Matayo 21 - Bibilia Ilagano Lya Kale 2015

Kwingīla mu Yelusalemu nyatemi

¹ Bahayūtumbya Yelusalemu, būbiza bashika Betifage, kū lūgūlū lo mizeituni, ū Yesu ūtūma babīlī ba bahemba bakwe.

² Ūbawīla gīkī, “Jagi ū mu chalo īsho shilī kū būtongi wing'we shenīsho, ūlū mulashike mukūbona nzobe īlī na ng'wana ītungilwe, ītaligūlīlagi munenhele.

³ Ose ose ūyo alamuwīle mhayo ng'wīlagi gīkī, ‘Seeba alī na nīmo najo, akūjishosha haha yenīyī dūhū.’”

⁴ Ū gwenūyo gūkaja gīko kūlwa kūshikīlījiwa kwa mhayo ūyo gūhayiwe kūbītīla mulī ng'hangi; gīkī,

⁵ “Gūwīlagi ū nzengo gwa Sayuni, ‘Managa gīkī, ū Ntemi wako ū ng'widohya, aliza kūlī bebe adamhīlile nzobe; alī ha nzobe, ng'wana wa nzobe.’”

⁶ A bahemba benabo aho baja, būūkīīta ūmo akabawīlīla ū Yesu.

⁷ Bīyenha ī nzobe nū ng'wana wayo, aho bajishisha būjitūūlīla myenda a ha migongo yajo, ūdamhīla.

⁸ Mabita mataale ga banhū bandya kūja balamba myenda yabo ū mu nzīla, bangī būyūbbuta matambī mado mado ga mitī bagaponangīja ū mu nzīla.

⁹ A mabita ayo gaalī ū kū būtongi bokwe na a yayo gakūūbījaga gandya kūhamuka galīhaya; “Ikūjo lībize ū kūlī Ng'wana wa ng'wa Daūdi. Akumīlījiwe ūyo aliza mu lina lya ng'wa Seeba; ikūjo lībize higūlya no!”

¹⁰ Aho oshika ū mu nzengo gwa Yelusalemu, pye a hose hūbiza tagambī, pyī būyibūja gīkī, “Ī gete, nani ū ng'wenūyū?”

¹¹ A mabita gūshosha galīhaya, “Ū ng'wenūyū ng'hangi, Yesu wa Nazaleti ya Galilaya!”

Kwejiwa kwa hekalu

¹² Ū Yesu aho wingīla ū mu hekalu, ūbapeeja pye abo bīītīlaga mo byashala ja kūjinja na kūgūla shikolo, ūjisalingūla ī meza ja bakaabanya ba hela, pye na a masumbī ga bajinja ba mhunda.

¹³ Ūbawīla; “Yandīkilwe gīkī, ‘ī numba yane īkwitanwa numba y'ilomba; alīyo a bing'we mukwīyītaga kūbiza ipilinga lya basambo!’”

¹⁴ Aho alī mu hekalu būng'wegeela babboku na balemehazu, ūbapīja.

¹⁵ A bagabīji bataale na a balangi ba shilagīlo bakapelana no aho bashibona ī shakūkumya īsho akabeeja; būbabona na banīgīnī ū mu hekalu balīhīlīīla būhaya gīkī, “Ikūjo lībize kūlī Ng'wana wa ng'wa Daūdi!”

¹⁶ Būng'wīla gīkī, “Ūlībigwa ūmo balīhayīla a benaba?” Nang'hwe ū Yesu ūbashokeja; “Būgatū! A bing'we mutaalī ū kūsoma ūmo gūhayīlilwe gīkī, ‘Bebe walangile banīgīnī na beleele kūlamya na milomo yabo?’”

¹⁷ Hūna ūbaleka wīnga ho a henaho, ūfuma hanze ya hekalu, ūja Betania ūūkalaala kwenūko.

Kūzung'wa kwa ntini

¹⁸ A ha ntondo yaho ī dilū ūlinha ngūlya ashokile hangī ū mu nzengo, alīyo walī atuubile.

¹⁹ Aho alī mu nzīla ūbona ntini, ūliga ho kūlola; gwike ūgayiwa shikolo shose shose, gwalī na madūūtū dūhū. Ūgūwīla ū ntī gīkī, “Ūtalatwaja matwajo ilalī!” Haho na haho gūūma ū ntini gwenūyo!

²⁰ A bahemba aho babona būkumya no, būhaya, “Yee alīyo nibūlī gūūma haho na haho ū ntini?”

²¹ Nang'hwe ū Yesu ūbashokeja ūhaya, “Zunyagi nalīmuwīla gwa ng'hana gīkī, ūlū ng'ūbiza na kūzunya kūtī na kūtawa tawa, mudūgije kūgwīta ū mhayo gwenūyū; nīyo ītī kū ntini dūhū, alīyo nūūlū lūgūlū gīt'ūlū mudūgije kūlūwīla gīkī, ‘īngaga a henaho ūkagwe mu nyanza,’ na ng'hana īkūja chene.

²² Nīyo hangī būlī shikolo īsho mukūlomba mu kūzunya, mukūpandīka.”

Fumo ya būdūla bo ng'wa Yesu

²³ Aho washika hangī ū mu hekalu wandya kūlanga, kūhayimanīla bansanga bagabīji bataale na banamhala; būmūja balīhaya gīkī, “Bebe īyo ūkwīyītaga yenīyī, ūkwīyītaga mu būdūla kī? Nīyo hangī nani ūyo wakwinhile ū būdūla wene?”

