Matayo 10 - Bibilia Ilagano Lya Kale 2015

Batūng'wa ikūmi na babīlī kūsolwa

¹ Akīīta ūbitana a bahemba bakwe abo ikūmi na babīlī, ūbinha būdūla bo kūheeba myoyo misoso; badūle kwīpeeja, na kūpīja būlī mbika ja būsaatu na būlemehazu.

² A mina ga batūng'wa ikūmi na babīlī benabo gaya, wa kwandya Simoni, ūyo akinhwa lina lya Petelo, na Andulea ng'wanong'wawe. Na Yakobo ng'witūnja wa ng'wa Zebedayo, hamò na Yohana ng'wanong'wawe.

³ Filipo na Batolomayo; Tomaso na Matayo, ūyo walī ntobisha wa goodi. Yakobo ng'wana Alifayo na Tadayo;

⁴ Simoni muna Kanaani, na Yuda Isikaliote, ūyo akabiza nodeeji wa ng'wa Yesu.

⁵ Abo ikūmi na babīlī benaba, ū Yesu akabatūma, ūbakomeleja alībawīla gīkī, “Mutizūja kū banhū ba mahanga gangī, yaya nūūlū kwingīla mu nzengo gwa Basamalia.

⁶ Alīyo ī no no no jagi kū ng'holo ja numba ya Isiraeli!

⁷ Jagi ng'ūlomeela mulīhaya gīkī, ‘Ū būtemi bo ng'wigūlū wegeelaga.’

⁸ Ng'ūbapīja a basaatu, na a bafu ng'ūbajūūcha, pye na a ba mbiji ng'ūbeeja, na a masamva ng'ūgapeeja. Ng'wanukūlaga dalali, ning'we funyagi dalali.

⁹ Yaya ū kūja na zahabu nūūlū feza, nūūlū hela mu mhīnda jing'we.

¹⁰ Nūūlū ifulushi lya shikolo sha mu lūgendo yaya ū kūbūūcha. Yaya nūūlū ng'hanjo ibīlī, nūūlū shilatū, nūūlū shiliwa, nūūlū nanga. Nguno ū ntūmami shing'wigeleelilwe alang'hanwe.

¹¹ Hama nīyo ūlū ng'wingīla mu mkaya nebe, nūūlū chalo shilebe, būgīlījagi mo ūlū alīmo munhū ntengeke, ng'wikale ha ng'wakwe kūshisha ng'wīnge ī lipandī lyenīlo.

¹² Būlī ha kaya yene ūlū ng'ūshika bagīshagi.

¹³ Ī kaya yenīyo ūlū yūbiza ya longe, ī mhola ying'we yikale hamò nabo, alīyo ūlū ītī chene, īkūmushokela ī mhola ying'we!

¹⁴ Na hangī ūlū atīho wa kūng'wanukūla, nūūlū kwīdegeleka ī mihayo ying'we, ūlū mulīnga a ha kaya yenīyo, nūūlū ū mu nzengo gwenūyo, lūkung'unhagi nū lūbuubu lo sheshe ūlo lūli kū mhambala jing'we ulu mlenga mkaya jenejo.

¹⁵ Nalīmuwīla gwa ng'hana gīkī, a ha lūshikū lo kūlamulwa, ū nsango gwa banhū ba mu nzengo gwenūyo gūkūbiza ntaale no, kūtinda ū gwa bana Sodoma na bana Gomora.”

¹⁶ “Managi gīkī nalīmutūma gītī ng'holo kūja kwisanja ng'widale lya mhūge; bizagi bachagūku gītī nzoka, alīyo balyehu gītī ng'hūūlū.

¹⁷ Hangī ilang'hanagi a banhū, nguno bakūyūmutwala kū mabanza na kū masinagogi gabo kūjūmutūla.

¹⁸ Mukūyūshishiwa na kū būtongi bo basugi na batemi kūlwa nguno yane, būbize ho būkaanīji kūbo na kū mahanga.

¹⁹ Alīyo ūlū būmutwala gīko, yaya ū kwandya kwiganika ganika, gīkī hīmba mukūsomboola kī nūūlū mukūshosha ginehe. Nguno ū ng'wikanza lyenīlo mukwinhwa ū gwa kūhaya.

²⁰ Mutūbiza mukūyombaga bing'we benekīlī, Moyo wa ng'wa Sīng'we h'ūyo akūbiza akūyombaga ū mu bing'we.”

²¹ “Būkūbiza ho wilodeeji bo kwenheleja banhū nūūlū kūcha; īkūdūlīkana ū munhū kūnodeela nūūlū ng'wana ong'wawe gīkī abūlagwe. Nūūlū ū myaji akūng'wītīla gīko ū ng'wana wakwe; nīyo a bana bakūyūbatalūkīla a babyaji babo bababūlaga!

²² Hama būlī kwene pye a banhū bakūmukolwa, kūlwa nguno ya lina lyane. Alīyo ū wa kwiyūmīlīja kūshisha kū ngelelo akūpīla.

