Matayo 23 - Bibilia Ilagano Lya Kale 2015

Kūhūgūlwa kwa bahemba

¹ Hūna ū Yesu wandya kūbawīla a banhū hamò na a bahemba bakwe

² gīkī, “A balangi ba shilagīlo na a Bafalisayo, balī h'isumbī lya ng'wa Musa.

³ Ali lūūlū, īdimagi pyī īyo bakamuwīlaga, nīyo g'wīshikīlīja. Gwike yaya ū kwīta ūmo bakīītīlaga a boi, nguno bakayombaga dūhū, alīyo yaya ū kūshikīlīja.

⁴ Hangī bakatungaga miligo midito bayūbaseseja a banhū kū mabega kwībūūcha, alīyo a boi benekīlī batī n'iganiko lya kwībūūcha nūūlū hado; nūūlū ni kūkuumya ho na lwala lwabo dūhū biya.

⁵ Nguno pyī ī milīmo yabo bakīītaga gīkī babonwe na banhū; ū gwabo gūlī gwa kwikala būkūlīlīja fulakitelia jabo, na kūlīhīlīja masune ga ng'hanjo jabo dūhū.

⁶ Nū mu masinagogi batogilwe kwigasīja masumbī g'ikūjo; hama nūūlū būlaalīkwa kūja kū shigukulu, nū kwene bakakūūbīlījaga ha magele ga bakūjiwa.

⁷ Pye na mu magūlilū hose bagaagaanile kwikala būgīshiwa na kwitanwa, ‘Nangi!’

⁸ A bing'we yaya ū kwikala mukwitanagwa, ‘Nangi.’ Nguno ū Nangi wing'we alī ūmò dūhū, lelo a bing'we pyī mulī badūgū.

⁹ Hangī yaya ū kūng'witana munhū nūūlū ūmò ū mu sī ūmu gīkī, ‘Baba’ nguno mulī na Sīng'we ūmò ng'wigūlū.

¹⁰ Nīyo a bing'we yaya ū kwitanwa ‘Bataale’ nguno ū Ntaale wing'we alī ūmò dūhū, ng'wene Kilisito.

¹¹ Hama a bing'we ū ntaale wing'we h'ūyo akūbiza ntūmami wing'we.

¹² Ose ose ū wa kwigūngūhya wei ng'wenekīlī, akūdohelejiwa, alīyo ū wa kwidohya, ū ng'wene akūgūngūhiwa.”

Koolomiwa Bafalisayo na balangi ba shilagīlo

¹³ “Bing'we balangi ba shilagīlo na Bafalisayo bibeeleja, mulī mu kwihīga; nguno mukabalugalīlaga a banhū ū būtemi bo ng'wigūlū. A bing'we mulemeelilwe ū kwingīla, alīyo na a babo batogilwe ū kwingīla mutabazunīlījaga ū kūbīta! [

¹⁴ Mulī mu kwihīga a bing'we balangi ba shilagīlo na Bafalisayo bibeeleja, bing'we abo mukalyaga sabo ja bakīma bachīlwa, na kūlomba kalombele kalīhu ka kwiyoolecha; managi gīkī a bing'we mukūpandīka nsango ntaale kūtinda!]

¹⁵ Mulī mu kwihīga kūtaale no a bing'we balangi ba shilagīlo na Bafalisayo, nguno mukakīlaga manyanza na magūngūli kūjūhembeka munhū ūmò; hama ūlū ng'wang'hembeka hūna ng'wang'wenheleja kūbiza munhū wa kūjimīlīla mu nsango gwa moto gīt'ūmo mulī a bing'we, na kūtinda ho!

¹⁶ A bing'we batongeeji mulī mu kwihīga, nguno mulī babboku, ng'wakūyūlanga gīkī, ‘Munhū ose ose nūūlū akitonga kūnū akwīhayaga hekalu atūbonelwa mhayo, alīyo ūlū witonga mu kūjihaya hela ījo jilīmo ū mu hekalu, ū ng'wenūyo wigwashaga!’

¹⁷ Bing'we babbūūlī na babboku, ī shitaale ni shilī ginehe? Ī hela, nūūlū ī hekalu īyo īkajeejaga ī hela?

¹⁸ Na hangī mukalangaga gīkī, ‘Munhū ose ose nūūlū akitonga mu kūgūhaya ng'walīlo atūbonelwa mhayo, alīyo ūlū witonga mu kūshihaya ī shitambo īsho shilī a ha ng'walīlo, ū ng'wenūyo wigwashaga!’

¹⁹ Bing'we babboku, ī shitaale ni shilī ginehe? Ī shitambo, nūūlū ū ng'walīlo ūyo gūkasheejaga ī shitambo?

