Matayo 24 - Bibilia Ilagano Lya Kale 2015

Kūkambagūlwa kwa hekalu

¹ Hūna ū Yesu ūfuma ū mu hekalu; aho alīja a bahemba bakwe būng'wegeela bayūng'oolekeja ūmo gaalī gazengelilwe a mabīndo gayo.

² Nang'hwe ūshosha ūhaya; “Angū mulīgabona pye a genaya? Nalīmuwīla gwa ng'hana gīkī, lītīho iwe a henaha īlo līkūlekwa higūlya y'iwe lichalyo, īlo lītūholomolelwa ha sī!”

Wandījo bo makoye

³ Hūna ūūkigasha mu lūgūlū lo mizeituni, a bahemba bakwe būng'wegeela hoi, balī boi dūhū. Būhaya gīkī, “Tūwīlage ī yenīyī īkūbiza ho nanalī; na hangī shikūbiza ho shimanīkījo kī ī sha kwiza kwako, nī sha koolecha kūshikīīla kw'ikanza?”

⁴ Ū Yesu ūshosha ūbawīla gīkī, “Ilang'hanagi munhū ose ose atizūmulemba lemba.

⁵ Nguno bingī bakūyiza mu lina lyane, balīhaya gīkī, ‘Ū nene hū nalī Kilisito!’ Nīyo bakūhūbya banhū bingī.

⁶ Hama mukwandya kūyigwa mabūlūgū na ng'hūlū ja mabūlūgū. Alīyo yaya ū kūfung'wa ng'holò, ī yenīyo shiigelile ībize ho; gwike ī ngelelo īkūbiza ītaalī ū kūshika.

⁷ Nguno būkūbiza ho wiyūbūkīji ha gatī y'ihanga n'ihanga, na būtemi kū būtemi. Jikūyūding'hima nyahīnga, na kwilonga nzala mu mapandī mingī.

⁸ Gwike pyī ī yenīyī īlī gītī wandījo wa kūlung'wa būsūngū dūhū.”

⁹ “Na mukūyūlodeelwa ng'wayūluhiwa na kūbūlagwa. Nīyo pye a mahanga gakūmukolwa kūlwa nguno ya lina lyane.

¹⁰ Hama bingī bakwipama, na bakūyilodeela kūlwa nguno ya kwikolwa benekīlī na benekīlī.

¹¹ Na bahangi bingī balomolomo bakwilonga, bayūbenheleja banhū bingī kwīnga ū mu ng'hana.

¹² Būtogwa bo banhū bingī būkūpola kūlwa nguno ya būgomi kongeja kūkwīla.

¹³ Alīyo ūyo wiyūmīlīja kūshisha kū ngelelo, akūpīla.

¹⁴ Nīyo ī Ng'hūlū ja būtemi jenīji shiigelile jilomeelwe pye a hose ū mu sī, wilonge būkaanīji kū mahanga gose; hūna lūūlū ī ngelelo īkūshika.”

Būluhi būtaale

¹⁵ “Ali lūūlū, ī sha malofu ī shikenaagūji īsho shihayiwe na ng'hangi Danyeli ūlū ng'ūshibona shīmīīla h'ipandī lyeela, ūyo alīsoma ni itegelejage,

¹⁶ a henaho abo balī mu sī ya Būyudaya ni bapeelelage kū ngūlū.

¹⁷ Ūyo ūsangwa alī kwigūlya ya numba, atizika gīkī asole shikolo kūfuma mu numba yakwe.

¹⁸ Nū yūyo alī kū malaale atizūshoka kū numa kūsola shizwalo shakwe.

¹⁹ Ū mu shikū jenījo bakūbiza mu makoye mataale no abo bakūsangwa balī nda, na a babo bakūbiza bakonhyaga.

²⁰ Lombagi ū kūpeela kwing'we kūtizūbiza mu shikū ja mbeho ya mu shiyaga, nūūlū ha sabato.

²¹ Nguno ū ng'wikanza lyenīlo būkūbiza ho būluhi būtaale no, ūbo būtaalī kwilonga kūfuma ha wandījo wa sī kūshisha haha; hama būtalabiza ho hangī na hado yaya!

²² Nīyo ūlū ni ītī kūgehiwa ī shikū jenījo, walī atīho wa kūpīla nūūlū ūmò, alīyo ī shikū jenījo jigehiwe kūlwa nguno ya basolwa.

²³ “Nose ūlū ose ose ūmuwīla gīkī, ‘Lolagi ūūy'aha ū Kilisito,’ nūūlū gīkī, ‘Alī kūūnū,’ yaya ū kūzunya.

²⁴ Nguno bakwilonga bakilisto balomolomo, na bahangi balomolomo; nīyo bakūyoolecha maleeba mataale na mihayo ya kūkamaaja, gīkī ūlū yūdūlīkana babahūmbūūle na a basolwa.

²⁵ Managi gīkī ū nene nalīmuhūgūla kūko ītaalī ū kwilonga ī yenīyo.

²⁶ Hū kūhaya gīkī nūūlū munhū ūmuwīla, ‘Lolagi ūūyo alī kū matogolo,’ yaya ū kūfuma; nūūlū gīkī, ‘Lolagi mu kaya alīmo wibisaga,’ mutizūzunya.

²⁷ Nguno īkūbiza gīt'ūmo lūlabi lūkalabījaga mu kīya, alīyo ū būng'weku boshika ng'weli. Nū kwiza kwa Ng'wana wa Munhū kūkūbiza gīko.

