Nehemia 11 - Bibilia Ilagano Lya Kale 2015

Abo bakabiza bikaji ba Yelusalemu

¹ Hūna lūūlū a batongeeji ba banhū būkikala mu Yelusalemu; a banhū a bangī pye a bose būyūtūlīja mbale, būlī munhū w'ikūmi waja kwikala Yelusalemu, mu nzengo ng'wela; abo kenda bikale ū kū mizengo ī yīngī.

² A banhū babalūmbīlījaga no abo bifunyaga boi benekīlī ū kūja kwikala ū mu Yelusalemu.

³ Aba bandīkilwe aha h'a batongeeji abo bakikala mu Yelusalemu, alīyo ū mu mizengo ī yīngī ī ya mu Būyudaya, a Baisilaeli bikalaga ū mu mizengo yenīyo būlī ng'wene h'itongo lya ng'wawe. Baalīho bagabīji, Balawī, batūmami ba mu hekalu, na a banhū ba shibyalīlwe sha batūmami ba ng'wa Solomoni.

⁴ Gwike ī chene banhū bamò a ba mu Būyudaya nī Benjamini bakaja būkikala ū mu Yelusalemu: A ba lūganda lwa ng'wa Yuda baalī, Asaaya ng'witūnja o ng'wa Uzia, ng'witūnja o ng'wa Zakalia, ng'witūnja o ng'wa Amalia, ng'witūnja o ng'wa Shefati, ng'witūnja o ng'wa Mahalaleli, o shibyalīlwe sha ng'wa Pelezi.

⁵ Na Maaseya ng'witūnja o ng'wa Baluki, ng'witūnja o ng'wa Koli-hozeni ng'witūnja o ng'wa Hazaya, ng'witūnja o ng'wa Adaya, ng'witūnja o ng'wa Yoalibu, ng'witūnja o ng'wa Zakalia, wa kūfuma mu shibyalīlwe sha ng'wa Shela.

⁶ A ba kūfuma mushibyalīlwe sha ng'wa Pelezi ī lisaabu lyabo a bose baalī magana anè na makūmi atandatū na banaane.

⁷ A ba lūganda lwa ng'wa Benjamini baalī, Salū ng'wana Meshulamu, ng'witūnja o ng'wa Yoedi, ng'witūnja o ng'wa Pedaya, ng'witūnja o ng'wa Kolaya, ng'witūnja o ng'wa Maaseya, ng'witūnja o ng'wa Isieli, ng'witūnja o ng'wa Yeshaya.

⁸ A balondeeji bakwe baalī Gabai na Salai, banhū magana kenda na makūmi abīlī na banaane.

⁹ Ū ntaale wabo walī Yoeli ng'witūnja o ng'wa Zikili, na Yuda ng'witūnja o ng'wa Hasenua, ū ng'wene walī ntaale wa kabīlī ū mu nzengo.

¹⁰ A ba kūfuma mu bagabīji baalī, Yedaya ng'witūnja o ng'wa Yoalibu, na Yakini;

¹¹ na Selaya ng'witūnja o ng'wa Hilikia, ng'witūnja o ng'wa Meshulamu, ng'witūnja o ng'wa Sadoki, ng'witūnja o ng'wa Melayote, ng'witūnja o ng'wa Ahitubu, ūyo walī nang'hani wa numba ya ng'wa Mulungu.

¹² Baalī hamò na bichabo abo bītaga ī milīmo ya mu numba yenīyo, a bose baalī banhū magana anaane na makūmi abīlī na babīlī. Walīho na Adaya ng'witūnja o ng'wa Yelohamu, ng'witūnja o ng'wa Pelalia, ng'witūnja o ng'wa Amuzi, ng'witūnja o ng'wa Zakalia, ng'witūnja o ng'wa Pashuli, ng'witūnja o ng'wa Malikīya,

¹³ na a biye abo baalī batongeeji ba kaya ja bakūlūgenji babo; banhū magana abīlī na mkūmi anè na babīlī. Walīho na Amasai ng'witūnja o ng'wa Azaleli, ng'witūnja o ng'wa Ahizai, ng'witūnja o ng'wa Meshilemosi, ng'witūnja o ng'wa Imeeli,

¹⁴ hamò na bichabo; banhū igana na makūmi abīlī na banaane, bashilikale bagosha batachaamagwa. Ū ntaale wabo walī Zabudieli ng'witūnja o ng'wa Hagedolimu.

