Mika 6 - Bibilia Ilagano Lya Kale 2015

SEEBA koolecha būhūbi wa Baisilaeli

¹ Degelekagi ūmo alīhayīla ū SEEBA: Īmīīlaga, ibūūlage kū būtongi bo ngūlū ī nhaale nī ndo, leka jiigwe ūmo ūlīhayīla.

² Bing'we ngūlū, igwagi ūmo alīmuwīlīla ū SEEBA; igwagi bing'we misingi ya sī ya kūfuma kale ya welelo bose. Nguno ū Seeba alī na mhayo ū kū banhū bakwe; alīboolecha ū būhūbi wa Baisilaeli.

³ Bing'we banhū bane, naamukenya mu mhayo kī? Naamusedeecha mu mbika kī? Nishokejagi.

⁴ Ū nene nakang'wenha kūfuma Misili, nūng'wīnja mu sī ya būsese. Musa h'ūyo nakantūma kūmutongeela, walīho na Alooni hamò na Miliamu.

⁵ Banhū bane, wizūkagwi ū būganikīji bo ng'wa Balaka ū ntemi wa Moabu; nū mumo akashokeja ū Balaamu ng'witūnja o ng'wa Beoli. Lwizūkagwi nū lūgendo lwing'we lwa kūfuma Shitimu kūja Giligali, hū mukūwitegeleja ū būtūngīlīja wa shītīle sha ng'wa Seeba.

⁶ Nenhe kī ūlū naliza kū būtongi bo ng'wa Seeba, ūlū nalīnamya ū Mulungu wa higūlya? Nize ū kū būtongi bokwe nalī na shitambò sha kūpemvwa, nalī na ndama ja ng'waka gūmò?

⁷ Ū Seeba akūyejiwa mashihūmbī ga ng'ondi ja ng'holo, nūūlū shihūmbī ikūmi sha myongo ya maguta? Nafunye myalwa wane wa kwandya kūlwa būkenaagūji wane, itwajo lya kūfuma mu mīlī gwane kūlwa shibi sha ng'holò yane?

⁸ Ee, bebe munhū, ū ng'wene akoolekegije ī yawiza. Ū bebe, numho kī īsho alīkūtonda ū SEEBA, ūlū ītī kwīta mu būtūngīlīja na kūyega mu kūchīla shigongo, na kūbiza ng'widohya kūlī Mulungu wako?

Būhūbi wa Baisilaeli na nsango gwabo

⁹ Bing'we degelekagi! Ū SEEBA alīgwitana ū nzengo (nīyo ū kūlyogoha ī lina lyako gūlī mhayo gwa masala). Gwigwagi ū nang'ha, nū yūyo agūtūūlile gūbize ho.

¹⁰ Bing'we ba numba ya malofu, muliganika ū nene nakūjīība ī sabo jing'we ja būnyeecha ījo ng'wibīkīja, nī ngele j'izumo ījo mukatūmamīlaga kūhūnga banhū?

¹¹ Ū nene nakūnekeja ūyo akatūmamīlaga ngelekelo ja būnyeecha, ūyo alī na fuko gwa mapimīlo ga nyalomolomo?

¹² A basabi baamo biboneeji no; a banhū pye balomolomo, ī ndīmi jabo jimanīīlile kūlemba.

¹³ H'īchene nandije kūmukenaagūla, namumale kūlwa shibi shing'we.

¹⁴ Ū kūlya mukūlya alīyo mutigeja; Ī nda jing'we jikongeja kūtuuba. Ū kūbīka mukūbīka alīyo shitikala; Īsho mulībīkaga nakūshifunya shije mu būlūgū.

¹⁵ Ū kūbība mukūbība alīyo mutūgesa; a maguta ga mizeituni mukūkama alīyo mutūgatūmamīla, nī mizabibu mukūkama alīyo ī divai yaho mutīng'wa.

¹⁶ A bing'we mukashimīzīlaga mu shilagīlo sha ng'wa Omuli, na mu shītīle shose sha numba ya ng'wa Ahabu; hama mukalondeelaga kahelele kabo. Alilūūlū, nakūng'wenhela būkenaagūji n'ibengwe ū kū banhū bing'we; mukūyūsondagūlwa hose pyī ū mu mahanga.