²⁸ Nguno aho gūlī mimba hū hene aho jikwikumingīla nī mbeshi.”

Kwiza kwa Ng'wana wa Munhū

²⁹ “Alīyo ū būluhi wa mu shikū jenījo ūlū būbīta, haho na haho ī līīmi līkwītīlwa giiti, nū ng'weji gūkoya ū kūfunya ū būpe wago. Nī sonda jikūyūmodagūka kūfuma ū kwilunde; pyī nū būdūla bo ng'wigūlū būkūtinginyiwa.

³⁰ Hūna lūūlū ū ng'wilunde shikūbonwa shimanīkījo sha Ng'wana wa Munhū. Pyī ī ng'anda ja banhū ba mu sī bakūlīla ng'hūngū; hama bakūmona ū Ng'wana wa Munhū alī mu malunde ga ng'wigūlū aliza, na būdūla n'ikūjo itaale.

³¹ Hūna akūtūma bamalaika bakwe n'ilaka itaale lya mhembe. Bakūja balībakuminga pye a basolwa bakwe kūfuma mhandī ine ja sī; kūfuma wandījo w'igūlū kūshisha kū ngelelo yalyo!”

Ilangīlagi kū ntini

³² “Ī haha ū mhayo gwenūyū gwilangīlagi kū ntini. A matambī ga ntī gwenūyo ūlū gandya kūsonga na kūfuluma madūūtū managana, mukamanaga gīkī gwegeelaga ū ng'waka.

³³ Nī mihayo yenīyī īlī gīko; ūlū ng'ūbona yandya kwilonga managi gīkī alī hihī, nūwe wegeelaga alī ha mita.

³⁴ Nalīmuwīla gwa ng'hana gīkī, ī shibyalīlwe īshi shitūbīta aho ītaalī kūshikīīla pyī ī yose īyī.

³⁵ Ī ligūlū nī sī shikūbīta, alīyo ī mihayo yane ītīko kūjimīīla na hado yaya!”

Ū lūshikū nī likanza shitamanīkile

³⁶ “Gwike atīho ūyo alūmanile ū lūshikū lwenūlo nī likanza; nūūlū a bamalaika ba ng'wigūlū batamanile, pyī nū Ng'wana; ūlū atī Baba wike.

³⁷ Nguno ū kwiza kwa Ng'wana wa Munhū kūkūbiza gīt'ūmo īkajīla mu shikū ja ng'wa Noa.

³⁸ Ū mu shikū jenījo aho lyalī lītaalī kwiza ī lihūūma, balyaga na kūng'wa; hangī batoolaga na kūtoolwa, kūshisha mu lūshikū ūlo Noa akingīla mu ngalaba.

³⁹ Batachagūkile nose lyūbasanganīja ī lihūūma, lyūbapyagūla pye a bose. H'ūmo kūkūbizīla nū kwiza kwa Ng'wana wa Munhū!

⁴⁰ Banhū babīlī bakūsangwa balī mu ngūnda, ūmò akūtwalwa, ūmò ūlekwa!

⁴¹ Bakīma babīlī bakūsangwa bakwishiishaga, ūmò akūtwalwa, ūmò ūlekwa!

⁴² Na lūūlū ikalagi nzūgūlū matū, nguno mutamanile ū Seeba wing'we akwiza lūshikū kī.

⁴³ Hama managi gīkī, ū namugī ha ng'wakwe ūlū ni walīdeeba ī likanza lya kwiza kwa ng'wibi, ni atīlekanīgije ī numba yakwe īkambagūlwe!

⁴⁴ Nose lūūlū na a bing'we shing'wigeleelilwe kwikala nzūgūlū matū, nguno ū Ng'wana wa Munhū akwiza ng'wikanza īlo mutūliganikīlaga.”

Shigemeng'hejo sha nsese

⁴⁵ “Ī gīsī, nsese kī ū nsanyiwa na ng'witegeleja, ū wa kūtūūlwa na ise būgonzo ha būtaale bo kaya yakwe, gīkī ayūbagabanhya banhū ba ha ng'wakwe būlī ng'wene shilīwa shakwe ng'wikanza īlo ligeleelilwe?

⁴⁶ Ū nsese ng'wenūyo ūlū ūsangwa nū ise būgonzo akwītaga īyo alagīlilwe, akūbiza na mbango ningī no.

⁴⁷ Nalīmuwīla gwa ng'hana gīkī akūng'wīta abize ntaale wa shikolo shose ī sha ha ng'wakwe.

⁴⁸ Alīyo ū nsese ng'wenūyo ūlū wabūbi, hūna wandya kwiwīla ū mu moyo gokwe gīkī, ‘Yū odīlile no nīyo ū baba būgonzo!’

⁴⁹ Hama na ūlinhya kūyūbatūla a basese biye, kūnū akūlyaga na kūng'wa na bakolwa walwa,

⁵⁰ ū ise būgonzo akūng'wisanganīja ū nsese ng'wenūyo mu lūshikū ūlo atalwiganikīlile, n'ikanza īlo atalīmanile.

⁵¹ Akwiza amutagūle mapingili mapingili, nī mheela yakwe ang'wisaabīle ng'wigele lya bibeeleja, ūko kūkūbiza kūlīla ng'hūngū na kūshelanya mino!”