Maliko 10 - Bibilia Ilagano Lya Kale 2015

Būbi bo kūbūlaga kaya

¹ Hūna ūbūūka wīnga a henaho, ūkīla mongo gwa Yolodani, wingīla mu sī ya Būyudaya. Mabita mataale gūnondeela hangī, wandya kūbalanga gīt'ūmo wītīlaga shikū jose.

² Bafalisayo balebe būng'wegeela kūngema, būmūja gīkī, “Angū ū ngosha azunīlīgije ū kūmpeeja ū nke okwe?”

³ Nang'hwe ūshosha alībabūja gīkī, “Ū Musa amulagīlile ginehe?”

⁴ Nabo būhaya, “Ū Musa azunīlīgije kūng'wandīkīla talaka na kūneka.”

⁵ Nang'hwe ū Yesu ūbashokeja ūhaya gīkī, “Ī shilagīlo shenīsho akang'winha kūlwa nguno ya būgang'hanazu bong'holò jing'we.

⁶ Alīyo a ha wandījo wa kūseema, ū Mulungu akabaseema ngosha na nkīma.

⁷ Nose hū kūhaya ū munhū akūneka ise na nina adimane na nke okwe.

⁸ Ū mu būbīlī wabo bakūbiza mīlī gūmò, batī babīlī hangī, balī mīlī gūmò.

⁹ Kūlwa nguno yenīyo, abo badimanyiwe na Mulungu, atizigela munhū wa kūbalekanya.”

¹⁰ Aho alī mu kaya, būmūja hangī a bahemba bakwe ī mihayo yenīyo.

¹¹ Nang'hwe ūbawīla ūhaya gīkī, “Būlī ng'wene ūlū ūneka nke wakwe ūtoola ūngī akūbiza alīshihya.

¹² Nū nkīma ūlū ūneka ngoshi ūūkatoolwa kūngī, nang'hwe akūbiza alīshihya.”

Yesu na banīgīnī

¹³ Būng'wenhela na banīgīnī gīkī abakuumye, gwike a bahemba būbahama.

¹⁴ Alīyo ū Yesu aho wabona gīko ūsaaya. Ūbawīla gīkī, “Bazunīlījagi a baana bize a halī nene, mutabahangījage. Nguno ū būtemi bo ng'wa Mulungu būlī wabo a ba mbika yenīyī.

¹⁵ Nalīmuwīla gwa ng'hana gīkī, ose ose ūyo atūwanukūla ū būtemi bo ng'wa Mulungu gītī ng'wana, atīko ū kwingīla mo na hado yaya.”

¹⁶ Ūbakumbatīla na makono gakwe, hama ūbatūūlīla makono, hūna ūbafuha.

Kūlemeelwa kwa ngosha nsabi

¹⁷ Ha numa ya yenīyo ūbūūka ajile. Aho alī mu nzīla, kūhayimanīla munhū ūmò washika alīmpeeleela, ūshikīla kūntugīja mazwi. Ūmūja gīkī, “Nangi wawiza, nīīte mhayo kī nabize ng'wingīji ū mu būpanga butashilaga?”

¹⁸ Nang'hwe ū Yesu ūng'wīla, “Nibūlī ūlīnitana wawiza? Atīho wawiza nūūlū ūmò, ūlū atī Mulungu wike!

¹⁹ Ū bebe ūshimanile ī shilagīlo ūmo shihayīlile; ī gīkī, ‘Yaya ū kūbūlaga, Yaya ū kūshihya, Yaya ū kwiba, Yaya ū kūkaanīla būlomolomo, Yaya ū kūnyeecha, Nkūjage so na noko.’”

²⁰ Nang'hwe ūng'wīla gīkī, “Nangi ī yenīyī nīdimile pyī kūfuma ha būyanda bone.”

