Luka 9 - Bibilia Ilagano Lya Kale 2015

Kūtūng'wa kwa bahemba ikūmi na babīlī

¹ Hūna ū Yesu ūbitana a bahemba bakwe abo ikūmi na babīlī, ūbinha būdūla na nguzu kūlwa kūgaheeba pye a masamva, na kūpīja būsaatu.

² Ūbatūma baje bakūbūkumūchaga ū būtemi bo ng'wa Mulungu, na kūpīja banhū.

³ Ūbawīla gīkī, “Mutizūbūūcha mbūūkanwa jose jose ja kūjana mu nzīla; yaya nūūlū nang'ha, nūūlū mfuko, nūūlū shilīwa, nūūlū hela; yaya nī gīkī būlī ng'wene abize na ng'hanjo ibīlī.

⁴ Ūlū ng'ūshikīla ha kaya ndebe, ikalagi henaho kūshisha ng'wīnge ī lipandī lyenīlo.

⁵ Ūlū būleka kūng'wanukūla, īngagi; nīyo ūlū mulīnga ū mu nzengo gwenūyo, lūkung'unhagi nū lūbuubu ūlo lūlī kū mhambala jing'we, koolekeja gīkī bakūgwīlwa nsango.”

⁶ Ng'hana būja hose hose ū mu magūngūli bakūlomeelaga Ng'hūlū Jawiza na kūpīja banhū.

Kūzwangana kwa ng'wa Helode

⁷ Ū ntemi Helode aho wigwa pyī īyo yabeejiagwa yenīyo ūzwangana, nguno bangī bahayaga gīkī ū Yohana wajūūkile kūfuma mu bafu.

⁸ Bangī gīkī Eliya wilongile, hama bangī hangī bahayaga gīkī, ūmò wa bahangi ba kale wajūūkile!

⁹ Hūna lūūlū ū Helode wandya kūhaya, “Ū Yohana nakamuta ntwe, al'ūyo nandije kwigwa ng'hūlū jakwe ng'wenūyū nang'hwe nani hangī?” Wikūmva kūmona.

Kūlisha banhū shihūmbī shitanò

¹⁰ A bahemba aho bashoka būnsomboolela īyo bakabeeja. Hūna ūbasola gīkī aje nabo iyene kū nzengo gwitanagwa Betisaida.

¹¹ Alīyo a mabita ga banhū aho gadeeba gūnkūūbīja koi; nang'hwe ūbanukūla, ūbasomboolela mihayo ya būtemi bo ng'wa Mulungu. Na a babo baalī na makoye ūbapīja.

¹² Hūna aho lyaja ī likanza, būng'wegeela ab'ikūmi na babīlī, būng'wīla gīkī, “Hambū hambū ni wabalaga a banhū baje kūjūkooba ng'hambī ū mu chalo sha hihī hihī ūmu, bakigūlīle na shilīwa kū migūnda; nguno a henaha tūlī ng'witogolo dūhū!”

¹³ Nang'hwe ūbawīla, “Binhagi a bing'we ī shilīwa.” Nabo būng'wīla, “Tūtī na shilīwa sha kūkīla ha migatī ītanò na ndīlo ibīlī dūhū, numho hamo ūlū kūja kūgūla shilīwa sha kūbigela pye a banhū benaba!”

¹⁴ A bagosha dūhū abo baalīho baalī gītī shihūmbī shitanò. Hūna ū Yesu ūbawīla a bahemba bakwe gīkī, “Bigashagi a banhū mu magele magele, būlī lyene banhū gītī makūmi atanò.”

¹⁵ Bīīta chene ng'hana, būbiza bigasha pye a banhū.

¹⁶ Hūna ū Yesu wīsola ī migatī īy'ītanò nī ndīlo īj'ibīlī, ūlangamīla ng'wigūlū, ūlūmba; ūshimeganya, ūbinha a bahemba būbagabanhya a banhū.

¹⁷ Būlya pye a bose bigeja, aho shasolelejiwa īsho shikasaagīīla, gokala matangwa ikūmi na abīlī.

Būkaanīji bo ng'wa Petelo

¹⁸ Līkabiza ho ikanza ilebe, ū Yesu walī iyene walombaga, na a bahemba bakwe baalī hamò nang'hwe; ūbabūja gīkī, “A banhū bakūnihayaga nalī nani?”

¹⁹ Būnshokeja balīhaya, “Ūlī Yohana Matīīja, alīyo bangī gīkī ūlī Eliya, na bangī hangī gīkī ūlī ūmò wa bahangi ba kale wajūūkile.”

²⁰ Hūna ūbabūja nabo gīkī, “Al'a bing'we mukūnihayaga nalī nani?” Petelo ūnshokeja alīhaya, “Ūlī Kilisito wa ng'wa Mulungu!”

