Malaki 2 - Bibilia Ilagano Lya Kale 2015

Bagabīji kūhūgūlwa

¹ Ū būhūgūji ūbū būlī kū nguno ying'we a bagabīji.

² Ūlū mutūdegeleka, nūūlū mutūjilogeja ī ng'holò jing'we kwikūjo lya lina lyande. Alīhaya SEEBA wa Būdūla bose, nakūmutūmīla izumo najizume ī jing'we. Alichene, nīyo naamalile kūjizuma nguno ya kūleka kūlogeja ī ng'holò jing'we kwikūjo lyane.

³ Ī shibyalīlwe shing'we nakūshigwisīja makoye kū nguno ying'we; nakūmutiginhīja ū kū būshū tembe ya mitugo ī ja shitambò; mukutwalwa mulī nago gīko.

⁴ A henaho hū mukūdeeba nalīmutūmīla nene ū būhūgūji wenūbū, kūlwa gīkī ī lilagane lyane ū kūī Lawī likale līlīho. Alīhaya SEEBA wa Būdūla bose.

⁵ Ī lilagane lyane lyalī kūlī we, lyal'ilagane lya būpanga na mhola; ī shenīsho nakang'winha, ūyo gwalī gūgongilwe a henaha ikūjo; na ng'hana walī anikūgije, nīyo walī na loogohano ū kū lina lyane.

⁶ Ū nomo gwakwe gwafunyaga malange ga ng'hana, atagemile kūhaya būlomolomo na hado yaya. Washimīzaga hamò na nene mu mhola na budebela, hama bingī wabīnjaga mu nzīla ja shibi.

⁷ Ū nomo gwa ngabīji shiigelile gūlang'hane būmani, nīyo a banhū bayūkooba būtongeelwa kūfuma ū mu nomo gwakwe, nguno ū wei alī tūmījiwa wa ng'wa SEEBA wa Būdūla bose.

⁸ Alīyo a bing'we mutalile ū mu nzīla, nīyo kunguno malange ging'we mukwenhelejaga banhū bingī kwipama; ī lilagane īlo naalaga na Lawī ng'walīkenaagūla. Alīhaya SEEBA wa Būdūla bose.

⁹ H'ī chene nang'wītile kūbiza badalahījiwa na ba kūgooka mu miso ga banhū bose, nguno mutūshimīzīlaga ū mu nzīla jane, alīyo mukūtūmamīlaga būsolanhya ū mu mihayo ya shilagīlo.

Yuda ītī na būsanyiwa

¹⁰ U bise bose tūtī ba sīswe ūmò? Tūtabūmbilwe na Mulungu ūmò pye a bose? Nibūlī tūlīlīsosohaja ī lilagane lya basīswe, mu kūleka kwisanya būlī munhū na ng'wiye?

¹¹ Ū mu banhū ba Yuda kūtīmo ū kūsanyiwa; mhayo gwa bubi gwītilwe ū u mu Isilaeli nū mu Yelusalemu, ī Yuda yalīsosohagije ī lipandī īlo Seeba alītogilwe, a bagosha balīyūtoola bakīma kūfuma mu bitongeleja ba bamulungu ba mahanga gangī.

¹² Munhū ose ose ūyo akwītaga ū mhayo gwenūyū, h'ūmo abizīle; ū SEEBA ni ankomanyage ang'wīnje ū mu ng'hambī ya ng'wa Yukobo, nūūlū abize akenhaga shakwinha kūlī SEEBA wa Būdūla bose.

¹³ Gūlīho mhayo gūngī ūyo mukūgwītaga: Mukūnaganyaga shisoji ha ng'walīlo gwa ng'wa SEEBA. Mukūlīlaga na kūtūla ng'hūngū īkī atūshidīlīlaga ī shakwinha shing'we, atūshanukūlaga na būyegi kūfuma mu makono ging'we.

¹⁴ Mulīyūbūūja, “Nibūlī?” Īlī kunguno ū SEEBA alī na būkaanīji a ha gatī yako nū nke wako wa ha būsūmba; ū bebe ūtī nsanyiwa ū kūlī we nūūlū īkī ū ng'wenūyo ng'wiyo gete, nke wako mu nzīla y'ilagane lya witooji.

¹⁵ Ī gīsī ū SEEBA atababeegije gīkī babiza ūmò? Balī baakwe ū mu mīlī nū mu moyo. Nibūlī babize ūmò? Nguno walī atogilwe kūpandīka būbyīle wa loogohano kūlī Mulungu. Alilūūlū, ilang'hanage ū mu moyo gwako, ūtizūjimīīja ū būsanyiwa ū kūlī nke wako wa ha būsūmba.

¹⁶ Ū SEEBA Mulungu wa Isilaeli alīhaya gīkī, “Natabūtogilwe ū būbūlagi bo kaaya, nū ngosha natatogilwe ikumbe wiboneeji gītī kwikumba ng'wenda.” Alīhaya SEEBA wa Būdūla bose. Hūna lūūlū, ilang'hanage gete, ū kūjimīīja ū būsanyiwa wako.

Lūshikū lwa kūlamulwa

¹⁷ U bing'we ng'wanogije ū SEEBA na mamihayo ging'we. Alīyo mukūbūūjaga, “Twanogije mu kinehe?” Kūlwa kūhaya gīkī, “Pye abo bakīītaga yabūbi bawiza ū mu miso ga ng'wa SEEBA, nīyo abatogilwe,” nūūlū gīkī, “Alī halī ū Mulungu wa būtūngīlīja?”