Nahumu 1 - Bibilia Ilagano Lya Kale 2015

¹ Ū gwenūyū mhayo ūyo gūkahangīlwa nzengo gwa Ninawi; shitabo sha mihayo ya koolekejiwa kwa ng'wa Nahumu muna Elikoshi.

Seeba kwīpelanīla Ninawi

² Ū SEEBA alī Mulungu wa wilu, hangī maji wa shiilī; ū SEEBA akamalaga shiilī, nīyo hangī mpelanu. Ū SEEBA akabamalīlaga shiilī a bilwisha bakwe, na ndimīīji wa būpelanu ū kū banishi bakwe.

³ Ū SEEBA atī ng'wangū ū kūpelana, hangī alī na būdūla būtaale; ū SEEBA atalekaga kūng'winha nsango ū ng'hūbi. Ī nzīla yakwe īlī mu nshūūlūlū na nyaga gwa nsoke, a malunde galī lūbuubu lwa magūlū gakwe.

⁴ Akahamaga nyanza yūūma; nī myongo ī yose akīyūūmīchaga kūlū kūlū. Ī Bashani yūūmile kūlū nī Kalimeli; ū bonji wa Lebanoni būlīnyaala.

⁵ Ngūlū nhaale na ndo jikūtinginaga na kwaaba kūlwa nguno yakwe. Ī sī īkūdetemaga ū kū būtongi bokwe, alichene, ī sī na a bikaji baamo pye a bose.

⁶ Nani adūgije kūwiyūmīlīja ū būdaki bokwe? Nani ū wa kūwīmīla ū būpelanu bokwe? Ū būpelanu bokwe būkwidīkaga gītī moto, nī shiganga shilīyūtandagūka ū kū būtongi bokwe.

⁷ Ū SEEBA alī wawiza no, al'ipandī lya kūpeelela mu makanza ga makoye. Akabagunaga abo bansanije,

⁸ alīyo ī Ninawi akwītūmīla ihūūma lya kūkaamaaja; a banishi bakwe akūbakūūbīlīja bajimīīlīle mu giiti.

⁹ Īyo bakūlomanaga kūlwa kwilwisha nang'hwe ū SEEBA, akwīpyagūla pyī ī yose īshile; makoye gatūshokeela kwilonga hangī.

¹⁰ Bakwigwasanya mu masaka ga ming'hwa, na bakūleewa divai yabo; alichene, bakūbaka gītī mapalala mūūmu.

¹¹ Bebe Ninawi, ū mulī bebe wilongile ūmò akūng'helelaga yabūbi ū SEEBA; akūfunyaga būganikīji wa malofu.

¹² Ū SEEBA alīhaya gīkī, “Nūūlū īkī balī bingī nguno balī na bichabo, bakūhūlūlwa bashile. Ū bebe Yuda nūūlū īkī naakūluhya, natongeja kūkūluhya hangī.

¹³ Ī haha nakūlībīnzagūla ī lijoki lyabo lyīnge ū mu nhingo yako, nī nhendele jako nakūjitīnagūla nakwīngīje.”

¹⁴ Ū Seeba wamalile kūlagīja kūlwa nguno yako ū bebe Ninawi: “Ūtūbiza na bingīji ba kūlīlang'hana Ī lina lyako. Ī shiikolanījo sha kūpūnza nī shiikolile sha kūsula īsho shilī mu hekalu ya bamulungu bako nakūshikenaagūla. Ī shigila shako nakūshisīmba, nguno ūlī wa malofu no.”

¹⁵ Ponyagi miso kū ngūlū mulole; magūlū ga ng'wenhi wa ng'hūlū jawiza, nkumūcha wa mihayo ya mhola! Ee Yuda, yegelaga shigukulu shako, ūshikīlīje shilahīlo shako. A babūbi batūkūdumīla hangī; bakūyagajiwa pye gete.