Matayo 16 - Bibilia Ilagano Lya Kale 2015

Kūkooba shimanīkījo

¹ Bafalisayo na Basadukayo būng'wegeela ū Yesu kwiza kūngema; aho bashika būnomba aboolekeje shimanīkījo sha kūfuma ng'wigūlū.

² Nang'hwe ūbashokeja alībawīla, “Ūlū ng'ūbona lyalalūkaga ī lilunde makanza ga līīmi lya mhīndī, mukahayaga; ‘Lelo ng'wanga.’

³ Nūūlū makanza ga dilū ūlū ng'ūlībona ī lilunde lyahīndīhalaga lyūditibīja, mukahayaga, ‘Lelo īkūtūla mbula.’ A bing'we ūlū ng'walola ū ng'wilunde mukamanaga ūmo īlījīla ī wangalūke, lelo ū gwa kūshideeba ī shimanīkījo sha makanza aya ū gwene gūmulemeelile gete!

⁴ Shibyalīlwe shabūbi na shitankūgije Mulungu, shikūkoobaga shimanīkījo. Alīyo shitūdūla kwinhwa ī shimanīkījo, ūlū ītī sha ng'wa Yona!” Ūbaleka henaho ūja.

Shibimbya sha Bafalisayo na Basadukayo

⁵ A bahemba bakwe baalī bība ū kūsola migatī aho balīja ū kū nkīlo.

⁶ Kwimanīla ū Yesu wabawīla gīkī, “Kalaganagi ng'wilang'hane ū kū shibimbya sha Bafalisayo na Basadukayo.”

⁷ Alīyo a bene bandya kwilūnjalūnja balīhaya, “Kolaga hamo shi īkī tūtasolile ī migatī!”

⁸ Ū Yesu ūgūdeeba ū mhayo gwenūyo, ūbawīla gīkī, “Bing'we ba kūzunya kūdo, nibūlī muliwīla gīkī, hamo īkī mutī na migatī?

⁹ Mutaalī dūhū ū kwitegeleja? Mutūyizūkagwa ī migatī ītanò īyo īkalyiwa na banhū shihūmbī shitanò, na a matangwa ayo mukokaja?

¹⁰ Mutūyizūkagwa nūūlū ī migatī mpungatī īyo yalī yabigela banhū shihūmbī shine lelo īyī, na a matangwa ayo ng'walī ng'okaja?

¹¹ Nibūlī mutitegelejaga gīkī natūmuwīlaga mihayo ya migatī? Na lūūlū kalaganagi ng'wilang'hane gete ū kū shibimbya sha Bafalisayo na Basadukayo!”

¹² Hūna bitegeleja gīkī walī atahayaga kwilang'hana kūlwa shibimbya sha mu migatī, alīyo wahayaga mihayo ya malange ga Bafalisayo na Basadukayo.

Būkaanīji bo ng'wa Petelo

¹³ Ū Yesu aho washika mhandī ja Kaisalia Filipi, ūbabūja a bahemba bakwe alīhaya, “A banhū bakūng'hayaga ū Ng'wana wa Munhū gīkī alī nani?”

¹⁴ Nabo būhaya, “Bamò bakūng'hayaga gīkī alī Yohana Matīīja, bangī Eliya, alīyo bangī hangī Yelemia, nūūlū ūmò wa bahangi.”

¹⁵ Hūna ūbawīla, “Al'a bing'we mukūnihayaga nalī nani?”

¹⁶ Simoni Petelo ūshosha ūhaya, “Ūlī Kilisito Ng'wana wa ng'wa Mulungu mpanga!”

¹⁷ Ū Yesu ūng'wīla gīkī, “Ūlī na lubango Simoni ng'wana Yona, nguno ū mhayo gwenūyū ūtafubolelilwe na munhū, alīyo na Baba ūyo alī ng'wigūlū.

¹⁸ Ū bebe nalīkūwīla ūlī Petelo, nīyo ī kanisa yane nakwīzengela a ha shiganga shenīshi; hama nūūlū mibita ya kūlimu ītūyīheeba na hado yaya.

¹⁹ Nakūkwinha ī fungūlo ja būtemi bo ng'wigūlū, na lūūlū būlī mhayo ūyo ūlagūtunge ū mu sī, gūkūbiza gwatungagwa ng'wigūlū, nūūlū gose gose ūlū ūgūzunīlīja mu sī, gūkūbiza gwazunīlījiagwa ng'wigūlū.”

²⁰ Hūna ūbahana a bahemba batizūng'wīla munhū nūūlū ūmò, gīkī ū wei hū walī ng'wene ū Kilisito.

Kūbalanga ya kūcha na kūjūūka kwakwe

²¹ Hūna lūūlū kūfuma ikanza lyenīlo, ū Yesu wandya kūboolekeja a bahemba bakwe, gīkī shing'wigeleelilwe kūja Yelusalemu, ūko banamhala na bagabīji bataale hamò na balangi ba shilagīlo bakūnuhya mu mihayo mingī; na gīkī akūbūlagwa. Alīyo akūjūūka ha lūshikū lo kadatū lwaho.

²² Ū Petelo ūmpūnja ha mhūjo ū Yesu, wandya kūng'hama alīhaya gīkī, “Seeba ū mhayo gwenūyo ni gūkachīlage kūle ūko, gūtizūkūgwīla bebe!”

²³ Nang'hwe ūngalūkīla ū Petelo ūng'wīla gīkī, “Īngaga ū kū būtongi bone Shetani. Ūlī ishikī ū kūlī nene; nguno ū bebe ūtiganikaga ya ng'wa Mulungu, ūlī mu ya banhū dūhū!”

²⁴ Hūna ū Yesu ūbawīla a bahemba bakwe gīkī, “Ose ose ūyo atogilwe kūnilondeela ni idalahage wei ng'wenekīlī, hama ibūūkīje nsalaba gokwe ng'wenekīlī h'anilondeele.

²⁵ Nguno būlī ng'wene ūyo atogilwe kūbūpīja būpanga bokwe akūbūjimīīja, alīyo ūyo ūbūjimīīja ū būpanga bokwe kūlwa nguno yane, ū ng'wenūyo akūbūpandīka.

²⁶ Angū, ū munhū akūbiza na solobo kī nūūlū akīpandīka pyī ī sī, alīyo ūbūjimīīja ū būpanga bokwe? Nūūlū hangī, ū munhū adūgije kūfunya kī kūlwa kūkomoola būpanga bokwe?

²⁷ Nguno ū Ng'wana wa Munhū akwiza ng'wikūjo lya ng'wa Ise alī hamò na bamalaika bakwe; hūna akūngabīla būlī ng'wene ngabo gwa kūlenganīla na shītwa shakwe.

²⁸ Gwike nalīmuwīla gwa ng'hana gīkī, ū mu banhū abo bīmīīlaga aha, balīho bamò batūlīloja ī licha na hado yaya, kūshisha bamone ū Ng'wana wa Munhū aliza mu būtemi bokwe!”