²¹ Ū Yesu ūnkalalīla mu būtogwa būtaale, hūna ūng'wīla gīkī, “Ūlīleba ho mhayo gūmò, jaga ūkashijinje ī shikolo īsho ūlī nasho ūbinhe bahabī, ūkūbiza na wibīkīja wa sabo ng'wigūlū, hūna wize ūnilondeele.”

²² Ū wei aho wagwigwa ū mhayo gwenūyo, ūgwa loolo ū mīlī, wīnga ho onzololokaga, nguno walī na sabo ningī.

²³ Hūna ū Yesu wandya kūbalola lola pye a bahemba bakwe, hama ūbawīla gīkī, “Īlī shilambu no abo balī na sabo ū kwingīla ū mu būtemi bo ng'wa Mulungu!”

²⁴ A bahemba bakakumya aho wahaya gīko. Nang'hwe ū Yesu ūshosha hangī ūbawīla gīkī, “Bing'we baana, īlī shilambu no ū kwingīla ū mu būtemi bo ng'wa Mulungu.

²⁵ Nīyo īlī shinogu ī ngamīla ū kūbīta mu kapūndū ka lūshinge, kūtinda ū nsabi kwingīla mu būtemi bo ng'wa Mulungu!”

²⁶ A henaho a kakumīje kabo kakakīlanīja. Bandya kwiwīla gīkī, “Yee! Alīyo lūūlū, nani ūyo adūgije ū kūpīla?”

²⁷ Ū Yesu ūbakalalīla, hūna ūbawīla gīkī, “Ū gwenūyū gūtadūlīkanile ū kū banhū, alīyo ū kūlī Mulungu ītī gīko, nguno ū kūlī Mulungu pyī ī yose īdūlīkanile.”

²⁸ Hūna ū Petelo ūng'wīla, “Ī gīsī angū ūlībona gīkī a bise twaleka pyī ī shose kūlwa kūkūlondeela bebe!”

²⁹ Nang'hwe ū Yesu ūhaya, “Nalīmuwīla gwa ng'hana gīkī, atīho nūūlū ūmò ūyo waleka numba nūūlū baana ba ng'wawe bagosha na bakīma, nūūlū nina, nūūlū ise, nūūlū baana bakwe, nūūlū malaale kūlwa nguno yane na kūlwa nguno ya Ng'hūlū Jawiza,

³⁰ ūyo atanukūla numba ng'hangala igana ī haha ū ng'wikanza īlī, na baana ba ng'wawe na balūmbūye, na banina, na baana bakwe, na malaale, hamò na būluhi; hama ū ng'wikanza īlo līliza akūpandīka būpanga butashilaga.

³¹ Alīyo balīho bingī abo balī kū būtongi, bakūbiza kū numa; na a babo balī kū numa, abo bakūbiza kū būtongi.”

Kūbawīla hangī ya kūcha na kūjūūka kwakwe

³² Baalī mu lūgendo, mu nzīla ya kūlinha kūja Yelusalemu, ū Yesu walī kū būtongi wabo. Nīyo baja balīkumya no, hama abo balondeelaga baalī bogoha kīngī nasho! Hūna ūbasola abo ikūmi na babīlī ūbapūnja ha mhūjo, wandya kūbawīla īyo īlang'wilongele.

³³ Ūhaya gīkī, “Ī haha tūlīlinha kūja Yelusalemu, ū Ng'wana wa Munhū akūjūtūūlwa mu makono ga bagabīji bataale na balangi ba shilagīlo, banamule nsango gwa kūbūlagwa. Ha numa bakūntūūla mu makono ga banhū ba mahanga,

³⁴ bangīmbe nyachilū na kūnswīla mate na kūntūla, hama bakūmūlaga. Alīyo akūjūūka ha numa ya shikū idatū.”

Kūkooba būtaale

³⁵ Kūhayimanīla bang'wegeela ba Yakobo na Yohana, a bitūnja ba ng'wa Zebedayo, būshika būng'wīla gīkī, “Nangi tūlī na mhayo tūtogilwe ūtwītīle.”

