Luka 7 - Bibilia Ilagano Lya Kale 2015

Kūpījiwa kwa ntūmami wa nshilikale

¹ Aho wamala kūbasomboolela pyī ī mihayo yakwe, wingīla mu nzengo gwa Kapelanaumu.

² Walīmo ntaale nebe wa bashilikale igana, walī na nsese wakwe antogilwe jigi; alīyo ū nsese ng'wenūyo walī nsaatu hihī na kūcha.

³ Hūna lūūlū ū ntaale wa bashilikale igana ng'wenūyo aho wajiigwa ī mhola ja ng'wa Yesu, ūtūma banamhala ba Bayudaya bampeeleele, bakang'wikūmbīlīje ize ampīje ū nsese okwe.

⁴ Aho bashika a halī Yesu būng'wikūmbīlīja balīhaya gīkī, “Ū munhū ng'wenūyo īkūbeelela ūng'wītīle ū mhayo gwenūyū.

⁵ Nguno alītogilwe no ī lihanga lise; nīyo watūzengela n'isinagogi.”

⁶ Ng'hana ū Yesu ūgumha ajile nabo, alīyo aho wegeela kūshika a ha kaya, ū ntaale wa bashilikale igana ng'wenūyo ūtūma banwani biye kūja kūng'wīla ū Yesu gīkī, “Seeba ūtī na nguno ya kwikoya; ū nene natigeleelilwe ū bebe ūshike ha ng'wane.

⁷ H'ī nguno yene naalī nabona gīkī ū nene ng'wenekīlī natigeleelilwe nūūlū ū kwiza ū kūlī bebe; ū bebe ng'wene hayaga mhayo dūhū akūpīla ū nsese wane.

⁸ Nguno nane nalī munhū ūyo atūūlilwe ha sīlīlī ya būsugi; nalī na bashilikale a ha sīlīlī yane. Nadūgije kūng'wīla ūyū gīkī, ‘Jaga;’ ng'hana akūja. Nūūlū ūngī gīkī, ‘Nzūgū;’ ng'hana akwiza. Nūūlū nsese wane nashikile kūng'wīla, ‘ītaga gīkī,’ na ng'hana akwīta!”

⁹ Ū Yesu aho wigwa gīko akankumya ū munhū ng'wenūyo, ūlīgalūkīla ī libita lya banhū īlo lyanondeelaga; ūbawīla gīkī, “Nalīmuwīla nataalī kūbona na hado yaya kūzunya kwa mbika īyī hose hose ū mu Isiraeli.”

¹⁰ Aho bashoka ī kaya abo baalī batūng'wa būsanga ū nsese opīlaga.

Kūjūūchiwa ng'witūnja wa nchīlwa

¹¹ A ha ntondo yaho, ū Yesu ūja nabo a bahemba bakwe, hamò n'ibita itaale, būūkashika kū nzengo gūmò gwitanagwa Naini.

¹² Ohayegeela a ha mita ūmanhya na banhū balīfuma ū mu nzengo, babūūkije mimba. Walī wazumalīka ndinha nebe, ng'witūnja myalwa ūmò wike wa nkīma ūyo walī wamala kūchīlwa ngoshi; n'ibita itaale kūfuma ū mu nzengo lyalī hamò nang'hwe.

¹³ Ū Seeba aho wamona ū nkīma ng'wenūyo ūnsaatwa; ūng'wīla, “Ūtalīlage!”

¹⁴ Hūna wegeela wīkuumya ī macheela, bīmīīla abo baalī bībūūkije; nang'hwe ūhaya gīkī, “Nsūmba nalīkūwīla būūkaga!”

¹⁵ Ūyo walī achile ūgūngūmūka wigasha, wandya na kūyomba; hūna ū Yesu ūng'winha kūlī nina.

¹⁶ Pye a bose bogoha no, būyūnkumīlīja Mulungu dūhū balīhaya, “Ng'hangi ntaale watwilongelile.” Na gīkī, “Ū Mulungu wabagenihile a banhū bakwe.”

¹⁷ Ū lūkumo lokwe lūsambaala pye a hose ū mu sī ya Būyudaya, nū mu sī ījo jibīmbīkanilwe nayo.

