Matayo 22 - Bibilia Ilagano Lya Kale 2015

Shigemeng'hejo sha būkombe

¹ Ha numa hangī ū Yesu ongeja kūbawīla shigemeng'hejo; ūhaya gīkī,

² “Ū būtemi bo ng'wigūlū tūkūwikolanīja na ntemi nebe, ūyo akabeeja būkombe kūlwa nguno ya ng'witūnja wakwe.

³ Hūna ūtūma basese bakwe baje būbawīla abo baalī balaalīkwa gīkī bize ū kū būyegi; alīyo būlema!

⁴ Ūtūma hangī basese bangī; ūbawīla, ‘Jagi mukabawīle pye abo baalī balaalīkilwe gīkī, Pyī ī shose shilonja longije; nīyo nasīnzaga na ng'ombe jane kūlwa nguno y'ikūbī, hama ī haha ī shilīwa shalindaga balyi dūhū. Ka nzūgi ū kū būkombe!’

⁵ Alīyo batadīlīlile; būkūlūja bajile, būlī ng'wene kū yakwe. Ūmò kū ngūnda gokwe, ūngī kū byashala yakwe.

⁶ Lelo a bangī būbadima a basese bakwe būbaluhya na kūbabūlaga!

⁷ Ū ntemi akasaaya no, ūtūma bashilikale bakwe būūkababūlaga a bahūnga benabo, nū nzengo gwabo būgūtiima moto.

⁸ Hūna ūbawīla a basese bakwe gīkī, ‘Bing'we; ū būkombe būtang'anhīlile, lelo a balyi abo baalī balaalīkilwe, a bene batigeleelilwe nūūlū hado.

⁹ Hūna lūūlū jagi pye a hose ūko mayīla gamanhīgije; būlī bene abo mulayūbabona bawīlagi bize ū kū būkombe.’

¹⁰ Na ng'hana a basese benabo būja balībakuminga pye abo bababonaga ū mu mayīla, a babūbi na a bawiza. Biza bigasha kūshisha, lyokala ī lībūkombe!

¹¹ “Alīyo ū ntemi aho wingīla gīkī abalole a bageni bakwe, ūbona mo munhū atazwalile shizwalo sha kwingīlīla ū mu būkombe!

¹² Ūmūja gīkī, ‘Bebe ong'wise, ni wingīlaga ginehe ū bebe ū ng'wenūmu, alīyo nī shizwalo sha kwingīlīla ū mu būkombe ūtazwalile?’ Ūgayiwa ū gwa kūshosha!

¹³ Hūna ū ntemi ūbawīla a batūmami gīkī, ‘Ntungagi a magūlū na a makono gakwe, mumponye kū giiti sha hanze; ūko banhū bakūlīla na kūshelanya mino!’

¹⁴ Nguno a bitanwa balī bingī, alīyo a basolwa balī bagehu!”

Kūtoba goodi ya ng'wa Kaisali

¹⁵ Hūna a Bafalisayo būja kūbeeja long'we ya kūngwasha ū Yesu mu kalūngalūngīle.

¹⁶ Būntūmīla bahemba babo na ban'ikūlū ba ng'wa Helode. Biza kūng'wīla, “Nangi tūmanile gīkī ū bebe ūkashimīzīlaga mu ng'hana, nī nzīla ya ng'wa Mulungu ūkīlangaga mu ng'hana; nguno ūtīītaga mhayo kūlī munhū ose ose kūlwa kūlola būshū bokwe.

¹⁷ Alitūwīlage ūmo ūkwiganikīlaga, ū mhayo gwa kūtoba goodi ya ng'wa Kaisali gūzunīlīgije, nūūlū yaya?”

¹⁸ Alīyo ū Yesu kūlwa nguno walī abūmanile ū būbi wabo, ūbashokeja ūbawīla gīkī, “Bing'we bibeeleja, nibūlī mulīnigema?

¹⁹ Noolekejagi ī hela ya goodi.” Būng'wenhela denali īmò.

²⁰ Hūna ūbabūja gīkī, “Ī suso īyī nū wandīke wenūbū sha ng'wa nani?”

²¹ Būnshokeja, “Sha ng'wa Kaisali.” Nang'hwe ūbawīla, “Na lūūlū, ī sha ng'wa Kaisali ng'winhagi Kaisali; nī sha ng'wa Mulungu ng'winhagi Mulungu.”

²² Aho bigwa bakakumya na kakumīje kangī nako, bīnga ho būneka.

