Maliko 14 - Bibilia Ilagano Lya Kale 2015

Long'we ya kūmūlaga Yesu

¹ Aho jasaaga shikū ibīlī īshike pasaka na shigukulu sha migatī ītī na shibimbya, a bagabīji bataale na a balangi ba shilagīlo, bandya kūkooba nzīla ya kūndima ū Yesu mu nyasala sala bamūlage.

² Alīyo bakiwīla gīkī, “Yaya ū ng'wikanza lya shigukulu, batizīīta nsambo a banhū.”

Yesu kwitīīlwa maguta

³ Aho alī Betania akigasha kūlya shilīwa mu numba ya ng'wa Simoni, munhū wa mbiji. Kūhayimanīla wiza nkīma abūūkije jūbba ya alabasta, yalī na maguta ga mpango ntaale ga nalido. Ūshika wībela, ūng'witīīla ū Yesu kū ntwe a maguta genayo.

⁴ Bamò būsaaya no, bandya kūng'ung'uula balīhaya, “Al'ū būkenaagūji bo maguta ūbū nabo bofuma he hangī?

⁵ Nguno a maguta genaya gaalī gashikile kūjinjiwa, jilonga denali ja kūkīla ha magana adatū, būgabanhyiwa bahabī!” Akabapelanya no ū nkīma ng'wenūyo.

⁶ Alīyo ū Yesu ūbawīla gīkī, “Nekagi ū mayū ng'wenūyū, nibūlī mulīnkoyacc ū nīmo ūyo wanibeegeja nene gwenūyū gwawiza.

⁷ Nguno a bahabī a bene mulī nabo gwa gwa gwa, ikanza lyose lyose mudūgije kūbīītīla ī yawiza ūlū ng'ūtogwa, alīyo ū nene natūbiza hamò ning'we shikū jose.

⁸ Ū wei wagwīta ūyo agūdūgije, wagūbila maguta ū mīlī gone kūlwa ikanza lya kūjīkwa.

⁹ Nīyo nalīmuwīla gwa ng'hana gīkī, hose hose ū mu sī ūko jikūlomeelwa ī Ng'hūlū Jawiza, nū mhayo ūyo wagwīta gwenūyū gūkūhayiwa kūlwa kūng'wizūkwa.”

Wijomboki bo ng'wa Yuda

¹⁰ Hūna ū Yuda Isikaliote, ūyo walī ūmò wa babo ikūmi na babīlī, ūja kū bagabīji bataale, ūūkabawīla ūmo alaboolekegeje bandime ū Yesu.

¹¹ Aho bigwa būyega no, būng'wisagīja kūng'winha hela. Hūna wandya kūkooba ng'wanya gwa kūboolekeja balandime.

Kūlya pasaka na bahemba

¹² A ha lūshikū lo kwandya lo migatī ītī na shibimbya, ūlo lwalī lo kūsīnzwa shitambo sha pasaka, a bahemba bakwe bakamūja gīkī, “Ūtogilwe kwīlīīla halī ī pasaka tūje tūkīlonja lonje?”

¹³ Hūna ūbatūma babīlī ba bahemba bakwe; ūbawīla gīkī, “Jagi ū mu nzengo, ūlū mulashike mo mukūmona ngosha aseselile shisaabo sha minzī, nondeelagi.

¹⁴ Aho alakingīle, mukūshika mung'wīle ū ng'wenekīlī kaya, ‘Ū Nangi alībūja gīkī, Shilī halī ī chumba shane ūmo nakūlīīla pasaka hamò na bahemba bane?’

¹⁵ Akūng'oolekeja kū golofa, shilīko chumba shitaale shigolanije ng'hana ng'hana, tūlonja longejagi ng'wenūmo.”

¹⁶ A bahemba benabo aho baja ū mu nzengo būsanga gīt'ūmo akabawīlīla, ng'hana bīlonja lonja ī pasaka.

