Maliko 13 - Bibilia Ilagano Lya Kale 2015

Kūkambagūlwa kwa hekalu

¹ Hūna ūfuma ū mu hekalu, aho alīja, ūmò wa bahemba bakwe ūng'wīla gīkī, “Nangi ūlīgabona ūmo galī a mawe genaya na a manumba aya!”

² Nang'hwe ū Yesu ūng'wīla gīkī, “Ūlīgabona ūmo galī ū būtaale a manumba genaya? Lītīho iwe a henaha īlo līkūlekwa higūlya y'iwe lichalyo, īlo lītūholomolelwa ha sī!”

Wandījo bo makoye

³ Hūna ūūkigasha mu lūgūlū lo mizeituni, ūlolela ū kū hekalu, ba Petelo na Yakobo hamò na Yohana na Andulea baalī nang'hwe boi dūhū; būmūja balīhaya,

⁴ “Alitūwīlage ī yenīyī īkūbiza ho nanalī, na hangī shikūbiza ho shimanīkījo kī ūlū yegeela kūshikīīla pyī ī yose?”

⁵ Hūna lūūlū ū Yesu ūbawīla gīkī, “Ilang'hanagi munhū ose ose atizūmulemba lemba.

⁶ Nguno bingī bakūyiza mu lina lyane balīhaya gīkī, ‘Ū nene hū nalī ng'wene!’ Nīyo bakūhūbya banhū bingī no.

⁷ Hama ūlū ng'wandya kwigwa mabūlūgū na ng'hūlū ja mabūlūgū, yaya ū kūfung'wa ng'holò, nguno ī yenīyo shiigelile ībize ho; alīyo ī ngelelo īkūbiza ītaalī ū kūshika.

⁸ Nguno būkūbiza ho wiyūbūkīji ha gatī y'ihanga n'ihanga, na būtemi kū būtemi. Jikūyūding'hima nyahīnga, na kwilonga nzala mu mapandī mingī. Ī yenīyī īlī gītī wandījo dūhū wa kūlung'wa būsūngū.”

⁹ “Gwike a bing'we ilang'hanagi, nguno bakūyūmutwala kū mabanza, hangī mukūyūtūlīlwa na mu masinagogi. Mukūbīta na kūshishiwa kū būtongi bo basugi na batemi kūlwa nguno yane, būbize ho būkaanīji kūbo.

¹⁰ Ī Ng'hūlū Jawiza shiigelile jilomeelwe tame hose pyī ū mu mahanga.

¹¹ Ūlū bamudima kūmutwala, yaya ū kwandya kwiganika ganika ūmo mulasomboolele, alīyo gose gose ūyo ng'winhwa ū ng'wikanza lyenīlo gūhayagi. Nguno mutūbiza mukūhayaga bing'we; ū ng'wenūyo Moyo Ng'wela.

¹² Munhū akūnodeela kūbūlagwa nūūlū ng'wanong'wawe, nū namhala akūnodeela nūūlū ng'witūnja wakwe. Hama a baana bakūyūbatalūkīla a babyaji babo bababūlaga!

¹³ Nīyo pye a banhū bakūmukolwa kūlwa nguno ya lina lyane; alīyo ūyo wiyūmīlīja kūshisha kū ngelelo akūpīla.”

Būluhi būtaale

¹⁴ “Hūna lūūlū ūlū ng'ūshibona ī sha malofu ī shikenaagūji shīmīīla h'ipandī īlo shitigeleelilwe, (ūyo alīsoma ni itegelejage), a henaho abo balī mu sī ya Būyudaya, ni bapeelelage kū ngūlū.

¹⁵ Ūyo ūsangwa alī kwigūlya ya numba atizika, gīkī ingīle mu kaya yakwe kūsola shose shose kūfuma moi.

¹⁶ Nū yūyo alī kū malaale atizūshoka kū numa, kūsola shizwalo shakwe.

¹⁷ Ū mu shikū jenījo, bakūbiza mu makoye mataale no abo bakūsangwa balī nda, na a babo bakūbiza bakonhyaga.