Basadukayo na mhayo gwa būjūūko

²³ Ū mu lūshikū lwenūlo dūhū hangī būnsanga Basadukayo; abo bahayile gīkī būtīho būjūūko. Hūna lūūlū būmūja

²⁴ būhaya, “Nangi ū Musa ahayile gīkī, ūlū munhū ūzumalīka alīyo atī na baana, ng'wanong'wawe akūng'wingīla ū nkīma ng'wenūyo, antoole amyalīle baana ū ndūgūye.

²⁵ Ali lūūlū, baalīho banhū mpungatī ba shikūlū na shizuna, bikalaga hamò nise ng'wenūmu ūmu; ū tangi wabo akatoola, alīyo ūcha atalekile baana, ng'wanong'wawe ūng'wingīla ū nkīma ū nchīlwa.

²⁶ Ū wa kabīlī ng'wenūyo nang'hwe gūng'wilongela ū gwenūyo; nū wa kadatū, kūshisha būshila pye a bose mpungatī!

²⁷ Aho bashila pye, nose nū nkīma ūcha!

²⁸ Ī gīsī lūūlū, ū ng'wikanza lya būjūūko, akūbiza nke o ng'wa nani ū mu bose mpungatī, īkī pye baalī bantoola?”

²⁹ Ū Yesu ūbashokeja ūbawīla gīkī, “A bing'we mutashimanile ī shandīkwa, nū būdūla bo ng'wa Mulungu, h'ī chene mulīhūbīla.

³⁰ Nguno ū ng'wikanza lya būjūūko batūbiza ba kūyūtoola nūūlū kūtoolwa, alīyo bakūbiza gītī bamalaika ba ng'wigūlū.

³¹ Nīyo ū mhayo gwa kūjūūka bafu gwenūyū, mutaalī ū kūsoma ūmo akūmuwīlīlaga ū Mulungu; ī gīkī,

³² ‘Ū nene nalī Mulungu wa ng'wa Abulahamu, na Mulungu wa ng'wa Isaka, na Mulungu wa ng'wa Yakobo? Ū wei atī Mulungu wa bafu, alī wa bapanga.’”

³³ A mabita ga banhū aho gigwa gīko gakabūkumya no ū būlangi bokwe.

Shilagīlo shitaale kūtinda shose

³⁴ Bafalisayo nabo būng'witinja aho bigwa gīkī wabahuumūja a Basadukayo.

³⁵ Ūmò wabo walī nangi wa shilagīlo, ūmūja ibūjo mu kūngema; ūhaya gīkī,

³⁶ “Nangi ī shilagīlo ī shitaale ū mu malange ni shilī ginehe?”

³⁷ Nang'hwe ūng'wīla, “Ntogagwe ū Seeba Mulungu wako na ng'holò yako yose, na būpanga wako bose, na maganiko gako gose.’

³⁸ Ī shenīshi h'ī shitaale, hangī h'ī sha kwandya.

³⁹ Nī sha kabīlī shilī gīko dūhū; shihayile gīkī, ‘Ntogagwe nzenganwa ng'wiyo gīt'ūmo witogelilwe bebe ng'wenekīlī.’

⁴⁰ Ū ng'wihando gwa malange gose, na a kalangīle ka bahangi bose, gūlī ha shilagīlo shenīshi būbīlī washo.”

Ng'wana wa ng'wa Daūdi

⁴¹ Aho bibilinga a Bafalisayo, ū Yesu ūbabūja

⁴² ūhaya gīkī, “Mukwībonaga ginehe ī mihayo ya ng'wa Kilisito, ī gete ni ng'wana o ng'wa nani?” Būng'wīla, “O ng'wa Daūdi!”

⁴³ Nang'hwe ūbawīla; “Hama nibūlī lūūlū ū Daūdi ng'wenekīlī, akang'haya mu nguzu ja ng'wa Moyo gīkī Seeba? Nguno akahaya,

⁴⁴ ‘Ū Seeba akang'wīla ū Seeba wane, igashaga kū nkono gwane gwa būlyo, kūshisha nabatūūle a banishi bako ha sīlīlī ya mhambala jako.’

⁴⁵ Ī gīsī lūūlū, ū Daūdi ūlū alīng'witana gīkī Seeba, numho alī ng'wana wakwe hangī kinehe?”

⁴⁶ Atigelile nūūlū ūmò wa kūnshokeja mhayo; nīyo kūfuma lwise lwenūlo atigelile hangī munhū wa kūmūja mhayo gose gose.