Maliko 1 - Bibilia Ilagano Lya Kale 2015

Būlomeeji bo ng'wa Yohana Matīīja

¹ Ūbū būlī wandījo bo Ng'hūlū Jawiza ja ng'wa Yesu Kilisito, Ng'wana wa ng'wa Mulungu.

² Jikandya gīt'ūmo andīkile ng'hangi Isaya, “Mulungu alīhaya gīkī, ‘Managa gīkī, nalīntūma ntūmījiwa wane kū būtongi wako, ūyo akūkūbeeja beegeja nzīla.’

³ Ilaka lya munhū alīhamuka mu matogolo, ‘Beeja beejagi ikūūwa lya ng'wa Seeba, goloolagi nzīla jakwe.’”

⁴ Akilonga Yohana Matīīja, walī kū matogolo walomeelaga mihayo ya būbatīījiwa kūlwa kūgalūka na kwingīla mu kūlekejiwa kwa shibi.

⁵ Pyī ī sī ya Būyudaya, na a bana Yelusalemu a bose būyūja ū kūlī we, baakatambūūla ī shibi shabo, wababatīīja mu mongo gwa Yolodani.

⁶ Ū Yohana wazwalaga shizwalo sha booya bo ngamīla, ū mu nkīmbīlī witungaga ngwasho gwa nkoba; ī shilīwa shakwe shalī njige na būūkī bo mu matogolo.

⁷ Walomeelaga alīhaya gīkī, “A ha numa yane aliza ūyo alī na būdūla kūtinda nene, ū nene natigeleelilwe nūūlū kwinama kūtaligūla matungījo ga shilatū shakwe.

⁸ Ū nene nalīmubatīīja mu minzī, alīyo ū ng'wene akūmubatīīja na Moyo Ng'wela.”

Kūbatījiwa kwa ng'wa Yesu

⁹ Hūna ū mu shikū jenījo, ū Yesu wīnga ī Nazaleti ya Galilaya, wiza kūlī Yohana kūbatījiwa mu mongo gwa Yolodani.

¹⁰ Aho wafuma ū mu minzī, haho na haho ūlībona ī ligūlū lyakundūka, na Moyo alika gītī ng'hūūlū kwiza halī we.

¹¹ Ha numa ilaka lyūfuma ū ng'wigūlū līlīhaya gīkī, “Ū bebe ūlī Ng'wana wane Ntogwa, ūyo nakūyegelile hataale no.”

Kūgeng'wa kwa ng'wa Yesu

¹² Haho na haho ū Moyo ūntwala ū Yesu kū matogolo.

¹³ Ūūkikala kwenūko shikū makūmi ane akūgemagwa na Shetani; na mashiinū gaalīkoi. Alīyo baalīho bamalaika bantūmamīlaga.

Yesu wandya milīmo mu Galilaya

¹⁴ Ū Yohana aho waponyiwa mu jeela, ū Yesu wiza Galilaya akūlomeelaga Ng'hūlū Jawiza ja ng'wa Mulungu.

¹⁵ Wajaga alīlomeela alīhaya gīkī, “Ī likanza lyashikaga, ū būtemi bo ng'wa Mulungu wegeelaga, galūkagi mujizunye ī Ng'hūlū Jawiza!”

Kwitanwa kwa bahemba bane

¹⁶ Lūshikū lūmò aho alīshimīza kū mbalama ya nyanza ya Galilaya, ūmona Simoni na Andulea ng'wanong'wawe; bategaga ntego mu nyanza, nguno baalī bategi ba ndīlo.

¹⁷ Ū Yesu ūbawīla gīkī, “Nilondeelagi nakūng'wīta mubize bazubi ba banhū.”

¹⁸ Ng'hana haho na haho bīleka ī mitego yabo, būnondeela.

¹⁹ Aho waja hangī ha būtongi ho hado, ūmona Yakobo ng'wana Zebedayo na Yohana ng'wanong'wawe; nabo baalī mu lyato bakūbeeja beejaga mitego.

²⁰ Na a bene ūbitana; nabo haho na haho būnondeela, būneka ū saabo ū Zebedayo mu lyato, hamò na bitūmamīja ba mheela.

Kūpījiwa kwa munhū w'isamva

²¹ Būja būūkashika Kapelanaumu, aho yashika sabato haho na haho ū Yesu wingīla ng'wisinagogi kūlanga.

²² Būyūbūkumya ū būlangi bokwe, nguno walangaga na būdūla, ītī gīt'ūmo bīītīlaga a balangi ba shilagīlo.