²¹ Hūna ūbahana batizūng'wīla munhū nūūlū ūmò ū mhayo gwenūyo.

Kūbawīla ya kūcha na kūjūūka kwakwe

²² Hanuma ūhaya gīkī, “Ū Ng'wana wa Munhū shing'wigeleelilwe aluhiwe mu mihayo mingī; na kūleng'wa na bagabīji bataale, hamò na balangi ba shilagīlo na kūbūlagwa. Alīyo akūjūūchiwa ha lūshikū lo kadatū lwaho.”

²³ Hūna ūbawīla pye a bose gīkī, “Ūlū munhū atogilwe kūnilondeela ni idalahage wei ng'wenekīlī, ibūūkīje nsalaba gokwe būlī lūshikū, hū anilondeele.

²⁴ Nguno būlī ng'wene ūyo atogilwe kūpīja būpanga bokwe, akūbūjimīīja. Alīyo ūyo ūbūjimīīja ū būpanga bokwe kūlwa nguno yane, ū ng'wenūyo akūbūpīja.

²⁵ Angū, ū munhū akūbiza na solobo kī nūūlū akīpandīka pyī ī sī, alīyo ū wei ng'wenekīlī ūyagala nūūlū ūjimīīla?

²⁶ Nguno ose ose ūyo ūcha minala kūlwa nguno yane nī mihayo yane, nang'hwe ū Ng'wana wa Munhū akūcha minala kūlwa nguno yakwe ū munhū ng'wenūyo, ū ng'wikanza lya kwiza ng'wikūjo lyakwe na lya ng'wa Ise, na lya bamalaika beela.

²⁷ Nīyo nalīmuwīla gwa ng'hana gīkī, balīho bamò ū mu banhū abo bīmīīlaga aha batūloja icha na hado yaya, kūshisha babūbone ū būtemi bo ng'wa Mulungu.”

Yesu kūgalūka ihanga

²⁸ Aho wīhaya ī yenīyo jūbīta shikū gītī inaane, ūbasola ba Petelo na Yohana na Yakobo; ūlinha nabo mu lūgūlū kūjūlomba.

²⁹ Aho alīlomba, ī lihanga lya būshū bokwe lyūgalūka, nī shizwalo shakwe sheela pe; shūyūng'weka ng'weka.

³⁰ Kwimanīla wandya kūlūngalūnga na banhū babīlī, ba Musa na Eliya;

³¹ nabo baalī mu suso j'ikūjo. Bahoyaga nang'hwe mihayo ya kīngīle kakwe; mhayo ūyo walī hihī kūjūgūshikīlīja mu Yelusalemu.

³² Gwike ū Petelo na a biye abo walī nabo baalī baheewa tūlo; alīyo aho bamisha, būlībona ī likūjo lyakwe na a babo baalī bīmīīla hamò nang'hwe.

³³ Hūna a babīlī benabo aho balīlekana nang'hwe, ū Petelo ūng'wīla ū Yesu gīkī, “Seeba yabeelela īkī twabiza tūlīho aha; tūzenge maheema adatū, līmò lyako, līmò lya ng'wa Musa, na līmò lya ng'wa Eliya.” Alīyo walī atagūmanaga ūyo wagūhayaga.

³⁴ Aho ataalī ūhaya gīko, kūhayimanīla ligela ilunde lyūbafīkīja; bogoha ū kūfīkījiwa ilunde.

³⁵ Liza n'ilaka kūfuma ū ng'wilunde līlīhaya, “Ūyū ng'wene Ng'wana wane nsolwa, ng'wigwagi wei.”

³⁶ Aho lyabīta ī lilaka lyenīlo, būmona ū Yesu alī iyene. Ū mu shikū jenījo bakahuumūla, batang'wīlile ose ose ī mihayo īyo bakībona yenīyo.

Nyanda kwīngījiwa isamva

³⁷ Ī ntondo yaho aho balika kūfuma ū mu lūgūlū, ibita itaale lyūnsūmbīīla ū Yesu.

³⁸ Kwitulwa ū ng'wibita lyenīlo ngosha ūmò wang'hamukīla alīhaya, “Nangi nalīkwikūmbīlīja ūkalole kaka kitūnja kane aha; nalī nako kenaka dūhū baba.

³⁹ Ng'hangala ningī kakadimagwa isamva, lyakagalagaja ha sī, kayūfuluuta ifulo dūhū; lyakakalekela kū kale kokalaga machūbagūkīle!

⁴⁰ Naalī nabikūmbīlīja a bahemba bako balīpeeje; alīyo balīlemeelagwa!”

⁴¹ Ū Yesu ūshosha ūhaya, “Bing'we shibyalīlwe sha būtūzunya na shihūbīkile, nakwikala ning'we mu kwiyūmīlīja kūshisha nanalī? Ng'wenhage aha ū ng'witūnja wako!”