Ibūjo lya ng'wa Yohana kūlī Yesu

¹⁸ A bahemba bakwe ū Yohana būng'wīla pyī ī yose yenīyo.

¹⁹ Hūna ūbitana babīlī ba bahemba bakwe, ūbatūma kūja ū kūlī Seeba bakamūje gīkī, “Ū bebe hū ūlī ng'wene ūyo izile, nūūlū hamo tūnindīīle ūngī?”

²⁰ A bahemba aho bashika ū kūlī Seeba būhaya, “Ū Yohana Matīīja watūtūmaga twize tūkūbūje gīkī, ‘Ū bebe, hū ūlī ng'wene ūyo izile, nūūlū hamo tūnindīīle ūngī?’”

²¹ Ū ng'wikanza lyenīlo ū Yesu wapījaga banhū bingī kūfuma mu būsaatu na būlemehazu; bangī wabīngījaga masamva, na babboku bingī wabinhaga kūbona.

²² Hūna ūbashokeja ūbawīla, “Jagi mukang'wīle ū Yohana īyo mulīyigwa na kwībona: A babboku balībona, na a balema balīshimīza, a ba mbiji bakwelaga, a bagulu bakwigwaga; pye na a bafu balījūūka, na a bahabī balīlomeelwa Ng'hūlū Jawiza.

²³ Nīyo alī na lubango būlī ng'wene ūyo atī na kwipama kūlwa nguno yane.”

²⁴ Aho bīnga abo baalī batūng'wa na Yohana, ū Yesu wandya kūbawīla a banhū mihayo ya ng'wa Yohana. Ūhaya gīkī, “Aho ng'wajaga kū matogolo, ng'wajaga kūjūlola kī? Kadete kakūyengejiagwa nyaga?

²⁵ Ng'walī mutogilwe kūbona kī? Hamo munhū nkondooku azwalīlile nyasabi? Managi gīkī abo bakazwalaga myenda ya nyasabi na kūyegela būpanga bo mīlī, balī mu kaya ja batemi.

²⁶ Numho lūūlū ng'wajaga kūlola kī? Hamo ng'hangi? Alichene, nīyo nalīmuwīla alī ntaale kūtinda ng'hangi.

²⁷ Ū ng'wenūyū hū ng'wene ūyo gwandīkilwe kūlwakwe gīkī, ‘Managa gīkī nalīntūma ntūmījiwa wane kū būtongi wako, akūtonga kūkūbeeja beegeja nzīla.’

²⁸ Nalīmuwīla gīkī ū mu bose abo babyalilwe na bakīma, atīho nūūlū ūmò ūyo alī ntaale kūntinda Yohana. Alīyo ūyo alī ndo wa bado ū mu būtemi bo ng'wa Mulungu ankīlile ū wei.”

²⁹ Pye a banhū abo bandegelekaga, hamò na a batobisha ba goodi bakazunya gīkī ū Mulungu ntūngīlīja; nguno baalī babatīījiwa mu būbatīīja bo ng'wa Yohana.

³⁰ Alīyo a Bafalisayo na a balangi ba shilagīlo, bakabūlema ū būhūgūji bo ng'wa Mulungu ū kūbo, īkī baalī batabatīījiwe nū Yohana.

³¹ “Hīmba nabikolanīje na kī a banhū ba shibyalīlwe īshi? Nabalenganīje na kī?

³² Batikīlile na baana bigashaga ng'wigūlilū bakwihamukīlaga na bichabo; bakūhayaga gīkī, ‘A bing'we, ni ginehe twalūmufuulīlaga mbiilūlū alīyo ning'we ū kūbina yaya; hama hangī aho twandya kūlīla ng'hūngū nahene mutapīnīhalile!’

³³ Nguno ū Yohana Matīīja akiza atūlyaga shilīwa nūūlū kūng'wa mvinya yaya; muyūhaya, ‘Alī n'isamva!’

³⁴ Ū Ng'wana wa Munhū aho wiza akūlyaga na kūng'wa hangī, nahene ng'wandije kūhaya gīkī, ‘Nolagi ū munhū ūyū; naku na neevi, nīyo anwanile na batobisha ba goodi, būyaga na banhū ba shibi!’