²⁴ Nang'hwe ū Yesu ūshosha ūbawīla gīkī, “Nane namubūje mhayo gūmò, ūlū mulanishokeje nane nakūmuwīla ī yenīyī nakwīyītaga mu būdūla kī.

²⁵ Ū būbatīīja bo ng'wa Yohana, boolī būfumile halī? Ng'wigūlū, nūūlū kū banhū?” Bandya kwilūnjalūnja baliwīla gīkī, “Ūlū tūlahaye boolī būfumile ng'wigūlū akūtūbūja, ‘Nibūlī lūūlū mutīzunije ī mihayo yakwe?’

²⁶ Alīyo hangī ū kūhaya gīkī, ‘Boolī būfumile kū banhū,’ nī chene tūlogoha, nguno pye a banhū bamanile gīkī ū Yohana walī ng'hangi.”

²⁷ Hūna lūūlū būkalīla kūnshokeja ū Yesu balīhaya gīkī, “Tūtamanile!” Nang'hwe ūbawīla, “Nū nene natūmuwīlaga ī yenīyī nakwīyītaga mu būdūla kī.”

Lūsumo lwa bitūnja babīlī

²⁸ “Ī gīsī lūūlū, hīmba mulībona ginehe? Walīho munhū ūmò, walī na bitūnja babīlī. Ūja kūng'wīla ū wa kwandya gīkī, ‘Bebe ng'wanone, lelo jaga ūkatūmame ū mu ngūnda go mizabibu ūmo.’

²⁹ Nang'hwe ūshosha ūhaya; ‘Mm, yaya natūdūla!’ Alīyo a ha numa ya henaho ūgalūcha a maganiko ūja.

³⁰ Ū namhala ūūkang'wīla nū wa kabīlī ū mhayo gwenūyo; ū ng'wene ūhaya, ‘Būgatū baba, nakūja;’ alīyo atajile.

³¹ Ū mu būbīlī wabo, alī ginehe ūyo akīīta ūmo walī atogelilwe ū saabo?” Būhaya, “Ū wa kwandya!” Nang'hwe ū Yesu ūbawīla; “Hūna lūūlū zunyagi nalīmuwīla gwa ng'hana gīkī, a batobisha ba goodi na a bamalahya bakūmutanga ū kwingīla ū mu būtemi bo ng'wa Mulungu.

³² Nguno ū Yohana akiza kūng'oolekeja a bing'we nzīla ya būtūngīlīja ng'ūnemeja ī yakwe; alīyo a batobisha ba goodi na a bamalahya būzunya. Lelo a bing'we nūūlū aho ng'wabona a ha numa yaho, nahene mutagalūkile gīkī muzunye!”

Lūsumo lo ngūnda na balīmi

³³ “Degelekagi lūsumo lūngī, olīho munhū nebe namugī ha kaya yakwe, akalīma ngūnda ūgūhamba mizabibu, hūna ūgūpīndīlīja ngītīli, ūsīmba mo n'ikamīlo lya mvinya. Ūlola ūzenga mo na numba ya balang'hani, hanuma ūgūtūūla mu makono ga balīmi, ū wei wīnga ho.

³⁴ Aho lyegeela ikanza lya matwajo, ūtūma basese bakwe, baje ū kū balīmi bakasole a matwajo gakwe.

³⁵ Alīyo a balīmi benabo būūkabadima a basese bakwe; ūmò būntūlagūla milang'ha, ūngī būmūlaga, na ūngī būmponda mawe.

³⁶ Ūtūma hangī basese bangī, lelo bingī ho kūkīla a ba kwandya; alīyo na a bene būūkabīītīla gīko dūhū.

³⁷ Wanoga nose ūntūma ng'wana wakwe, kūnū alīhaya gīkī, ‘Bakūnkūja ū ng'wana wane!’

³⁸ Alīyo a balīmi benabo aho bamona ū ng'wana, biwīla gīkī, ‘Ūyū angū hū ng'wene ū ng'wingīji gete, tūmūlagagi tūbūsole bise ū wingīji bokwe!’

³⁹ Ng'hana būndima, būndutanja kūja hanze ya ngūnda, būūkamūlaga!

⁴⁰ Ī gīsī lūūlū, ū ng'wenekīlī ngūnda ūlū wiza, akūbīīta ginehe a balīmi benabo?”

⁴¹ Būnshokeja gīkī, “Akwiza abakenaagūle nguno balī balīmi babūbi, nū ngūnda ūgūtūūla mu makono ga balīmi bangī, abo badūgije kūng'winha a matwajo ga mu ngūnda mu makanza ayo gigelile.”

⁴² A henaho ū Yesu ūbawīla; “A bing'we mutaalī ū kūshisoma ī shandīkwa īsho shihayile gīkī, ‘ī liwe īlo bakalīlema bazengi h'īlo lyabizile lya kwīgoloolela ī numba; ū mhayo gwenūyū gūfumile kūlī Seeba, nīyo gūlī gwawiza no ū mu miso gise?’

⁴³ “Hūna lūūlū, nalīmuwīla mukūtaajiwa ū būtemi bo ng'wa Mulungu, linhwe ihanga līngī; īlo līkūtwaja matwajo ayo gigeleelilwe. [

⁴⁴ Nose ūlū munhū ūlīgwīla ī liwe lyenīlī, akūpaanagūka paza paza, lelo ūyo lyūngwīla, ū ng'wene līkūntobagūla tobo tobo!]”

⁴⁵ A bagabīji bataale na a Bafalisayo aho bajiigwa ī sumo jakwe jenījo, būmana gīkī akajihaya kūlwa nguno yabo.

⁴⁶ Alīyo ū kūndima bakagogoha a mabita, nguno a banhū bamonaga gīkī alī ng'hangi.