²³ Ū ng'wisinagogi lyabo walīmo na munhū alī na moyo nsoso, ī likanza lyenīlo ūlīla

²⁴ alīhaya gīkī, “Gūlīho mhayo kī a ha gatī yise nū bebe Yesu wa Nazaleti? Wizaga kūtūyagaja? Nakūmanile ūlī nani ū bebe, ūlī Ng'wela o ng'wa Mulungu!”

²⁵ Ū Yesu ūlīhama alīhaya, “Huumūlaga nīyo ūmfume!”

²⁶ Ī lisamva lyūngalagaja ū munhū ng'wenūyo, lyūlīla n'ilaka itaale, hūna lyūmfuma.

²⁷ Pye būjinjimala, bandya kwiwīla gīkī, “Bing'we mhayo kī ū gwenūyū? A kenaka kalangīle kapya, nīyo hangī ka būdūla, nguno na a masamva alīyūgahama gang'wigwa!”

²⁸ Haho na haho ū lūkumo lokwe lūsambaala pye a hose ū mu mapandī ayo gaalī gabīmbīkanilwe nī Galilaya.

Kūpījiwa kwa banhū bingī

²⁹ Aho bafuma ū ng'wisinagogi, haho na haho būja ha ba Simoni na Andulea, būūkingīla mu kaya; na a ba Yakobo nū Yohana baalī hamò nabo.

³⁰ Būnsanga nina būkwi wa ng'wa Petelo alī mu ndīlī adadīlilwe nswiza. Aho bashika haho na haho būng'winha ū Yesu ī mhola ja nsaatu.

³¹ Nang'hwe ūng'wegeela ūndima nkono ūngūngūmūla, gūnekela ū nswiza, ūbabeegeja shilīwa.

³² Aho lyabiza lya mhīndī, bandya kūng'wenhela pye a basaatu, na a ba masamva.

³³ Pye ū nzengo gūkuunūkīla a ha kaya yenīyo, bokala pa a ha mita.

³⁴ Akapīja banhū bingī ba būsaatu bo mbika na mbika, ūpeeja na masamva gabūyaga, nīyo walī atagazunīlījaga ū kūyomba, nguno a goyi gaalī gaamanile.

Lūgendo lwa kūja akūlomeelaga

³⁵ Dilū lītaalī ikingilima, ū Yesu ūbūūka ūfuma, ūja hanhū iyene kūjūlomba.

³⁶ Ū Simoni na a babo baalī nang'hwe bandya kūnkooba;

³⁷ aho bamona būng'wīla, “Balīkūkooba pye a banhū.”

³⁸ Alīyo ū wei ūbashokeja ūbawīla gīkī, “Tūjagi na kū mizengo yīngī īyo īlī hihī hihī, nū kwene nakalomeele. Nguno hū gwene ūyo gwanenhile.”

³⁹ Hūna ūja pye a hose ū mu Galilaya akūlomeelaga ū mu masinagogi gabo, na kūpeeja masamva.

Kwejiwa kwa munhū wa mbiji

⁴⁰ Kūhayimanīla munhū wa mbiji wiza aho walī ū Yesu, ūtuja mazwi kūnū alīng'wikūmbīlīja alīhaya, “Ūlū ūtogwa ūdūgije kūneeja.”

⁴¹ Ūnsaatwa, ūgoloola nkono ūnkuumya; kūnū alīng'wīla gīkī, “Natogagwa elaga.”

⁴² Ī likanza lyenīlo ī mbiji jūng'wīnga, wela.

⁴³ Hūna ūng'hūgūla na nguzu, hama haho na haho ūnaga aje.

⁴⁴ Ūng'wīla gīkī, “Ilang'hanage ūtizūng'wīla munhū nūūlū ūmò mhayo gose gose. Alīyo jaga ūkiyooleche kūlī ngabīji, ūkafunye na shakwinha kūlwa kwejiwa kwako, gīt'ūmo Musa alagīlile, būbize ho būkaanīji kūbo.”

⁴⁵ Alīyo wahayūfuma a hanze, aho alīja wandya kūlomeela na kūgūkumūcha no ū mhayo gwenūyo. Nose yūbiza shilambu ū kūlī Yesu kwingīla mu nzengo gose gose bo hape. Ūyūdīla hanze kū matogolo, alīyo nū kwene a banhū bankūūbījaga dūhū kūfuma pye a hose.