Malaki 4 - Bibilia Ilagano Lya Kale 2015

Lūshikū lwa ng'wa Seeba

¹ “Ū lūshikū lwenūlo ū lwene lwizile; lūkūbiza lūkūbakaga gītī moto mu liiko. A bikumīlīja na a babūbi pye a bose bakūbiza gītī mapalala, hūna ū lūshikū lwenūlo lūkūbanogoteja mu moto.” Alīhaya Seeba wa Būdūla bose. “Batūlekeelelwa nji nūūlū itambī dūhū biya gete.

² Alīyo u bing'we abo mulīkūgije ī lina lyane, ī līīmi lya būtūngīlīja līkūmufumīla līkwaakaga, līlī na būpīji ū mu manana galyo. Mukūpuluka muje hanze mukusataga gītī ndīlaanha jalugūlīlwa ha kūfuma mu kaya.

³ Ū mu lūshikū lwane lwa kwīyīīta ī yenīyī, a babūbi mukūyūbapandagīla ha sī; bakūbiza gītī mabu mu mhambala jing'we.” Alīhaya SEEBA wa Būdūla bose.

⁴ “Shiizūkagwi ī shilagīlo sha ntūmami wane Musa, a malange nī shilagīlo īsho nakang'winha kū lūgūlū lwa Holebu kūlwa Baisilaeli bose pye.

⁵ “Managi gīkī nakūmutūmī ng'hangi Eliya aho lūtaalī kūshika ū lūshikū lwenūlo, ū lwa ng'wa SEEBA; ūlo lūlī lūtaale na lwa koogohya.

⁶ Akūbagalūcha a babyaji; ī ng'holò jabo jibagalūkīle a baana babo, na a baana ī ng'holò jabo jibagalūkīle babyaji babo; ūlū ītī chene nakwiza nītūle ī sī n'izumo.”