²³ Na lūūlū ūlū būmuluhya mu nzengo ūyū, peelelagi mu gūngī; nguno nalīmuwīla gwa ng'hana gīkī, mutūdūla ū kwītang'anhya pyī ī mizengo ya Baisilaeli aho ataalī kwiza ū Ng'wana wa Munhū!

²⁴ Ū ng'hemba atūdūla kūnkīla ū nangi wakwe; pyī nū nsese atūdūla kūbiza higūlya ya ng'wa ise būgonzo.

²⁵ Ū ng'hemba ūlū ūlenganīla nū nangi wakwe wigejaga; pyī nūūlū ū nsese ūlū ūlenganīla nū ise būgonzo. Ūlū balīgima kūng'witana Belizebuli ū ng'wenekīlī kaya, a ba mu kaya yakwe pye a bose bakūbīītīla yabūbi na kūtinda ho!”

Ūyo shiigelile kūng'ogoha

²⁶ “Mutabogohage a banhū, nguno gūtīho mhayo gūkundīkīgije, ūyo gūtūkundūlīlwa; nūūlū gwibisile, ūyo gūtūtendwa ha ng'wape.

²⁷ Ali lūūlū, īyo nakūmuwīlaga mu mbisīla, a bing'we īhayagi bo hape hape; nī yīyo mukwihwetelaga, a bing'we ihayagi n'ilaka lya kūhamuka niyo higulya ya shikungu sha numba, bīyigwe pye a banhū.

²⁸ Hangī mutabogohage abo bakabūlagaga mīlī, alīyo batī na būdūla bo kūgūbūlaga ū moyo. Alīyo ī no no no ng'ogohagi ūyo alī na būdūla bo kūgūbūlaga ū mīlī nū moyo, ha numa ūshiponya mu nsango gwa moto!

²⁹ Angū, ī tūjū īj'ibīlī, jitūdūla kūjinjiwa nūūlū shilingi īmò dūhū? Alīyo nalīmuwīla gīkī, ītīko kūgwa ha sī nūūlū īmò yajo aho atamanile ū Sīng'we.

³⁰ Lelo a bing'we, nī nzwīlī jing'we ī ja mu ntwe pyī ī jose jibalilwe.

³¹ Nose hū kūhaya mutogohage, nguno a bing'we mujiheebile kūle ī tūjū, nūūlū jikakwīla na ginehe!”

³² “Hūna lūūlū, ūyo ūnizunya na ūnikaanīla kū būtongi bo banhū, nū nene nakūnkaanīla ū kū būtongi bo ng'wa Baba ūyo alī ng'wigūlū.

³³ Alīyo ūyo ūnilema kū būtongi bo banhū, nū nene nakūnema ū kū būtongi bo ng'wa Baba ūyo alī ng'wigūlū.”

³⁴ “Lekagi ū kwiganika gīkī nenhile mhola ū mu sī; yaya natenhile mhola, nenhile līlūshū.

³⁵ Nguno nenhile wilemeelwa, munhu akwilemeelwa na ise, nū nshīke akwilemeelwa, ū ng'wīnga nag'hwe akwilemeelwa na nina būko.

³⁶ Nīyo a banishi ba ng'wa munhū bakūbiza ba mu kaya, ūmo akwikalaga.

³⁷ Ūyo antogilwe ise nūūlū nina kūtinda kūnitogwa nene, ū ng'wenūyo atanigeleelilwe. Nū wa kūntogwa ng'witūnja nūūlū nshīke wakwe kūtinda nene, nang'hwe atanigeleelilwe.

³⁸ Hama nū yūyo atibūūkīja nsalaba gokwe na kūnilondeela, nū ng'wene atanigeleelilwe.

³⁹ Nīyo ūyo wipandīkīla būpanga bokwe, akūbūjimīīja; alīyo ūyo ūbūjimīīja ū būpanga bokwe kūlwa nguno yane, ū ng'wenūyo akūbūpandīka.”

Mihayo ya mheela

⁴⁰ “Ūlū munhū ose ose ūng'wanukūla a bing'we, ū ng'wenūyo wananukūlaga nene. Hama ūyo ūnanukūla nene, numho wang'wanukūlaga ūyo anitūmile.

⁴¹ Ūyo ūng'wanukūla ng'hangi mu lina lya gīkī alī ng'hangi, nang'hwe akwinhwa mheela ya ng'hangi. Nū yūyo ūng'wegeleja ntūngīlīja mu lina lya gīkī ntūngīlīja, nang'hwe akwinhwa mheela ya ntūngīlīja.

⁴² Na hangī ūlū munhū ūng'winha shikombe sha minzī ga kūng'wa, nūūlū ūmò wa bahemba bane a bado bado aba, īkī alī ng'hemba wane, nalīmuwīla gwa ng'hana ū munhū ng'wenūyo atūgayiwa mheela na hado yaya.”