¹⁷ Yahayūbiza mhīndī, wiza nabo abo ikūmi na babīlī,

¹⁸ ūshika wigasha hamò nabo. Aho bandya kūlya, ū Yesu ūhaya, “Nalīmuwīla go ng'hana gīkī, a bing'we abo mulīlya hamò nane, ūmò wing'we akūnilodeela!”

¹⁹ Bakapīnīhala no būyūmūja; būlī ng'wene wahaya, “Hamo nene?”

²⁰ Nang'hwe ū Yesu ūhaya, “Ūmò wing'we abo ikūmi na babīlī, nīyo alīkoja nang'hwe ī nhonge jakwe ūmo nalīkoja ū nene!

²¹ Ū Ng'wana wa Munhū ajile gīt'ūmo andīkīlilwe, alīyo alī mu kwihīga kūtaale no ū munhū ūyo alīnodeela ū Ng'wana wa Munhū. Yalī hambū hambū ū munhū ng'wenūyo ūlū ni olī atabyalilwe!”

Kūtūūlwa sangīla

²² Hūna lūūlū aho balīlya, ūsola ngatī. Ūlūmba hūna ūgūmeganya, ūbinha kūnū alīhaya gīkī, “Anukūlagi mulye, ū gwenūyū mīlī gwane.”

²³ Ūsola na shikombe, aho wamala kūlūmba ūbinha būshing'wela pye a bose.

²⁴ Hūna ūbawīla gīkī, “A genaya gene mininga gane g'ilagane, ayo galidīka kūlwa nguno ya banhū bingī.

²⁵ Nalīmuwīla gwa ng'hana gīkī, natalang'wa hangī sha kūfuma mu matwajo ga nzabibu na hado yaya kūshisha mu lūshikū lo kūng'wa shipya mu būtemi bo ng'wa Mulungu.”

²⁶ Aho bamala bīmba lyīmbo, hūna būfuma hanze būja kū lūgūlū lo mizeituni.

Petelo akūnema Yesu

²⁷ Hūna ū Yesu ūbawīla gīkī, “Pye a bose mukūnipeela, nguno gwandīkilwe gīkī, ‘Nakūntūla ū ndīīmi, jibbalasane ī ng'holo!’

²⁸ Gwike ūlū najūūka, nakūtonga kūja Galilaya, namutange ū ūshika ko.”

²⁹ Alīyo ū Petelo ūng'wīla gīkī, “Nūūlū bakakūleka pye a bangī, ū nene ng'wene ngilo!”

³⁰ Ū Yesu ūng'wīla, “Nalīkūwīla gwa ng'hana gīkī, ū būjikū wenūbū, aho ng'hungulume ītaalī kwishokeela kūhīla, ū bebe ūkūbiza onilemaga ng'hangala idatū!”

³¹ Alīyo ū Petelo ongeja kūhaya gīkī, “Ū nene nūūlū yūnigeleelwa kūcha nang'ho, natīko ū kūkūlema!” Na a bangī pye būhaya gīko.

Kūlomba mu Getisemani

³² Aho bashika h'ipandī litanagwa Getisemani, ū Yesu ūbawīla a bahemba bakwe gīkī, “Igashagi aha, ū nene nakalombe.”

³³ Hūna ūbasola ba Petelo na Yakobo na Yohana, ūgwīlwa būpīna būdito būminya no.

³⁴ Ūbawīla gīkī, “Īng'holò yane īlī na būpīna būdito no bo kūshisha mu kūcha. Lembeelagi henaha ng'wikale miso.”

³⁵ Ūja ha būtongi ho hado, ūūkiponeja ha sī, ūlomba gīkī ūlū yūdūlīka, ī likanza lyenīlo līmītīīle.

³⁶ Ūhaya, “Aba, Baba, pyī ī yose īdūlīkanile ū kūlī bebe, nīngījage ī shikombe shenīshi, gwike īt'ūmo natogelilwe nene, alīyo ūmo ūtogelilwe bebe!”

