Matayo 25 - Bibilia Ilagano Lya Kale 2015

Shigemeng'hejo sha banhya ikūmi

¹ “Hūna lūūlū, ū būtemi bo ng'wigūlū būkwikolanījiwa na banhya ikūmi, abo bakasola tala jabo būja kūng'wīma nzīla ntooji.

² A batanò babo baalī babbūūlī, alīyo a bangī a batanò būbiza bachagūku.

³ A babbūūlī bakasola ī tala jabo ahene, gwike a maguta a ga kongeja batasolile.

⁴ Alīyo a bachagūku, aho basola ī tala jabo būsola na maguta mu shiseme sha helegeko.

⁵ Ū ntooji akadīla ū kūshika, nose būtindwa tūlo pye a bose, būlaala.”

⁶ “Ū būjikū aho bohuumūlīja, kūhayimanīla yoge na mhūndū jazīlīng'hanya; banhū bandya kwiwīla, ‘Oshika ū ntooji, nsūng'wanhagi.’

⁷ Hūna lūūlū a banhya ikūmi benabo būgulumūka wangū wangū, bandya kūgūbeeja ū moto gwa tala jabo jibake chiza.

⁸ A babbūūlī būbawīla a bachagūku gīkī, ‘ī tala jise jilīlimalima jilīhaya kūjima, tongejagi nise a maguta ging'we.’

⁹ Nabo a bachagūku būbashokeja balīhaya gīkī, ‘Gatūtwigela a bise na a bing'we; jagi ū kū bajinja mukagūle ging'we ning'we.’

¹⁰ Aho balīja ūshika ū ntooji, abo baalī bamalīīlile bingīla nang'hwe ū mu numba ya būgeni, gūlugalwa ū nyango!

¹¹ “Ha numa ya henaho būshika na a banhya a bangī balīhaya, ‘Tūlugūlīlage nise baba!’

¹² Nang'hwe ūbashokeja alīhaya gīkī, ‘Nalīmuwīla gwa ng'hana natūmumanaga ū nene a bing'we!’

¹³ Na lūūlū, ikalagi nzūgūlū matū; nguno mutalūmanile ū lūshikū nūūlū ī likanza.”

Lūsumo lo basese na talanta

¹⁴ “Na hangī īkūbiza gītī munhū nebe ūyo akahaya kwīnga ha ng'wakwe, ūleka ogabanhya basese bakwe sabo jakwe.

¹⁵ Ūng'winha būlī ng'wene gīt'ūmo būlī ū būdūla bokwe; ūmò ūng'winha talanta itanò, ūngī ibīlī, ūngī īmò; hūna ūja ū wei.

¹⁶ Ūyo akasola talanta itanò haho na haho ūja ūūkandya kūjitūndanya ī sabo jenījo, jibyalana, ūpandīka talanta jingī itanò.

¹⁷ Nū yūyo akinhwa ibīlī wīta gīko, nang'hwe ūpandīka jingī ibīlī.

¹⁸ Lelo ūyo akasola īmò, ū ng'wene ūja ūūkasīmba ha sī, wīfukīīla henaho ī sabo ya ng'wa ise būgonzo.

¹⁹ “Aho jabīta shikū ningī wiza ū saabo būgonzo; ūshikīla kūbaloja a katūmamīle kabo.

²⁰ Ūyo walī wasola talanta itanò ūshika; wenha jingī itanò ūhaya, ‘Baba ūkaninha talanta itanò, naapandīkile jingī itanò jiiji.’

²¹ Ū ise būgonzo ūng'wīla, ‘Būgatū ū bebe ūlī nsese wawiza na ntūngīlīja. Īkī wabizile ng'wishigwa mu shigehu nakūkūtūūla higūlya ya shikolo shingī, ingīlaga mu būyegi bo ng'wa so būgonzo.’

²² Ūshika nū wa talanta ibīlī, nang'hwe ūhaya, ‘Baba ūkaninha talanta ibīlī, naapandīkile jingī ibīlī jiiji.’

²³ Nū ng'wene ūng'wīla ū ise būgonzo gīkī, ‘Būgatū; ūlī nsese wawiza na ntūngīlīja. Īkī wabizile ng'wishigwa mu shigehu nakūkūtūūla higūlya ya shikolo shingī, ingīlaga mu būyegi bo ng'wa so būgonzo.’

²⁴ Wahayūkiza ūyo olī opandīka talanta īmò, ū ng'wene ūshikīla kūhaya, ‘Baba nakūdeebile gīkī ū bebe ūlī munhū ngugu, hangī ūkagesaga nū kūko ūtabībile, hama ūkakumingījaga nū kūko ūtahambile.

²⁵ Hūna lūūlū nakogoha, nūja nūkīsīmbīla ha sī ī talanta yako nībisa; yīyī ūlīyībona ī sabo yako!’

