Maliko 8 - Bibilia Ilagano Lya Kale 2015

Kūlisha banhū shihūmbī shine

¹ Ū mu shikū jenījo libilinga hangī ibita itaale, alīyo baalī batī na shilīwa. Hūna ū Yesu ūbitana a bahemba bakwe ūbawīla gīkī,

² “Nalībasaatwa a banhū nguno ī haha jashikaga shikū idatū balī hamò nane, alīyo batī na shilīwa.

³ Ūlū nūbalaga baje kaya balī nzala, badūgije nūūlū kūgwa wesa mu nzīla, nguno bangī bazengile kūle.”

⁴ Nabo a bahemba bakwe būnshokeja gīkī, “Ū mu matogolo ūmu, munhū adūgije kūpandīkīla halī shilīwa sha kūbigela a banhū na wingī aba?”

⁵ Nang'hwe ūbabūja, “Mulī na migatī yīnga?” Būhaya, “Mpungatī.”

⁶ Hūna ūlagīla gīkī a banhū bigashe ha sī. Wīsola ī migatī mpungatī yenīyo, ūlūmba, wīmeganya, ūbinha a bahemba bakwe bīgabanhye, ng'hana būbagabanhya a banhū.

⁷ Baalī na tūdīlo tūgehu, nū twene ū Yesu ūlūmba kūlwato, ūlagīla nato tūgabanhyiwe.

⁸ Bakalya bigeja; aho bagasoleela a masaajiwa, bokaja matangwa mpungatī.

⁹ Abo bakalya baalī gītī banhū shihūmbī shine, hūna ūbalaga būsambaala.

¹⁰ Haho na haho ū wei na a bahemba bakwe, bingīla mu lyato būja mhandī ja Dalimanūta.

Kūkooba shimanīkījo

¹¹ Hūna Bafalisayo būnsanga ū Yesu, bandya kūng'wihalalīja balīkooba shimanīkījo sha kūfuma ng'wigūlū.

¹² Nang'hwe ūkuuma n'ilaka lya koolecha kūbasaatwa mu moyo; hama ūhaya, “Nibūlī ī shibyalīlwe īshi shikūkoobaga shimanīkījo? Nalīmuwīla gwa ng'hana gīkī, ī shibyalīlwe īshi shitūdūla kwinhwa shimanīkījo na hado yaya.”

¹³ Ūbaleka, wingīla mu lyato hangī ūja kū nkīlo.

Shibimbya sha Bafalisayo na Helode

¹⁴ Bība kūsola migatī, būbiza batī na gīnhū, ūlū ītī ngatī gūmò dūhū ūyo baalī nago ū mu lyato.

¹⁵ Kwimanīla ū Yesu wabahūgūla alīhaya gīkī, “Ikalagi miso, ng'wilang'hane ū kū shibimbya sha Bafalisayo nī sha ng'wa Helode.”

¹⁶ Alīyo a boi bandya kwilūnjalūnja, baliwīla gīkī, “Hamo shi īkī tūtī na migatī!”

¹⁷ Aho wadeeba ūbawīla, “Nibūlī muliwīla gīkī, hamo īkī mutī na migatī? Mutaalī dūhū ū kwitegeleja nū kūmana? Ni ginehe īng'holò jing'we jitaalī ndito gīko?

¹⁸ A miso mulī nago, alīyo gashi ū kūbona ndūhū! Na a matū mulī nago, alīyo ū kwigwa yaya! Mutūgemaga ū kwizūkwa nūūlū hado.

¹⁹ Aho nakīmeganya ī migatī īyo ītanò kūlwa banhū shihūmbī shitanò, mukokaja matangwa ganga a ga masaajiwa?” Būng'wīla, “Ikūmi na abīlī.”

²⁰ “Al'ī migatī mpungatī, īyo baalī balya banhū shihūmbī shine, aho ng'wagasoleela a masaajiwa ng'walī ng'okaja matangwa ganga?” Būng'wīla hangī, “Mpungatī.”

²¹ Hūna ūbabūja, “Mutaalī dūhū ū kwitegeleja?”

