Matayo 3 - Bibilia Ilagano Lya Kale 2015

Kūbatījiwa na kūgeng'wa

¹ Ū mu shikū jenījo Yohana Matīīja akiza kū matogolo ga Būyudaya; ūyūlomeela

² alīhaya, “Galūkagi nguno ū būtemi bo ng'wigūlū wegeelaga.”

³ Ū ng'wenūyo hū ng'wene ūyo ahayiwe na ng'hangi Isaya, gīkī, “Ilaka lya munhū akūhamukaga mu matogolo, ‘Beeja beejagi ikūūwa lya ng'wa Seeba, jigoloolagi ī nzīla jakwe.’”

⁴ Ī shizwalo sha ng'wa Yohana shalī sha booya bo ngamīla, ū mu nkīmbīlī witungaga ngwasho gwa nkoba, ī shilīwa shakwe shalī njige na būūkī bo mu matogolo.

⁵ Banhū bingī bakayiza ūko walī; bafumaga Yelusalemu na hose hose ū mu sī ya Būyudaya, nū mu sī pyī ī ja kū mbalama ya mongo gwa Yolodani.

⁶ Būlī bene bashikaga batambūūla ī shibi shabo wababatīīja ū mu mongo gwenūyo.

⁷ Gwike aho wabona Bafalisayo bingī na Basadukayo baliza ū kū būbatīīja bokwe; ūbawīla, “Bing'we būbyīle wa nzoka, nani wamuhūgūlile gīkī mugūpeele ū nsango ūyo gūliza?

⁸ Hūna lūūlū, twajagi matwajo kūlwa koolecha būkaanīji bo kūgalūka kwing'we.

⁹ Mutiganikage mukwiwīlaga gīkī, ‘Tūlī ba nkulugenji wise Abulahamu.’ Nguno nalīmuwīla nūūlū kūfuma mu mawe gīt'aya, ū Mulungu adūgije kūng'wenhela baana ū Abulahamu.

¹⁰ Nīyo ī haha īlīho mbasa ītūūlilwe ng'hana ng'hana a ha matina ga mitī. Hū kūhaya būlī ntī ūyo gutafunyaga matwajo gawiza, gūkūbbutwa gūponyiwe mu moto.

¹¹ “Ū nene ng'hana nalīmubatīīja mu minzī kūlwa kūgalūka; alīyo a ha numa yane aliza ūyo anikīlile ū būdūla. Ū nene natigeleelilwe nūūlū ni kūmūūkīja shilatū shakwe, ū ng'wenūyo h'ūyo akūmubatīīja na Moyo Ng'wela, na moto.

¹² Ū lūhūngo lokwe alī nalo mu nkono gokwe wei ng'wenekīlī, hama ū lūbūūga lokwe akūlūpyagūla alweje lwele pe. Ū būsīga abūkuminge chiza abūtūūle ng'wibīkīlo lyakwe; alīyo a meela a gene ūgapemba mu moto gūtī gwa kūjima!”

Kūbatījiwa kwa ng'wa Yesu

¹³ Hūna ū Yesu wīnga ī Galilaya, ūja ūko walī ū Yohana, ū kū mongo gwa Yolodani, akabatījiwe.

¹⁴ Alīyo ū Yohana ūnemeja alīhaya, “Nibūlī ūliza kūlī nene, alīyo ū nene hū īnigeleelile ūnibatīīje ū bebe?”

¹⁵ Nang'hwe ū Yesu ūnshokeja ūng'wīla, “Nizunīlījage ī haha, nguno īlī yawiza tūbūshikīlīje ū būtūngīlīja ū bose.” Hūna ūnzunīlīja.

¹⁶ Ū Yesu aho wamala ū kūbatījiwa, haho na haho ūfuma ū mu minzī. Ū likanza lyenīlo lyūkundūka ī ligūlū, ūmona ū Moyo wa ng'wa Mulungu alika gītī ng'hūūlū, izile aho wale.

¹⁷ N'ilaka lyūfuma ū ng'wigūlū līlīhaya gīkī, “Ūyū ng'wene Ng'wana wane Ntogwa, ūyo aniyegije hataale no!”