Matayo 9 - Bibilia Ilagano Lya Kale 2015

Nguzu ja kwenja shibi

¹ Na ng'hana ū Yesu wingīla mu lyato, ūkīla kū nkīlo ūja kū nzengo go ng'wawe.

² Kūhayimanīla bang'wenhela munhū wa būsaatu wa mangwisha alaalile ha shilago. Ū Yesu aho wabona ū kūzunya kwabo ūng'wīla ū nsaatu, “Bebe ng'wana, timbyaga ng'holò, wakūlīlagwa ī shibi shako.”

³ Bamò ba bandiki ba shilagīlo bandya kwiwīla gīkī, “Bing'we ū munhū ng'wenūyū ngimu!”

⁴ Ū Yesu ūgadeeba a maganiko gabo, hūna ūbawīla gīkī, “Nibūlī muliganika mihayo mibi gīko ū mu ng'holò jing'we?

⁵ Ī gīsī, ūmhayo nogu ni gūlī ginehe? Ū gwa kūhaya gīkī, ‘Wa kūlīlagwa ī shibi shako,’ nūūlū hamo ū gwa kūhaya gīkī, ‘Būūkaga ūshimīze?’

⁶ Ali lūūlū, shiigelile mumane gīkī ū Ng'wana wa Munhū alī nabo ū būdūla bo kūkūlīlwa shibi ū mu sī.” Hūna ūng'wīla ū nsaatu gīkī, “Būūkaga ūshisole ī shilago shako ūje kaya.”

⁷ Ng'hana ūbūūka, ūja kaya!

⁸ A mabita ga banhū aho gabona gīko gogoha no, gūnkūmīlīja Seeba.

Kwitanwa kwa ng'wa Matayo

⁹ Ū Yesu wīnga a henaho, aho ajile ūmona munhū ūmò, witanagwa Matayo; walī igashije ng'witobisījo lya goodi, ūng'wīla, “Nilondeelage.” Ng'hana ūbūūka ūnondeela.

¹⁰ Bahayūshika mu kaya, ū Yesu wigasha kūlya shilīwa. Na batobisha ba goodi hamò na banhū ba shibi bingī bakigasha kūlya nang'hwe, na a bahemba bakwe.

¹¹ Alīyo a Bafalisayo aho babona gīko, būbawīla a bahemba bakwe gīkī, “Nibūlī ū Nangi wing'we akūlyaga na batobisha ba goodi, būyaga na banhū ba shibi?”

¹² Ū Yesu aho wigwa ūhaya, “A bapanga batī na nguno na mfumu, alīyo a basaatu h'abo bakankoobaga.

¹³ Na lūūlū, jagi mukilange a makūlū ga mhayo ūyū, gīkī, ‘Natogilwe shigongo, ītī shitambo;’ nguno ū nene natizile kwitana batūngīlīja, alīyo ba shibi!”

Shīmīle sha kūfunga

¹⁴ A bahemba ba ng'wa Yohana bakīīta biza ū kūlī Yesu, būmūja balīhaya gīkī, “Nibūlī a bise na a bahemba ba Bafalisayo tūkafungaga, alīyo a bahemba bako batafungaga?”

¹⁵ Nang'hwe ū Yesu ūbawīla gīkī, “Ū ntooji ūlū ataalī hamò nabo a bageni ba ha būkwīlīma, bakūpīnīhajiwa kī hangī? Jikūshika ī shikū ja kwīngījiwa ū ntooji; a henaho hū bakūyūfunga.

¹⁶ Atīho ūyo akasumīlījaga shilaka sha ng'wenda mpya ha ng'wenda nkūlūkūlū; nguno ūlū wīta gīko shikūgūtandūla ū ng'wenda ū nkūlūkūlū, gūkenaagūke kūtinda.

¹⁷ Na hangī atīho ūyo akabīkaga mvinya mhya ng'wibīkīlo ikūlūkūlū, ūlū wīta gīko līkūtandūka ī libīkīlo līkenaagūke, nī mvinya yidīke ha sī! Alīyo ī mvinya ī mhya bakībīkaga ng'wibīkīlo ipya; na lūūlū, ū mu gīko shikwikala mhola ī shose.”