Kūpījiwa kwa mboku wa Betisaida

²² Būshikīīla Betisaida, a banhū ba kwene būng'wenhela munhū mboku, būng'wikūmbīlīja ankuumye.

²³ Nang'hwe ūndima nkono ū mboku ūmfunya hanze ya nzengo. Ūnswīla mate ū kū miso, ūntūūlīla na makono; hūna ūmūja, “Ūlībona shose shose?”

²⁴ Aho wabūūcha ū būshū gīkī alole, ūhaya; “Nalībona banhū balīyeela yeela, alīyo balī gītī mitī.”

²⁵ Ūntūūlīla hangī makono ū kū miso gakwe, ūpīla. Aho walola ūshibona chiza pyī ī shikolo.

²⁶ Ū Yesu ūng'wīla aje kaya, ūnkomeleja gīkī, “Nīyo ūtizingīla nū mu nzengo.”

Būkaanīji bo ng'wa Petelo

²⁷ Ū wei ū Yesu na a bahemba bakwe būgoloola bajile mhandī ja Kaisalia Filipi. Aho balī mu nzīla, ūbabūja gīkī, “A banhū bakūnihayaga nalī nani?”

²⁸ Būnshokeja balīhaya, “Ūlī Yohana Matīīja, alīyo bangī gīkī ūlī Eliya, na bangī hangī gīkī ūlī ūmò wa bahangi.”

²⁹ Hūna ūbabūja nabo gīkī, “Al'a bing'we mukūnihayaga nalī nani?” Petelo ūng'wīla, “Ūlī Kilisito.”

³⁰ Na lūūlū ūbahana batizūng'wīla munhū nūūlū ūmò ū mhayo gwenūyo.

Kūbalanga ya kūcha na kūjūūka kwakwe

³¹ Hūna wandya kūbalanga gīkī, “Ū Ng'wana wa Munhū shing'wigeleelilwe aluhiwe mu mihayo mingī; na kūleng'wa na banamhala, hamò na bagabīji bataale na balangi ba shilagīlo.” Na gīkī, “Akūbūlagwa alīyo akūjūūka ha numa ya shikū idatū.”

³² Ū mhayo gwenūyo akagūhaya hape hape gete. Ī likanza lyenīlo ū Petelo ūmpūnja ha mhūjo, wandya kūng'hama.

³³ Alīyo ū wei ūbagalūkīla a bahemba bakwe, hūna ūng'hama ū Petelo alīng'wīla gīkī, “Īngaga ū kū būtongi bone; Shetani. Nguno ū bebe ūtiganikaga ya ng'wa Mulungu, ūlī mu ya banhū dūhū!”

³⁴ Ha numa ūlitana ī libita hamò na a bahemba bakwe; ūbawīla gīkī, “Ose ose ūyo atogilwe kūnilondeela nene, shiigelile idalahe wei ng'wenekīlī, ibūūkīje nsalaba gokwe, h'anilondeele.

³⁵ Nguno būlī ng'wene ūyo atogilwe kūbūpīja būpanga bokwe, akūbūjimīīja, alīyo ūyo ūbūjimīīja ū būpanga bokwe kūlwa nguno yane na kūlwa nguno ya Ng'hūlū Jawiza, ū ng'wenūyo akūbūpīja.

³⁶ Angū, ū munhū akūbiza na solobo kī nūūlū akīpandīka pyī ī sī, alīyo ū būpanga bokwe ūbūjimīīja?

³⁷ Nūūlū hangī ū munhū adūgije kūfunya shikolo kī kūlwa kūkomoola būpanga bokwe?

³⁸ Nguno ose ose, ūyo ūnibonela minala ū nene nī mihayo yane ū mu shibyalīlwe īsho shitankūgije Mulungu na sha shibi īshi, nang'hwe ū Ng'wana wa Munhū akūmonela minala ū munhū ng'wenūyo, ū ng'wikanza lya kwiza hamò na bamalaika beela, ng'wikūjo lya ng'wa Ise.”