³⁵ Gwike a baana bago a masala, a bose bagisaabile gīkī galī būtūngīlīja.”

Kūlekejiwa kwa nkīma wa shibi

³⁶ Hūna ūmò wa Bafalisayo ūng'wegeleja ū Yesu ha ng'wakwe, gīkī ize kūlya shilīwa hamò nang'hwe; ng'hana wingīla ū mu numba ya Mfalisayo ng'wenūyo, wigasha kūlya ī shilīwa.

³⁷ Ū mu nzengo gwenūyo walīmo nkīma wa shibi; aho wadeeba gīkī ū Yesu walī wigasha ū mu ng'wa Mfalisayo ng'wenūyo, wiza na jūbba ya alabasta yokalile maguta.

³⁸ Ohayūshika wīmīīla ha numa ya ng'wa Yesu, hihī na mhambala jakwe, kūnū akūlīlaga. Ūjilobya shisoji ī mhambala ja ng'wa Yesu, hūna wandya kūjipyagūla na nzwīlī jakwe; wanoga ūyūjibbipa, hama ūjibila maguta ayo walī nago.

³⁹ Ū Mfalisayo ūyo walī wang'wegeleja aho wabona gīko, wandya kwiwīla ū mung'holò yakwe gīkī, “Ū munhū ng'wenūyū ūlū ni ng'hangi, ni wandeebaga ū nkīma ūyo alikala ūnkuumya kuumya ng'wenūyū, pyī nī nhūngwa jakwe; nguno wabūbi no!”

⁴⁰ Ū Yesu ūnshokeja ūng'wīla gīkī, “Simoni nalī na mhayo gwa kūkūwīla.” Nang'hwe ūhaya, “Yombaga Nangi.”

⁴¹ Ū Yesu ūhaya, “Baalīho banhū babīlī, baalī na būgasa na munhū nebe. Ūmò būgasa bo denali magana atanò, ūngī denali makūmi atanò.

⁴² A bose bakagayiwa ī sha kūnshokeja ū ng'wenekīlī sabo, wanoga nose ūbalekeja pyī būbīlī wabo. Ū mu būbīlī wabo gīko, alī kinehe ūyo akūbiza na būyegi kūtinda?”

⁴³ Ū Simoni ūshosha ūhaya, “Naliganika ūyo akalekejiwa būgasa būtaale.” Nang'hwe ū Yesu ūshosha ūng'wīla, “Watūngīlīja ū mu kalamulīle.”

⁴⁴ Hūna ūngalūkīla ū nkīma ng'wenūyo, ūng'wīla ū Simoni gīkī, “Ūlīmona ū mayū ng'wenūyū? Aho nalingīla ū mu ng'wako, ū bebe ūtaninhile nūūlū minzī ga kooja mhambala jane, alīyo ū ng'wene wajilobya ī mhambala jane na shisoji shakwe, hama ūjipyagūla na nzwīlī jakwe.

⁴⁵ Na hangī ū bebe ūtagemile kūnibbipa nūūlū hado. Alīyo ū ng'wene, kūfuma haho ningīlīlaga, ataalī ū koya ū kūjibbipa ī mhambala jane.

⁴⁶ Hama nīyo ū bebe ūtaalī nūūlū kūnibila maguta kū ntwe, alīyo ū ng'wene wajibila maguta ī mhambala jane.

⁴⁷ Hūna lūūlū nalīkūwīla gīkī, walekejiagwa ī shibi shakwe nūūlū īkī shilī shingī, h'ī nguno yene aloolecha būtogwa būtaale, alīyo ūyo alekejiwe shido, nū būtogwa bokwe būdo.”

⁴⁸ Hūna ūng'wīla ū nkīma ng'wenūyo gīkī, “Walekejiagwa ī shibi shako!”

⁴⁹ Abo baalī bigasha nang'hwe a ha shilīwa bandya kūduguma kūnū baliwīla gīkī, “Ū ng'wenūyū ni nani ī gete wa kūyūlekeja na shibi ū wei?”

⁵⁰ Alīyo ū Yesu ūng'wīla ū nkīma ng'wenūyo gīkī, “Jaga mu mhola, ū kūzunya kwako kwakūpījaga.”