Nehemia 10 - Bibilia Ilagano Lya Kale 2015

¹ Abo bakatūūla ī meng'ho jabo baalī aba, Nehemia, ūyo walī nsugi; ng'witūnja o ng'wa Hakalia, na Zedekia,

² Selaya, Azalia, Yelemia,

³ Pashuli, Amalia, Malikīya,

⁴ Hatushi, Shebania, Maluki,

⁵ Halimu, Meledosi, Obadia,

⁶ Danyeli, Ginesoni, Baluki,

⁷ Meshulamu, Abiya, Mijamini,

⁸ Maazia, Biligai, na Shemaya. A benaba baalī bagabīji.

⁹ A Balawī baalī, Yeshua, ng'witūnja o ng'wa Azania, Binui ūmò wa bitūnja ba ng'wa Henadadi, Kadimieli

¹⁰ na bichabo, ba Shebania, Hodia, Kelita, Pelaya, Hanaani,

¹¹ Mika, Lehobu, Hashabia,

¹² Zakuli, Shelebia, Shebania,

¹³ Hosia, Bani, na Beninu.

¹⁴ Batongeeji ba banhū baalī, Paloshi, Pahashi-moabu, Elamu, Zatu, Bani

¹⁵ Buni, Zigadi, Bebai,

¹⁶ Adoniya, Bigivai, Adini,

¹⁷ Ateeli, Hezekia, Azuli,

¹⁸ Hodia, Hashumu, Bezai,

¹⁹ Halifu, Asosi, Nebai,

²⁰ Magipiashi, Meshulamu, Hezili,

²¹ Meshezabeli, Zadoki, Yadua,

²² Pelatia, Hanaani, Anania,

²³ Hoshea, Hanania, Hashubu,

²⁴ Haloheshi, Piliha, Shobeki,

²⁵ Lehumu, Hashabuna, Maaseya,

²⁶ Ahiya, Hanaani, Anani,

²⁷ Maluki, Halimu, na Baana.

²⁸ “A banhū a bangī, a bagabīji, Balawī, na a balang'hani ba ha mibita, bīmbi, batūmami ba mu hekalu, na a bose abo bikomanya ū kū banhū ba sī jenīji kūlwa kūlondeela shilagīlo sha ng'wa Mulungu, pye na a bake babo, na bitūnja babo a bose, na a bashīke babo abo badūgije kwitegeleja mihayo,

²⁹ a bose ī haha balī hamò na a baana ba ng'wabo, a batongeeji. Pye balitūūla ha sīlīlī y'izumo na kwiyilahīja gīkī bakūshilondeela ī shilagīlo sha ng'wa Mulungu, īsho binhwa mu nzīla ya ng'wa Musa ū ntūmami o ng'wa Mulungu. Na gīkī bakūgalondeela mu welwa ng'holò pye a malange ga ng'wa SEEBA Mulungu wise, na a kaīle, na a kahelele kakwe.

³⁰ Tūliyilahīja bise benekīlī, yaya ū kūbinha a bashīke bise ū kū banhū ba mu sī yenīyī gīkī babatoole, yaya nūūlū ū kūbasola a bashīke babo gīkī tūbatooje a bitūnja bise.

³¹ Nīyo hangī a banhū ba mu sī yenīyī ūlū benha ha lūshiku lwa sabato shikolo shabo nūūlū shilīwa kwiza kūjinja, yaya ū kūbagūlīla a ha sabato nūūlū mu lūshikū lwa shigukulu shingī shose shose. Hama būlī ng'waka gwa mpungatī tūkūyūgaleka a malaale gise ū kūgalīma, na a banhū tūkūyūbalekeja a magasa.

³² Twihelelaga bise benekīlī mhayo gwa kūyūfunya gulamu itanò ja feza būlī ng'waka, kūlwa kūgunanha milīmo ya numba ya ng'wa Mulungu wise,

³³ kūpandīka migatī ya kūtūūlwa kū būtongi bo ng'wa Mulungu, shitambò sha būlī lūshikū sha būsu na sha kūpemvwa; shakwinha sha kūfunyiwa mu shikū ja sabato, shigukulu sha ng'weji mpya, na mu shikū ja shigukulu īsho shihelilwe; kūlwa shakwinha sheela, kūlwa shakwinha sha shibi nguno ya kūtūūla isangī kūlwa Baisilaeli; na kūlwa milīmo yose ī ya mu numba ya ng'wa Mulungu wise.

³⁴ Nīyo hangī a bise bagabīji, na a Balawī, na a banhū a bangī, twihelelaga ndīīma, twitūlīgīja mbale kūlondeela kaya ja bakūlūgenji bise; tūbone ūmo jikūyenhela ī ng'hwi ū kū numba ya ng'wa Mulungu wise, kūlenganīla na a kahelele ka būlī ng'waka ako katūūlilwe, kūlwa kūpemba ha ng'walīlo go ng'wa SEEBA Mulungu wise, gīt'ūmo gwandīkilwe mu shilagīlo.

³⁵ Na hangī twihelelaga bise benekīlī mhayo gwa kūyenha ū kū numba ya ng'wa SEEBA būlī ng'waka a matwajo ga kwandya ga shikolo īsho tūkalīmaga, na a ga mitī ya shisuumo ī yose.

³⁶ Ūmo handīkīlilwe mu shilagīlo, a bitūnja bise a babyalwa ba kwandya tūkūyūbenha kū numba ya ng'wa Mulungu wise, ū kū bagabīji abo bakatūmamaga koi; pyī nī mbyalwa ja kwandya ja ng'ombe, nī ja madaale ga mbūli na a ga ng'holo.

³⁷ Hama ū būsu wise ūbo būkabizaga bo kwandya kūshiwa, tūkūyūwenha ū mu chumba sha kūbīkīla shikolo īsho shilī mu numba ya ng'wa Mulungu wise, twabūtūūla ng'wenūmo kūlwa nguno ya bagabīji; shabiza shitambò shise sha būsu. Tūkūyenha na a matwajo ga mitī yise ī yose, nī divai yise ī mhya, na a maguta. Nīyo tūkūyenha ī zaka yise kūlwa nguno ya Balawī, nguno a Balawī hū bene abo bigeleelilwe kūsola zaka kūfuma ū kū mizengo yise yose ī ya banhū ba milīmo ya mu malaale.

³⁸ Ngabīji wa shibyalīlwe sha ng'wa Alooni akūbiza hamò nabo a Balawī ū ng'wikanza lya kūjanukūla ī zaka; nabo a Balawī shibigelile kwenha īmò ya ng'wikūmi ya kūfuma ū mu zaka jenījo, kū numba ya ng'wa Mulungu ū mu chumba sha kūbīkīla shikolo.

³⁹ A Baisilaeli hamò na a Balawī shibigelile kwenha ū būsoogi wabo ū mu chumba sha kūbīkīla shikolo, ūko shikabīkagwa ī shikolo, ūko bakikalaga a bagabīji ūlū balī na lūdīīma, na a balang'hani ba ha mibita, na a bīmbi; bayenha būsīga nī shilīwa ī shingī, nī divai mhya, na maguta. Tūtīlekanīja ī numba ya ng'wa Mulungu wise.”