Mika 4 - Bibilia Ilagano Lya Kale 2015

Lūgūlū lwa ng'wa SEEBA

¹ Ū mu shikū ja kū būkalīkījo ū lūgūlū lwa hekalu ya ng'wa SEEBA lūkūbiza lūtaale no, lūkūgūngūhiwa kūkīla ngūlū jose, nhaale na ndo; hūna a banhū bakūhūūma bajile koi.

² Mahanga mingī gakwiza kūnū gakwiwīlaga, “Nzūgi tūje tūkalinhe mu lūgūlū lwa ng'wa SEEBA, kū numba ya ng'wa Mulungu o ng'wa Yakobo. Akūtūlanga ī nzīla jakwe, tūbize na būdūla wa kūshimīzīla mu katongeelele kakwe.” Ī shilagīlo shikūfuma mu Sayuni, ū mhayo go ng'wa SEEBA gūkūfuma Yelusalemu.

³ Mahanga mingī akūgalamula, na kūyangūla wilemeelwa wa mahanga ga nguzu hose pyī ūko galī. Ī shū jabo bakūjisula jibize magembe na a machimu gabo gabize mihoolo. Lītūbiza ho ihanga lya kūbūūcha shilanga kūjūdumīla ihanga līngī, bakooya kwilanga mihayo ya būlūgū.

⁴ Būlī munhū akūlembeela mu mbeho ya nzabibu gwakwe, na mu mbeho ya ntiini gwakwe; na atilonga wa kūbogohya, nguno ū SEEBA wa Būdūla bose hū ng'wene alīhaya.

⁵ A mahanga a gose ni gashimīzīlage mu lina lya bamulungu baago; a bise nise tūkūshimīzīla mu lina lya ng'wa Seeba Mulungu wise welelo na welelo.

Kahelele ka ng'wa SEEBA

⁶ Ū Seeba alīhaya gīkī, “Ū mu lūshikū lwenūlo nakūbabilinga a balemehazu; nabenhe pye abo balī kū būsaamiwa, abo nabapīnīhaja.

⁷ A balemehazu h'abo nakūbīīta babize būshiigo wa kūpīla, abo baasaamiwa bakūbiza ihanga lya nguzu. Ū SEEBA akūbiza nsugi wabo ū mu lūgūlū lwa Sayuni, kūfuma lūshikū lwenūlo na kūshisha welelo bose.

⁸ Hūna ū bebe lūgūlū lwa Sayuni, ng'hambī ya balang'hani ba ng'holo; īyo wisagījiwa īkūshikīīla. Ūkūshokejiwa ū būtaale wako, ū būtemi būkwiza Yelusalemu hangī.”

⁹ Nibūlī ūlīhūlūūla gīko ī haha? Ūtī na ntemi nūūlū wa kūkūganikīla, kūshisha nose ūlīminyiwa būsūngū gītī nkīma ng'wikanza lya kūbyala?

¹⁰ Bebe Sayuni līlaga ng'hana, nīyo yoganyaga gītī nkīma alī ng'wikanza lya kūbyala, nguno ī haha shikwigelile ūfume ū mu nzengo, ūkūja kū matogolo ūkatūūle ng'hambī kwenūko. Ūkūja Babuloni, h'ūko ū kūjūpīlīla; ū SEEBA akūkūpīgīja kwenūko akwīnje ū mu makono ga banisha bako.

¹¹ Alīyo ī haha mahanga mingī gakwitingije. Gakwiwīlaga, “Leki atowe ū Sayuni a miso gise gabone galūmbe!”

¹² Gwike a maganiko ga ng'wa SEEBA batagamanile; batīdeebile īyo ayīhelile ūyo akababilingaga gītī būsīga bo kūtūla ha lūbūūga.

¹³ “Bebe Sayuni būkaga ūtūle, nguno nakūkwinha mapembe ga chūma; nakūkwinha chūūga ja shaba ūtobagūle mahanga mingī.” Īsho baapandīka mu wiboneeji ūkūshikomanya kūlwa ng'wa SEEBA, Ī sabo jabo jikūbiza ja ng'wa SEEBA wa sī yose.