²⁶ “Ū ise būgonzo ūnshokeja alīng'wīla gīkī, ‘Ū bebe ūlī nsese wabūbi, nīyo ūlī ng'oolo; gashinaga ūmanile gīkī nakagesaga nī shisho natashibībile, na gīkī nakakumingījaga kwīngīīla nū kūko natahambile!

²⁷ Ūlū chene yalī īkwigeleelilwe kwībīka kū basūlūja ī sabo yane, a ha kūshoka ni nayanukūla ī sabo yane nī mbyalanwa jaho.

²⁸ Ntaajagi ī talanta yenīyo mung'winhe ūyo alī najo ikūmi.

²⁹ Nguno ūyo alī nasho shingī akongejiwa na kūtinda ho, alīyo ūyo atī na shikolo akūtaajiwa nī shisho alī nasho!

³⁰ Ū nsese ūyo atī na ngofyoolo mponyagi kū giiti sha hanze ū ng'wene, ūko kūkūbiza kūlīla na kūshelanya mino.’”

Lūshikū lo kūlamulwa kwa banhū

³¹ “Hūna lūūlū, a ha kūshoka kwakwe ū Ng'wana wa Munhū, akwiza ng'wikūjo lyakwe hamò na bamalaika bakwe. Ūlū ūshika akwigasha h'isumbī lyakwe lya būtemi.

³² Hūna a banhū ba mahanga gose, bakwīmīīla kū būtongi bokwe. Nang'hwe akūbakomanya gīt'ūmo ndīīmi akakomanījaga ng'holo na mbūli.

³³ Ī ng'holo akūjitūūla kū nkono gwakwe gwa būlyo, ī mbūli kū lūmoso lokwe.

³⁴ Ha numa ya yenīyo, ū Ntemi akūbawīla abo balī kū nkono gwakwe gwa būlyo gīkī, ‘Nzūgi a bing'we, abo mulī na lubango ja ng'wa Baba. Ingīlagi ū mu būtemi ūbo mulonja longejiwe kūfuma ha kūseeng'wa kwa sī.

³⁵ Nguno naalī natuubile ng'ūninha shilīwa, na naalī nakolilwe nota ng'ūninha minzī nūng'wa, na hangī naalī ngeni ng'ūnanukūla.

³⁶ Hama naalī dūūhū ng'ūninha shizwalo, naalī nsaatu ng'wiza kūnigīsha, hangī naalī mu jeela, nū ng'wene ng'wiza kūnilola.’

³⁷ “Nabo a batūngīlīja bakūnshokeja balīhaya gīkī, ‘Seeba nanalī aho tūkakūbona ūtuubile tūkwinha shilīwa, nūūlū ūkolilwe nota tūkwinha minzī ga kūng'wa?

³⁸ Na hangī tūkakūbona nanalī ūlī ngeni tūkwanukūla, nūūlū ūlī dūūhū tūkwinha shizwalo?

³⁹ Hangī yalī nanalī aho tūkakūbona ūlī nsaatu, nūūlū ūlī mu jeela twiza kūkūlola?’

⁴⁰ Nang'hwe ū Ntemi akūbashokeja alīhaya, ‘Nalīmuwīla gwa ng'hana gīkī, ī yose īyo ng'wabīītīlaga a badūgū bane a bado bado aba, ng'wanīītīlaga nene.’

⁴¹ “Hama na a babo balī kū nkono gwakwe gwa lūmoso akūbawīla gīkī, ‘īngagi a henaha a bing'we nguno muzumilwe, jagi kū moto ūyo gūpembilwe kūlwa ng'wa Shetani na bamalaika bakwe.

⁴² Nguno aho naalī natuubile na nakolilwe nota, mutaninhile shilīwa nūūlū minzī ga kūng'wa.

⁴³ Naalī ngeni, nahene mutananukūlile, hangī naalī dūūhū mutaninhile shizwalo; naalī nsaatu, hangī naalī mu jeela, alīyo mutizile nūūlū kūnilola!’

⁴⁴ Nabo bakūnshokeja balīhaya gīkī, ‘Seeba nanalī tūkakūbona ūtuubile nūūlū ūkolilwe nota, nūūlū ūlī ngeni, nūūlū ūlī dūūhū, nūūlū ūlī nsaatu, nūūlū ūlī mu jeela; nise tūleka ū kūkūgunanha?’

⁴⁵ A henaho nang'hwe akūbashokeja alīhaya; ‘Nalīmuwīla gwa ng'hana gīkī, ūmo ng'walī mutang'wītīlile mhayo nūūlū ūmò wa bado bado aba, mutanīītīlile nene!’

⁴⁶ Hūna lūūlū a benabo bakūja mu nsango gwa būja na būja; a batūngīlīja nabo bakūja mu būpanga butashilaga.”