Mika 5 - Bibilia Ilagano Lya Kale 2015

Kwisagījiwa Nsugi kūfuma Betelehemu

¹ Bebe nzengo gwa mabità, gakobyage a mabità gako, nguno ī haha tūgobanījiwe. Ū nsugi wa Isilaeli bakūntūla nang'ha h'itama.

² Ee Betelehemu ya Efulata, ahene ūlī ndo ū mu basugi ba Yuda, alīyo ū mulī bebe akwilonga nsugi wa kūbasuga a Baisilaeli kūlwa nguno yane; ū wei alīho kwīngīīla kale na kale, wa shikū ja welelo na welelo.

³ Hūna lūūlū ī Isilaeli īkūlekwa, kūshisha līshike ī likanza lya kūbyala kwakwe ūyo alī nda, na a baana ba ng'wawe bize kwisangīja na a Baisilaeli.

⁴ Akwīmīīla alīdīīme ī lidaale lyakwe mu nguzu ja ng'wa SEEBA, mu būdūla bo lina lya ng'wa SEEBA Mulungu wakwe. Bakwikala mu mhola, nguno ū būtaale bokwe būkūshika kū ngelelo ya sī.

Būkwilonga būpīji na nsango

⁵ Ū wei akūbiza mhola yabo. A Baashulu ūlū biza kwīdumīla Ī sī yise, gīkī baje bakūjidimaga ī ng'hambī jise ja bashilikale, tūkūbabūūkīja badīīmi mpungatī, na batongeeji banaane ba banhū.

⁶ Ī sī ya Ashulu bakwīsuga bo līlūshū, ī sī ya ng'wa Nimulodi bakwīsuga bo shilanga. Ū SEEBA akūtūpīja ū kū Baashulu ūlū bīdumīla ī sī yise hose pyī ū mu mbīmbī jise.

⁷ A ba būshiigo wa babyalwa ba ng'wa Yakobo abo basambaalile mu banhū bingī bakūbiza gītī lūme lwa kūfuma kūlī SEEBA, gītī iswaalala kū maswa managana, Īlo lītalindaga kūlagīlwa na munhū, nūūlū lītagataga kūlwa kūhang'wa na munhū.

⁸ A ba būshiigo wa babyalwa ba ng'wa Yakobo bakwiguulanya mu mahanga, mu banhū bingī, bakūbiza gītī shimba mu ndimu ja mu mapoolu, gītī shimba songi mu madaale ga ng'holo, ūmo īkatandagūlīlaga būlī kwene ūko yūgalūkīla, na atīho wa kūgunanha.

⁹ Ū nkono gwing'we gūkūbiza higūlya ya banishi bing'we; pye a baluhya bing'we bakūkenaagūlwa.

¹⁰ Ū SEEBA alīhaya gīkī, “Ū mu lūshikū lwenūlo nakūjibūlaga ī falasa jing'we jing'wīnge, na a magogoteni ging'we ga būlūgū nakūgabīnzagūla.

¹¹ Ī mizengo ya mu sī ying'we nakwīkenaagūla, nī ng'hambī jing'we ja bashilikale nakūjikambagūla.

¹² Ū būlogi wing'we nabo nakūbūkenaagūla, mukooya ū kūchemba ī ngoko.

¹³ Ī shigīmbo shing'we sha kūpūnza nakūshikenaagūla, na a mawe ging'we ga kūlamiwa nakūng'wīngīja; mutikala mukwinamaga kū būtongi bo milīmo ya makono ging'we.

¹⁴ Ī ng'hīngī jing'we ja Maashela nakūjidubbūla najīnje ū mu bing'we, nī mizengo ying'we nīsambaagūle.

¹⁵ A mahanga ayo galemile kūniigwa nakūgamalīla shiilī mu būpelanu na būdaki.”