muna Holoni, nūmpeeja ūnīngīla.

²⁹ Ee Mulungu wane, bizūkagwe a benabo, nguno baagūsosohagije ū nīmo gwa būgabīji, nī lilagane lya būgabīji na a Balawī.

³⁰ A henaho nūbiza nabīītīla mhayo gwa kūbinha wela, būlekana nī mihayo ī yose ī ya mahanga; hūna nūbahelela ī ndīīma jabo, būlī ng'wene na nīmo gwakwe.

³¹ Nūfunya na būganikīji kūlwa kwenha ng'hwi, nīmo ūyo gwalī gūtūūlilwe hoi kūlenganīla na a makanza ayo gahelilwe, nī sha kwinha sha matwajo ga kwandya. Ee Mulungu wane, nizūkagwe kūnīītīla yawiza.