¹⁵ A ba kūfuma mu Balawī baalī: Shemaya ng'witūnja o ng'wa Hashubu, ng'witūnja o ng'wa Azilikamu, ng'witūnja o ng'wa Hashabia, ng'witūnja o ng'wa Buni;

¹⁶ Shabesai na Yozabadi, ū būbīlī wabo baalī bamò ba mu bataale ba Balawī a bīmīīji ba milīmo ya hanze ya numba ya ng'wa Mulungu.

¹⁷ Walīho na Matania ng'witūnja o ng'wa Mika, ng'witūnja o ng'wa Zabudi, ng'witūnja o ng'wa Asafu, ūyo walī ntongeeji wa kūyūtongeela ng'wikanza lya kūfunya būlūmbi ūlū balī ng'wilomba, na Bakibukia ūyo walī wa kabīlī ū mu baana ba ng'wawe; na Abuda ng'witūnja o ng'wa Shamua, ng'witūnja o ng'wa Galali, ng'witūnja o ng'wa Yedusuni.

¹⁸ A Balawī a bose ū mu nzengo ng'wela baalī magana abīlī na makūmi anaane na bane.

¹⁹ A balang'hani ba mibita baalī, Akubu, Talimoni, na a baana ba ng'wabo abo baalī balang'hani ba ha mibita; banhū igana na maakūmi mpungatī na babīlī.

²⁰ A Baisilaeli a bangī na a bagabīji, hamò na a Balawī baalī hose hose ū mu mizengo ya Būyudaaya, būlī ng'wene ūkikala kū sī ya wingīji bo ng'wawe.

²¹ Alīyo a batūmami ba mu hekalu a bene bikalaga kū lūgūlū lwa Ofeli; a bataale babo baalī Ziha na Gishipa.

²² Ū ntaale wa Balawī abo baalī mu Yelusalemu witanagwa Uzi ng'wana Bani, ng'witūnja o ng'wa Hashabi, ng'witūnja o ng'wa Matania, ng'witūnja o ng'wa Mika, ng'witūnja o ng'wa Asafu. A banhū benaba baalī ba shibyalīlwe sha bīmbi, abo baalī balang'hani ba milīmo ya mu numba ya ng'wa Mulungu.

²³ Nīyo shalīho shilagīlo sha ntemi kūlwa nguno yabo, gīkī a bīmbi babize na ngabo gwabo gwa būlī lūshikū gūmanīkile.

²⁴ Pesahiya ng'witūnja o ng'wa Meshazabeli ūmò wa banhū ba shibyalīlwe sha ng'wa Zeelà, ng'witūnja o ng'wa Yuda; walī ntūmījiwa wa ntemi ū mu mihayo yose īyo yalī ībigeleelilwe a banhū.

Magūngūli ga hanze ya Yelusalemu

²⁵ Ī mihayo ya magūngūli, na a malaale ga kwene, bamò ba banhū ba mu Būyudaya bikalaga Kiliasi-alaba na mu magūngūli ga kwenūko, bangī Diboni na magūngūli gaamo, bangī Yekabuzeeli na a magūngūli gaamo,

²⁶ na Yeshua, Molada, na Besi-peleti,

²⁷ Hazali-shua, Beli-sheba na a magūngūli gaamo.

²⁸ Bangī baalī Zikilagi, Mekona hamò na a magūngūli gaamo,

²⁹ na Eni-limoni, Zola, Yalimusi,

³⁰ Zona, Adulamu, na a magūngūli gaamo, na Lakishi na a malaale gaamo, na Azeka hamò na a magūngūli gaamo. Hūna lūūlū būbiza bigasha ū mu mhandī jenījo, kwandīja Beli-sheba kūshisha kū longa lwa Hinomu.

³¹ A banhū ba lūganda lwa ng'wa Benjamini a ba kūfuma Geba bikalaga Mikimashi, Aiya, Beeseli, na a magūngūli gaamo.

³² Bangī Anasosi, Nobu, Anania,

³³ Hazoli, Lama, na Gitaimu,

³⁴ Hadidi, Zeboimu, Nebalati,

³⁵ Lodi na Ono, na kū longa lwa batūmami ba milīmo.

³⁶ Magele gamò a ga Balawī ba mu Būyudaya gakasangījiwa mu lūganda lwa ng'wa Benjamini.