³⁶ Nang'hwe ūbashokeja ūbawīla, “Mutogilwe nang'wītīle kī?”

³⁷ Būnshokeja balīhaya, “Lagīlaga gīkī, a bise būbīlī wise tūligashe nang'ho ū ng'wikūjo lyako; ūmò kū būlyo wako, ūngī kū lūmoso lwako!”

³⁸ Nang'hwe ū Yesu ūbawīla, “A bing'we angū mutagūmanile ūyo mulīgūlomba! Mudūgije kūshing'wa ī shikombe īsho nalīshing'wa ū nene? Nūūlū mudūgije kūbatījiwa ū būbatīījiwa ūbo nalībatīījiwa ū nene?”

³⁹ Būnshokeja gīkī, “Tūdūgije!” Nang'hwe ū Yesu ūbawīla, “Ī shikombe īsho nalīshing'wa ū nene mukūshing'wa, nū būbatīījiwa ūbo nalībatīījiwa ū nene mukūbatījiwa.

⁴⁰ Alīyo ū gwa kwigasha kū nkono gwane gwa būlyo na gwa lūmoso, gūtī gwa kūmuzunīlīja nene, ū gwenūyo gūlī gwa banhū abo balonja longejiwe!”

⁴¹ Abo ikūmi aho bigwa bakabapelanīla a ba Yakobo nū Yohana.

⁴² Hūna ū Yesu ūbitana pye a bose; ūbawīla, “Mumanile gīkī abo bakanukūlagwa na banhū ba mahanga kūbiza basugi h'abo bakabalomaga, na gīkī a bataale mubo h'abo bakabatūmamyaga bo nguzu!

⁴³ Ū kū bing'we ītigeleelilwe ībize gīko, alīyo būlī ng'wene ūyo atogilwe kūbiza ntaale ū mu bing'we, shing'wigeleelilwe abize ntūmami wing'we.

⁴⁴ Nū yūyo atogilwe kūbiza ntongeeji ū mu bing'we abize nsese wa bose.

⁴⁵ Nguno nū Ng'wana wa Munhū atizile kūtūmamīlwa, alīyo kūtūmama na kūfunya būpanga bokwe kūbiza shikomoolelo kūlwa nguno ya bingī.”

Kūpījiwa kwa mboku Batimayo

⁴⁶ Nose būshika Yeliko, aho alīnga ū mu nzengo gwenūyo walī nabo na a bahemba bakwe, hamò n'ibita itaale. Walīho na munhū mboku akasangwa wigashaga haho na nzīla alilombeleja; ī lina lyakwe witanagwa Batimayo, ng'wana Timayo.

⁴⁷ Aho wigwa gīkī Yesu wa Nazaleti, wandya kūhamuka n'ilaka lya higūlya alīhaya, “Yesu Ng'wana wa ng'wa Daūdi, nikūlīlagwe!”

⁴⁸ Bingī būyūng'hama gīkī ahuumūle, alīyo ū wei hū ongeja ū kūhamuka alīhaya, “Ka nikūlīlagwe Ng'wana wa ng'wa Daūdi!”

⁴⁹ Ū Yesu wīmīīla ūbawīla, “Ng'witanagi.” Būng'witana ū mboku balīng'wīla gīkī, “Timbyaga ng'holò, būūkaga alīkwitana.”

⁵⁰ Wīponya ī kabbuudi yakwe, wikīndīka ng'wigūlya, hūna ūgangīla ajile ū kūlī Yesu.

⁵¹ Ū Yesu ūmūja alīhaya, “Ūtogilwe nakwītīle kī?” Nang'hwe ū mboku ūnshokeja alīng'wīla, “Nangi ka nabone!”

⁵² Hūna ū Yesu ūng'wīla, “Jaga ū kūzunya kwako kwakūpījaga.” Na ng'hana haho na haho, ī likanza lyenīlo wandya kūbona, ūja nang'hwe ū mu nzīla alīnondeela.