²⁰ Hūna lūūlū managi gīkī, būlī munhū ūlū witonga mu kūgūhaya ng'walīlo, numho witongaga mu lina lyago ū ng'walīlo, hamò nī shikolo īsho shilī higūlya yago.

²¹ Nū yūyo witonga kūnū akwīhayaga hekalu, numho witongaga mu lina lyayo, nū yūyo akikalaga mo.

²² Hangī nūūlū munhū witonga mu kūlīhaya igūlū, numho witongaga kū lina ly'isumbī lya ng'wa Mulungu, nū yūyo aligasīgije.

²³ “Mulī mu kwihīga a bing'we a balangi ba shilagīlo na Bafalisayo bibeeleja, nguno mukafunyaga īmò ya ng'wikūmi ya shikolo shido do do, gītī shisanjo sha mu shilīwa; alīyo ī mihayo mitaale ī ya mu malange, gītī kūlamula mu būtūngīlīja, na kūchīla shigongo, na kūzunya; ī yene mukīlekaga. Shing'wigeleelilwe kwīshikīlīja ī yenīyī, gwike nī yīngī īyo yaya ū kwīleka.

²⁴ Bing'we batongeeji babboku, ū nīmo gwing'we ū ntaale gūlī gwa kūyūnga gītī ng'wiyūngīlo, na kūyūsolanhya, ng'waponya ū būfune, lelo ī ngamīla ng'wajimila!

²⁵ Mulī mu kwihīga a bing'we balangi ba shilagīlo na Bafalisayo bibeeleja, nguno mukiyoogelelejaga higūlya gūlya gītī kooja shikombe na mabakuli, alīyo ū mu gatī ng'okalile wibi na kwikūmva kwabūbi.

²⁶ Bebe Mfalisayo mboku, ojaga tame ū mu gatī ya shikombe sheele, hūna ūshooje nī hanze!

²⁷ Mulī mu kwihīga a bing'we balangi ba shilagīlo na Bafalisayo bibeeleja, nguno mubizile gītī shigila īsho shikubonagwa shawiza a higūlya, īkī shizengeelilwe shūbilwa na swakala, alīyo ū mu gatī shokalile maguha ga bafu, na būsoso bo mbika jose!

²⁸ H'ūmo mukabonekanīlaga ū kū banhū; a higūlya mulī batūngīlīja, alīyo ū mu gatī ng'okalile wibeeleja na būgomi!”

Nsango gūliza

²⁹ “Mulī mu kwihīga a bing'we balangi ba shilagīlo na Bafalisayo, nguno ī shigila sha bahangi mukashizengeelaga, ng'wayūgaliila na mashigo ga batūngīlīja.

³⁰ Kūnū mukūhayaga gīkī, ‘Ūlū ni twalī tūlīho ū mu shikū ja bakūlūgenji bise, ni tūtizunīlīgije nabo ū mu kūgiita a mininga ga bahangi!’

³¹ Ū mu kūhaya gīko, mukwikaanīlaga bing'we benekīlī gīkī mulī baana ba babūlagi ba bahangi.

³² Hū kūhaya yokalīlījagi ī ngelekelo ya basīng'we.

³³ Bing'we abo mulī nzoka, na būbyīle wa shipīlī, mukūgwiliga ginehe ū nsango gwa moto?

³⁴ Hūna lūūlū managi gīkī, nalīmutūmīla hangī bahangi, na banhū bitegeleja na balangi, bamò mukūbabūlaga na kūbakoma ha misalaba, bamò babo mukūyūbatūlīla mu masinagogi ging'we; nīyo mukūyūja mukūbahīgaga hose hose ū mu mizengo.

³⁵ Kūshisha a mininga ga beela pye a bose gidīkīle ha mitwe ying'we; pye ayo gaamala kwitwa ha sī, kwandīja ga ntūngīlīja Abeli, kwiza kūkaja kū ga ng'wa Zakalia ng'wana Belekia, ūyo mukamūlagīla mu hekalu kū būtongi bo ng'walīlo.

³⁶ Nalīmuwīla gwa ng'hana gīkī, ī yose īyī īkūbagwīla a banhū ba shibyalīlwe īshi.”

Kūgūlīlīīla nzengo gwa Yelusalemu

³⁷ “Yelusalemu, Yelusalemu, mūlagibo bahangi; bebe ūyo ūkabapondaga mawe abo ūkatūmīlagwa. Nashishaga ng'hangala jinga nakūmanagūgema kūbakuminga kuminga a baana bako, gīt'ūmo ngoko īkakumingīlaga zwiyū jayo yajibandīla mu manana gayo; alīyo ūtatogilwe!

³⁸ Managa gīkī olekelagwa buyīkī ī numba yako!

³⁹ Nguno nalīkūwīla ūtūnibona hangī kūshisha aho ūkūhaya gīkī, ‘Alī na lubango ūyo aliza mu lina lya ng'wa Seeba!’”