¹⁸ Lombagi ū mhayo gwenūyo gūtizūbiza mu shikū ja mbeho ya mu shiyaga.

¹⁹ Nguno ū mu shikū jenījo, būkūbiza ho būluhi būtaale no, ūbo būtaalī kwilonga kūfuma ha wandījo wa būseemi aho Mulungu akaseema, kūshisha haha, na būtalabiza ho hangī na hado yaya!

²⁰ Nīyo ūlū ni ītī kūgehiwa na Seeba ī shikū jenījo, atīho wa kūpīla nūūlū ūmo. Alīyo ī shikū jenījo, ajigehije kūlwa nguno ya basolwa, abo abasolile.”

²¹ “Hūna lūūlū ūlū munhū ose ose ūmuwīla gīkī, ‘Lolagi ūūy'aha ū Kilisito,’ nūūlū gīkī, ‘Lolagi ūko,’ yaya ū kūzunya.

²² Nguno bakwilonga bakilisto balomolomo, na bahangi balomolomo; nīyo bakūyoolecha maleeba na mihayo ya kūkamaaja, gīkī ūlū yūdūlīka, babahūmbūūle na a basolwa.

²³ Hūna lūūlū chagūkagi, ū nene namuwīlaga pyī ī yose kūko ītaalī kwilonga.”

Kwiza kwa Ng'wana wa Munhū

²⁴ “Alīyo ū mu shikū jenījo ūlū būbīta ū būluhi wenūbo, ī līīmi līkwītīlwa giiti, nū ng'weji gūkoya ūkūfunya ū būpe wago.

²⁵ Nī sonda jikūyūmodoka kūfuma ū kwilunde, nū būdūla bo ng'wigūlū būkūtinginyiwa.

²⁶ Hūna bakūmona ū Ng'wana wa Munhū alī mu malunde, aliza na būdūla būtaale n'ikūjo.

²⁷ Ha numa ya henaho akūtūma bamalaika baje hose hose ū mu sī bakūbabilingaga a basolwa bakwe, kūfuma wandījo wa sī kūshisha kū būgelelo w'igūlū.”

Ilangīlagi kū ntini

²⁸ “Ī haha ū mhayo gwenūyū gwilangīlagi kū ntini. A matambī ga ntī gwenūyo ūlū gandya kūsonga na kūfuluma madūūtū managana, mukamanaga gīkī gwegeelaga ū ng'waka.

²⁹ Nī mihayo yenīyī īlī gīko. Ūlū ng'ūbona yandya kwilonga managi gīkī, alī hihī, nūwe wegeelaga alī ha mita.

³⁰ Nalīmuwīla gwa ng'hana gīkī, ī shibyalīlwe īshi shitūbīta aho ītaalī kūshikīīla pyī ī yose īyī.

³¹ Ī ligūlū nī sī shikūbīta, alīyo ī mihayo yane ītīko kūjimīīla na hado yaya!”

Ūlūshikū nī likanza shitamanīkile

³² “Gwike atīho ūyo alūmanile ū lūshikū lwenūlo, nī likanza; nūūlū a bamalaika ba ng'wigūlū batamanile, pyī nū Ng'wana, ūlū atī Baba wike.

³³ Ali lūūlū, ilang'hanagi ng'wikale nzūgūlū matū, nguno mutalīmanile ī likanza līlī nanalī.

³⁴ Īlī gītī namugī kwīnga ha ng'wakwe ūja lūgendo, wīleka ī kaya yakwe īlīlang'hanwa na batūmami bakwe, būlī ng'wene ūng'winha nīmo gokwe. Ū nang'hani o ha mita ūnkomeleja kwikala nzūgūlū matū!

³⁵ Hūna lūūlū ikalagi nzūgūlū matū, nguno mutamanile aho alizīle ū ng'wenekīlī kaya. Adūgije kūdīla, hamo wiza būjikū ha gatī, hamo dilū mu mahīla ngoko, nūūlū hamo adūgije kwangūha,

³⁶ Lang'hanagi atiziza akang'wisanganīja mulaalile.

³⁷ Īyo nalīmuwīla bing'we hū nalībawīla pye a bose, ikalagi nzūgūlū matū!”