³⁷ Wahayūshoka aho baalī, ūbasanga balaalaga, ūng'wīla ū Petelo gīkī, “Simoni, olaalaga? Olemeelwa ū kwiyūmīlīja kwikala miso nūūlū ikanza lya sa īmò dūhū?

³⁸ Ikalagi miso mulombe mutizingīla mu kūgeng'wa, nguno ū moyo gūkalalilwe, alīyo ū mīlī ng'winogolelwa!”

³⁹ Ūja hangī ūūkalomba alīhaya mihayo h'ī yenīyo dūhū.

⁴⁰ Aho washoka nī hangī ūbasanga balaalile, nguno a miso gabo gaalī gadidoha; būlemeelwa nū mumo bang'wīlīle.

⁴¹ Wahayūshoka hangī lūkangala lo kadatū ūbawīla, “Nī haha mutaalī mulaalile mukwigoloolaga dūhū? Ng'wigejaga lūūlū. Lyashika ī likanza, ū Ng'wana wa Munhū atūūlwe mu makono ga banhū ba shibi.

⁴² Būūkagi tūje, angū mulībona gīkī wegeela ū nodeeji wane!”

Kūlodeelwa na kūding'wa kwa ng'wa Yesu

⁴³ Ū Yesu aho ataalī ūyomba gīko, kūhayimanīla haho na haho washika ū Yuda, ūyo walī ūmò wa babo ikūmi na babīlī. Wiza n'ibita lya banhū babūūkije mapanga na milang'ha, bafumile kū bagabīji bataale na balangi ba shilagīlo, na banamhala.

⁴⁴ Ū nodeeji olī obinha shimanīkījo; ūbawīla gīkī, “Ūyo nalambipe hū ng'wene, ndimagi muntwale munkalaganile!”

⁴⁵ Ū Yuda aho oshika, haho na haho ūng'wegeela ū Yesu kūnū alīhaya, “Nangi!” Hūna ūmbipa.

⁴⁶ Na ng'hana būndima na makono gabo, būng'haja!

⁴⁷ Ūmò wa babo baalī nū Yesu olī na līlūshū, ūlīsopoola; ūlīhubenga lyūbītīla gūtū go ntūmami o ngabīji ntaale, gūtīnīka!

⁴⁸ Hūna ū Yesu ūbawīla a banhū benabo gīkī, “Ng'wiza kūnidima mubūūkije mapanga na milang'ha gītī nalī nsambo?

⁴⁹ Īkī ng'walī mutūnidimaga a makanza ayo nalūdīlaga nigashaga mu hekalu būlī lūshikū nakūlangaga! Gwike leka shishikīlījiwe ī shandīkwa!”

⁵⁰ Hūna būmpeela pye a bahemba, būneka!

⁵¹ Sūmba nebe ūnkūūbīja igumīīlile kache mbeho, būndima nang'hwe.

⁵² Gwike ūbipūlūka ūpeela; ūja alī dūūhū, wīleka ī kache mbeho!

Yesu ng'wibanza lya Bayudaya

⁵³ Hūna lūūlū būntwala ū Yesu kū ng'wa ntaale wa bagabīji. Pye a bagabīji bataale, na a banamhala na a balangi ba shilagīlo baalī bibilingīla henaho.

⁵⁴ Nū Petelo ūnkūūbīja alī ka kūle ho, kūshisha nang'hwe ūshika nose a ha ng'wa ntaale wa bagabīji. Wingīla ū mu gwalugwa, wigasha na batūmami wandya koota moto, gwaligimaga!

⁵⁵ A bagabīji bataale nī libanza ī lyose, būyūkooba kooba būkaanīji, gīkī bapandīke nzīla ya kūmūlaga ū Yesu, alīyo batapandīkile.

⁵⁶ Bakaanīji bingī balomolomo būyūnkaanīla, gwike ū būkaanīji wabo walemaga ū kūlenganīla.