Būdūla bo kūpīja na kūjūūcha

¹⁸ Aho ataalī ūbawīla gīko, kwimanīla wiza ngosha ūmò nsugi; ūshika ūntugīja mazwi mu kwidohya, kūnū alīng'wīla gīkī, “Kashīke kane kazumalīka ī haha īyī, gwike nzūgū ūkatūūlīle nkono gwako kakūpīla dūhū!”

¹⁹ Ng'hana ū Yesu na a bahemba bakwe būbūūka būnkūūbīja ū munhū ng'wenūyo.

²⁰ Nkīma nebe wakoyiagwa būsaatu bo ngeji, nose ūmala myaka ikūmi n'ībīlī; ūng'wizīīla ū Yesu kū numa, ūshika ūkuumya h'abuhunilo bo ng'wenda gokwe.

²¹ Nguno wiwīlaga gīkī, “Nūūlū nūkuumya shizwalo shakwe dūhū nakūpīla!”

²² Ū Yesu aho wagalūka ūng'wīla, “Īnjaga ū booba nshīke wane, ū kūzunya kwako kwakūpījaga.” Ū nkīma ng'wenūyo ūpīla kūfuma ikanza lyenīlo.

²³ Hūna ū Yesu ūshikīīla a ha kaya ya nsugi ng'wenūyo, ūsanga ibita lya banhū bingī balīfuutela bakūlījiagwa būpīna; na bafuuji ba mhembe ja ng'hūngū bakūjifuulaga.

²⁴ Ūbawīla gīkī, “Īngagi a henaha, ū ng'wanikī atachile, alaalile dūhū.” Būnseka nyachilū chilū kūlwa kūndalaha!

²⁵ Na lūūlū aho lyafunyiwa hanze ī libita, ū wei wingīla ūūkandima nkono ū ng'wanikī, ūbūūka!

²⁶ Ū mhayo gwenūyo gūng'winha kūkumūka ū Yesu, pye a hose ū mu sī yenīyo.

Kūpīja babboku babīlī

²⁷ Ha numa ya yenīyo, ū Yesu wīnga a henaho ūja ipandī līngī. Babboku babīlī būnondeela, kūnū balīndayīīla n'ilaka lya higūlya balīhaya gīkī, “Ng'wana wa ng'wa Daūdi, tūchīlage shigongo!”

²⁸ Ūūkingīla mu numba, alīyo nū ng'wene būnondeela; nang'hwe ūbabūja, “Mulīzunya gīkī nadūgije kūng'wītīla ū mhayo gwenūyū?” Būnshokeja, “Alichene Seeba!”

²⁹ Hūna ūbakuumya ū kū miso gabo; ūbawīla, “N'ībizage gīt'ūmo kūzunya kwing'we kūlī.”

³⁰ Na ng'hana a miso gabo gūloleecha, bandya kūbona. Ū Yesu ūbahūgūla ūbawīla gīkī, “Ali lūūlū, lang'hanagi atizūmana munhū ose ose.”

³¹ Alīyo aho bafuma ī hanze, haho na haho bandya kūja bakūnkumūchaga ū mu sī yenīyo.

Kūpījiwa kwa ng'wa shimuumu

³² Kwīnga dūhū a benabo, na bangī būng'wenhela ū Yesu munhū ūmò shimuumu, nīyo walī na n'isamva.

³³ Aho wīngījiwa īlisamva ūdūla ū kūyomba. A mabita ga banhū gūyūkumya galīhaya gīkī, “Ū mhayo gwa mbika yenīyī gūtaalī kwilonga na hado yaya ū mu Isiraeli!”

³⁴ Alīyo a Bafalisayo a bene būyūhaya, “Ū ng'wenūyū akūgapeejaga a masamva mu būdūla w'itaale lya masamva!”

Yesu na batūng'wa

³⁵ Hūna lūūlū ū Yesu wandya kūja hose hose ū mu mizengo nū kū machalo. Wajaga akūlangaga ū mu masinagogi gabo na kūlomeela Ng'hūlū Jawiza ja būtemi, hamò na kūpīja būlī mbika ja būsaatu nūūlū būlemehazu.

³⁶ Aho wagabona a mabita ga banhū ūbasaatwa, nguno baalī bazongu zongu, na basalang'hanile gītī ng'holo jitī na ndīīmi!

³⁷ Ūbawīla a bahemba bakwe gīkī, “Ū nīmo gw'igesa gūlī ntaale no, alīyo a batūmami bagehu.

³⁸ Nombagi ū Seeba wa magesa atūme batūmami ū kū nīmo gokwe.”