Matayo 17 - Bibilia Ilagano Lya Kale 2015

Yesu kūgalūka ihanga

¹ Ha numa ya shikū itandatū, ū Yesu ūnsola ū Petelo, hamò na Yakobo na Yohana ng'wanong'wawe; benabo dūhū. Ūbatongeela kūja mu lūgūlū lūlīhu, ūlinha nabo.

² Kūhayimanīla ī lihanga lyakwe lyagalūka balolile; ū būshū bokwe būyūteemagīla gītī līīmi, nī shizwalo shakwe sheela pe gītī isana.

³ Bahayimanīla babilongela ba Musa na Eliya, balīlūngalūnga nang'hwe.

⁴ Ū Petelo ūng'wīla ū Yesu gīkī, “Seeba yabeelela ū kūbiza tūlīho aha; ūlū ūlītogwa tūzenge maheema adatū, ū bebe līmò, nū Musa līmò nū Eliya līmò!”

⁵ Aho ataalī ūyomba gīko, kwimanīla bafīkījiwa ilunde ing'weku, n'ilaka lyūfuma ū ng'wilunde līlīhaya gīkī, “Ūyū ng'wene Ng'wana wane Ntogwa ūyo nanyegelile hataale no, ng'wigwagi wei.”

⁶ Aho bigwa gīko a bahemba bogoha kīngī nasho, būgwa bachimīgije.

⁷ Alīyo ū Yesu ūbegeela ūbakuumya, ūbawīla gīkī, “Bing'we būūkagi mutogohage.”

⁸ Bahayūbūūcha a miso gabo, batamonile ūngī ose ose, ūlū atī Yesu dūhū iyene.

⁹ Aho balika ū mu lūgūlū ū Yesu ūbahana, ūbawīla gīkī, “Mutizūng'wīla munhū ose ose ī ng'hūlū ja mhayo ūyo ng'oolekejiwa gwenūyū, kūshisha aho Ng'wana wa Munhū alajūūke kūfuma mu bafu.”

¹⁰ Hūna a bahemba būmūja balīhaya; “Hama nibūlī a balangi ba shilagīlo bakahayaga gīkī shiigelile ize Eliya tame?”

¹¹ Nang'hwe ūbashokeja alīhaya, “Ū Eliya ū ng'wene ng'hana ng'wizi kūlwa kwīlonja lonja pyī ī mihayo.

¹² Alīyo nalīmuwīla gīkī ū Eliya wamalile ū kwiza, nīyo būng'wītīla gīt'ūmo batogelilwe, gwike batang'witegelegije. H'ūmo īlī nū kūlī Ng'wana wa Munhū, nang'hwe alī hihī kūluha luhiwa mu makono gabo.”

¹³ Hūna lūūlū a bahemba bitegeleja, gīkī wabawīlaga mihayo ya ng'wa Yohana Matīīja.

Nyanda kwīngījiwa isamva

¹⁴ Aho bashika ū kwibita lya banhū, ngosha ūmò ūng'wegeela, ūshika ūntugīja mazwi.

¹⁵ Ūng'wīla gīkī, “Seeba kaka kitūnja kane kakūlīlagwe, kalī na makoye ga kūgwa lūsalo; ng'hangala ningī kakagwīla na mu moto, nūūlū mu minzī!

¹⁶ Nakenhaga ū kū bahemba bako, alīyo balemeelagwa ū kūkapīja.”

¹⁷ Ū Yesu ūshosha ūhaya, “Bing'we shibyalīlwe sha būtūzunya na shihūbīkile, nakwikala ning'we kūshisha nanalī? Nakwiyūmīlīja ning'we kūshisha nanalī? Ng'wenhagi halī nene.”

¹⁸ Hūna ū Yesu ūlīhama ī lisamva lyūfuma, ū nyanda ūpīla ī likanza lyenīlo.

¹⁹ Aho wasaaga iyene ū Yesu, būng'wegeela a bahemba bakwe; būmūja gīkī, “Nibūlī a bise twalī twalemeelagwa ū kūlīpeeja?”

²⁰ Nang'hwe ūhaya, “Kūlwa nguno ya būdo wa kūzunya kwing'we. Nalīmuwīla gwa ng'hana gīkī, ū kūzunya kwing'we ūlū kūbiza kūshikanu gītī kabīyū ka haladali, mudūgije nūūlū kūlūwīla lūgūlū gīt'ūlū gīkī, ‘īngaga ho a henaho’; na ng'hana lūkwīnga. Nīyo gūtīho mhayo ūyo gūkūmulemeela ū kūgwīta. [

²¹ Alīyo ī mbika gītī īyī, ītīko kūfuma na hado yaya, ūlū ītī mu kūlomba na kūfunga.]”

Kūbawīla hangī ya kūcha na kūjūūka kwakwe

²² Bakīīta būmanhīja Galilaya pye a bose, ū Yesu ūbawīla gīkī, “Ū Ng'wana wa Munhū alī hihī kūtūūlwa mu makono ga banhū

²³ bamūlage, alīyo akūjūūchiwa ha lūshikū lo kadatū lwaho.” A boi bakapīnīhala no!

Kūtoba goodi ya mu hekalu

²⁴ Aho bashika Kapelanaumu, basoleleja ba goodi ya mu hekalu būng'wegeela ū Petelo būmūja gīkī, “Bebe ū Nangi wing'we, atatobaga ū ng'wene ī goodi ya mu hekalu?”

²⁵ Ūhaya, “Akatobaga.” Ū Petelo wingīla mu kaya; alīyo aho ataalī kūhaya mhayo, ū Yesu ūng'wīla gīkī, “Ūlībona ginehe Simoni, a basugi ba sī bakasolelejaga ī goodi nūūlū ī shihongeelo, kwīnga kū banani? Kwīnga kū baana babo, nūūlū kwīnga kū babisa?”

²⁶ Aho wahaya, “Kwīnga kū babisa;” ū Yesu ūhaya, “Hū kūhaya gīkī a baana a bene balī mu wiyabī.

²⁷ Gwike ītī yawiza ū kūbipamya; ali lūūlū, jaga ū kū nyanza ūkaponeje ilobo ūlobe, ī ndīlo īyo ūlagwashe kwandya na kwandya īsolage. Ūlū ūyasamya ū mu nomo ūkūbona mo hela; solaga ūje ūkatobe ī goodi yane nī yako.”