⁵⁷ Nose bīmīīla banhū balebe, būnkaanīla mu kūnembekeja balīhaya,

⁵⁸ “Ū ng'wing'wana ng'wenūyū twang'wigwile alīhaya gīkī, ‘ī hekalu ya kūbeejiwa na makono yenīyī nakwīsambagūla, ha numa ya shikū idatū nabize nazengile yīngī, īyo ītī ya kūbeejiwa na makono!’”

⁵⁹ Alīyo na a bene hū gūmò, ū būkaanīji wabo būtalenganīlile.

⁶⁰ Kwimanīla ū ntaale wa bagabīji wīmīīla ū ng'wibanza; ūmūja ū Yesu, “Nibūlī ūtūshoshaga nūūlū mhayo ū mu yose īyo balīkūkaanīla a benaba?”

⁶¹ Alīyo ū Yesu akikala ahuumūlile sele dūhū, atashokije nūūlū hado. Ū ntaale wa bagabīji ūmūja hangī alīhaya gīkī, “Ū bebe, h'ūlī Kilisito ng'wana wakwe ū nkumīlījiwa?”

⁶² Ū Yesu ūhaya, “Nalī ng'wene, nīyo nalīmuwīla gīkī, mukūmona ū Ng'wana wa Munhū igashije kū nkono gwa būlyo gwa būdūla, aliza na malunde ga ng'wigūlū.”

⁶³ Ū ntaale wa bagabīji ūtandūla ng'hanjo yakwe kūnū alīhaya gīkī, “Tūtaalī na nguno kī hangī nabo a bakaanīji?

⁶⁴ Angū ng'wawigwa ū būgimu bokwe! Ī gīsī lūūlū mulībona ginehe?” Pye a bose būnamula gīkī, wigeleelagwa kūcha.

⁶⁵ Bamò babo bandya na kūnswīla mate, na kūyūnkundīkīja ū kū miso, bantūla kūnū balīng'wīla gīkī, “Manījaga!” Hūna a balang'hani ba hekalu būnsola, būkalinhya kūntūla mapī!

Petelo kūnema Yesu

⁶⁶ Ū Petelo aho alī ha sī ū mu gwalugwa ng'wenūmo, kwimanīla nkīma wizīīla hoi; walī ūmò wa batūmami ba ha ng'wa ntaale wa bagabīji.

⁶⁷ Wahayūmona ū Petelo aloota moto ūnkalalīla, hūna ūng'wīla gīkī, “Tūhaya nū bebe walikalaga nang'hwe ū Yesu, ū muna Nazaleti!”

⁶⁸ Ūlema no; kūnū alīhaya, “Bebe mayū, ū nene natūgūmanaga ūyo ūlīgūhaya, nīyo natūgwitegelejaga nūūlū hado!” Ūfuma wīnga a henaho, ūja kū gwalugwa ya kū būtongi, ng'hungulume yūhīla.

⁶⁹ Ū ntūmami nkīma ng'wenūyo ūmona hangī; wandya kūbawīla abo baalī bīmīīla hihī henaho gīkī, “Nū ng'wenūyū alī ūmò wabo!”

⁷⁰ Alīyo nī hangī ūlema ūsheshanīla! Aho kabīta kakanza kado, nabo abo baalī bīmīīla haho nang'hwe, būng'wīla gīkī, “Ī gete ng'hana nū bebe ng'wing'wana ūlī ūmò wabo, angū nīyo nū bebe ūlī muna Galilaya!”

⁷¹ A henaho lūūlū wandya kūzuma na kwilahīla; akūhayaga gīkī, “Ū nene nataamanile gete ū munhū ūyo mulikala ng'ūng'haya ng'wenūyo!”

⁷² Haho na haho yishokeela kūhīla ī ng'hungulume. Nang'hwe ū Petelo ūgwizūkwa ū mhayo ūyo Yesu walī wang'wīla gīkī, “Ī ng'hungulume aho ītaalī kwishokeela kūhīla, ū bebe ūkūbiza wanilemaga ng'hangala idatū!” Wahayūgwideedeng'hanya ūlīla!