Matayo 20 - Bibilia Ilagano Lya Kale 2015

Bitūmamīja ba mheela mu ngūnda

¹ “Nguno ū būtemi bo ng'wigūlū būbizile gītī namugī ha ng'wakwe, ūyo akipuuna dilū kūjūkooba batūmami ba mu ngūnda gwakwe gwa mizabibu.

² Wiyigwa nabo kūbinha mheela ya denali īmò kū lūshikū lūgima būlī ng'wene. Hūna ūbatūma būja ū mu ngūnda gokwe, būūkandya kūtūmama.

³ Mu līīmi gītī lya sa idatū gīko ūfuma hangī, ūbona bangī bīmīīlaga ng'wigūlilū batī na nīmo gose gose.

⁴ Na a bene ūbawīla; ‘Jagi ning'we ū mu ngūnda gwane gwa mizabibu, nakūng'winha īsho shiigeleelilwe.’

⁵ Nabo būja; mu makanza ga līīmi ntwe gatī hangī wahayūfuma, wenha bangī; nū mu sa kenda.

⁶ Kūjīlīīla mu makanza ga sa ikūmi n'īmò ūfuma hangī ūbona bangī, nabo bīmīīlaga dūhū batī na nīmo; na a bene ūbabūja gīkī, ‘Bing'we nibūlī ng'walocha ng'wīmīīlaga aha dūhū, mutī na nīmo shi?’

⁷ Nabo būnshokeja būhaya, ‘Tūtaalī kūpandīka ū wa kūtwinha ū nīmo.’ Ūbawīla; ‘Jagi ning'we ū mu ngūnda ūmo!’

⁸ “Aho lyabiza lya mhīndī, ū ng'wenekīlī ngūnda ūng'wīla nang'hani o sabo jakwe gīkī, ‘Bitanage ko a batūmami ūbinhe būlī ng'wene ī mheela yakwe; wandīje abo biza numa, ūkamalīgīje abo batongaga ū kūshika.’

⁹ Aho biza abo bakashika sa ikūmi n'īmò, būsola būlī ng'wene denali īmò.

¹⁰ Abo baalī batonga bandya kwiganika gīkī bakūsola ningī a bene; alīyo nabo aho bashika būsola denali īmò būlī ng'wene.

¹¹ Hūna lūūlū aho balanukūla, bandya kūyūng'ung'uula, bakūng'ung'uulīlaga ū ng'wenekīlī ngūnda.

¹² Būyūhaya gīkī, ‘A bing'wana aba biza haha yenīyī tūlīmalīja, bagelela kūtūmama sa īmò dūhū, ni ginehe watūlenganīja nabo, alīyo a bise twalochaga tūkūtūmamaga mu kwiyūmīlīja na kūpya līīmi!’

¹³ “Nang'hwe ūnshokeja ūmò wabo ūng'wīla gīkī, ‘Ng'wanong'wise natūkwiboneelaga. Angū, twalī tūtizunīlīgije gīkī ūkūsola denali īmò?

¹⁴ Natogagwa nene ū kūng'winha ū wa kūmalīja gīt'ūmo nakwinhīla ū bebe. Bebe, solaga ī sabo yako ūje!

¹⁵ Nūūlū hamo ū nene ītanigeleelilwe kūjitūmamīla ī sabo jane ūmo natogelilwe? Kolaga hamo wasaaya shi īkī wabūbona ū wiza ng'holò bone?’

¹⁶ H'ūmo īkūbizīla; a ba kūmalīja bakūbiza ba kwandya, hama a ba kwandya bakūbiza ba kūmalīja!”

Kūbawīla hangī ya kūcha na kūjūūka kwakwe

¹⁷ Ū Yesu aho alī mu lūgendo alīlinha kūja Yelusalemu, ū mu nzīla akabapūnja ha mhūjo abo ikūmi na babīlī; ūbawīla gīkī,

¹⁸ “Ī haha tūlīlinha kūja Yelusalemu, ū Ng'wana wa Munhū akūjūtūūlwa mu makono ga bagabīji bataale na balangi ba shilagīlo, banamule nsango gwa kūbūlagwa.

¹⁹ Ha numa bakūntūūla mu makono ga banhū ba mahanga, bangīmbe nyachilū na kūntūla, hama bakūnkoma ha nsalaba. Alīyo akūjūūchiwa ha lūshikū lo kadatū lwaho.”

Kūkooba būtaale

²⁰ Kūhayimanīla nke wa ng'wa Zebedayo na bitūnja bakwe ong'wegeela ū Yesu, ūshika ūntugīja mazwi alīnomba mhayo.

²¹ Nang'hwe ū Yesu ūmūja; “Ūlītogwa kī?” Ngikūlū nang'hwe ūshosha alīhaya, “Seeba ka lagīlaga shi gīkī a bitūnja bane a babīlī aba baligashe nang'ho ū mu būtemi wako, ūmò kū nkono gwako gwa būlyo, nū ūngī ū kū gwa lūmoso!”

²² Nang'hwe ū Yesu ūshosha ūbawīla, “A bing'we angū mutagūmanile ūyo mulīgūlomba! Mudūgije kūshing'wa ī shikombe īsho nalī hihī kūshing'wa ū nene?” Būng'wīla; “Tūdūgije!”

²³ Ūbawīla, “Na ng'hana mukūshing'wa ī shikombe shane; alīyo ū gwa kwigasha kū nkono gwane gwa būlyo na gwa lūmoso, gūtī gwa kūmuzunīlīja nene; ū gwene gūlī gwa banhū abo balonja longejiwe na Baba.”

²⁴ Abo ikūmi aho bigwa, būbapelanīla a bichabo a ba shikūlū na shizuna.

²⁵ Hūna ū Yesu ūbitana ūbawīla; “Mumanile gīkī a basugi ba mahanga h'a balomani, na gīkī a bataale babo h'abo bakabatūmamyaga bo nguzu!

²⁶ Ū kū bing'we ītigeleelilwe ībize gīko, alīyo būlī ng'wene ūyo atogilwe kūbiza ntaale ū mu bing'we, shing'wigeleelilwe abize ntūmami wing'we.

²⁷ Nū yūyo atogilwe kūbiza ntongeeji ū mu bing'we abize nsese wing'we.

²⁸ Nguno nū Ng'wana wa Munhū atizile kūtūmamīlwa, alīyo kūtūmama, na kūfunya būpanga bokwe kūbiza shikomoolelo kūlwa nguno ya bingī.”

Kūpījiwa babboku babīlī

²⁹ Ū Yesu na a bahemba bakwe aho balīnga ī Yeliko, ibita itaale lyūnondeela.

³⁰ Baalīho na babboku babīlī bigashije bbihī na nzīla; aho bigwa gīkī Yesu alībīta, bandya kūhamuka balīhaya, “Ng'wana wa ng'wa Daūdi, tūkūlīlagwe!”

³¹ A banhū būyūbahama gīkī bahuumūle, alīyo a bene hū bongeja gete ū kūhamuka balīhaya; “Seeba Ng'wana wa ng'wa Daūdi; tūkūlīlagwe!”

³² Ū Yesu wīmīīla ūbitana. Ūbabūja gīkī, “Mutogilwe nang'wītīle kī?”

³³ Nabo būnshokeja balīng'wīla gīkī, “Seeba ka a miso gise gabone!”

³⁴ Ū Yesu ūbasaatwa, ūgakuumya a miso gabo; haho na haho bandya kūbona, būnondeela.