⁴² Aho alītwalwa, ī lisamva lyūntaalīka ha sī lyandya kūngalagaja; alīyo ū Yesu ūlīhama, ūmpīja ū nyanda, ūnshosha kūlī ise.

⁴³ Pye a bose būjinjimala būyūbūkumya dūhū ū būdūla bo ng'wa Mulungu. Aho bataalī balīyīkumya pyī īyo akībeeja yenīyo, ūbawīla a bahemba bakwe gīkī,

Kūbawīla hangī ya kūcha na kūjūūka kwakwe

⁴⁴ “Yīyī mihayo īdegelekagi chiza, na ng'wīdime. Ū Ng'wana wa Munhū alī hihī kūtūūlwa mu makono ga banhū.”

⁴⁵ Alīyo batagwitegelegije ū mhayo gwenūyo, gwalī gūtaalī gūbisilwe ū kūbo batizūgūmana; nīyo bakogoha nū kūmūja a makūlū gaho.

Ū ntaale kūbatinda pye

⁴⁶ Kwimanīla a bahemba bakwe bandya kwihalalīja, gīkī nani ū ntaale kūbatinda pye a biye!

⁴⁷ Ū Yesu aho wabūdeeba ū wihalalīja ūbo walī mung'holò jabo, witana kanīgīnī. Ūkawīla kīmīīla kihela nang'hwe.

⁴⁸ Hūna ūbawīla gīkī, “Būlī munhū ūlū ūng'wanukūla nīgīnī gīt'ūyū mu lina lyane, wananukūlaga nene. Na būlī ng'wene ūyo ūnanukūla nene, numho wang'wanukūlaga ūyo anitūmile. Nguno ū ndo wa bado ū mu bing'we, ū ng'wenūyo hū ntaale.”

Ūyo alī kū lwandī lwing'we

⁴⁹ Hūna ū Yohana ūnshokeja ūng'wīla gīkī, “Seeba twalī twamonile ng'wing'wana alīpeeja masamva mu lina lyako; tūnemeja nguno atī ūmò wise.”

⁵⁰ Nang'hwe ū Yesu ūng'wīla gīkī, “Yaya ū kūbalemeja, nguno ūyo atilwishaga ning'we ū ng'wenūyo alī hamò ning'we.”

Basamalia kūlema kūng'wanukūla

⁵¹ Aho jang'wa ī shikū jakwe ja kwanukūlwa kwigūlya, pye a maganiko gakwe ūgalogeja ha lūgendo lwa kūja Yelusalemu.

⁵² Hūna ūtūma banhū baje kūnonja longeja ūmo alayūbītīla. Būshika mu chalo shilebe sha Basamalia,

⁵³ alīyo būlema ū kūng'wanukūla; nguno a maganiko gakwe gaalī ha lūgendo lwa kūja Yelusalemu.

⁵⁴ A bahemba bakwe, a ba Yakobo nū Yohana, aho babona gīko, būng'wīla; “Seeba ūlībona ginehe ūlū kūlagīja moto gīt'ūmo akīītīla Eliya, gwike kūfuma ng'wigūlū gwize gūbakenaagūle?”

⁵⁵ Alīyo ūbagalūkīla ūbahūgūla; ūbawīla gīkī, “A bing'we mutagūmanile ū moyo ūyo mulī nago. Nguno ū Ng'wana wa Munhū atizile kūyagaja būpanga bo banhū, alīyo kūbūpīja.”

⁵⁶ Hūna būja kū chalo shingī.

Kūnondeela Yesu

⁵⁷ Aho balī mu nzīla bajile, munhū nebe ūng'wīla gīkī, “Nakūkūlondeela būlī kwene ūko ūlaaje.”

⁵⁸ Nang'hwe ū Yesu ūng'wīla gīkī, “Ī nyamhawa jilī na myobo, nī noni ja kūlala najo jilī na chanjo, alīyo ū Ng'wana wa Munhū atī na ha kūlaaja nūūlū ntwe gokwe!”

⁵⁹ Hūna ūng'wīla ūngī gīkī, “Nilondeelage.” Ū ng'wene ūhaya, “Seeba nizunīlījage tame naje nakanjīke baba.”

⁶⁰ Nang'hwe ūng'wīla, “Balekage a bafu babajīke a bafu babo; bebe ng'wene jaga ūkakumūche mhola ja būtemi bo ng'wa Mulungu.”

⁶¹ Na ūngī hangī ūng'wīla, “Nakūkūkūūbīja Seeba, gwike nizunīlījage tame naje nakabalage bang'wise.”

⁶² Alīyo ū Yesu ūng'wīla gīkī, “Atīho nūūlū ūmò wa kwandya kūlīma hūna wīmīīla kwikībūka kūlola ya kū numa, ūyo igeleelilwe kūbiza mu būtemi bo ng'wa Mulungu.”