Luka 3 - Bibilia Ilagano Lya Kale 2015

Būlomeeji bo ng'wa Yohana Matīīja

¹ Mu ng'waka gw'ikūmi n'ītanò gwa būsugi bo ng'wa Kaisali Tibelio, ū nsugi wa Būyudaya walī Pontio Pilato. Ū ntemi wa Galilaya walī Helode, ū Filipo ū ng'wanong'wawe walī ntemi wa Itulea na Tulakonio; Lisania nang'hwe walī ntemi wa Abilene.

² Ū nīmo gwa būgabīji būtaale gwalī ha sīlīlī ya ng'wa Anasi na Kayafa. Ū mu shikū jenījo ū mhayo go ng'wa Mulungu gūng'wizīīla Yohana, ū ng'witūnja o ng'wa Zakalia, ū kū matogolo ūko wikalaga.

³ Wandya kūja akūlomeelaga pye a hose ū mu sī ja mbalama ya mongo gwa Yolodani. Walomeelaga ya būbatīījiwa kūlwa kūgalūka na kwingīla mu kūlekejiwa kwa shibi.

⁴ Gīt'ūmo gwandīkilwe mu shitabo sha mihayo ya ng'hangi Isaya gīkī, “Ilaka lya munhū alīhamuka mu matogolo, beeja beejagi ikūūwa lya ng'wa Seeba, goloolagi nzīla jakwe.

⁵ Būlī longa lūkūfukīīlwa, Ī ngūlū jikūtubījiwa, nī migūngūli ī yose; hama ī nzīla ījo jiigomagomile jikūgoloolwa, nī ja magagala gagala jikūlenganījiwa.

⁶ Ha numa ya henaho pye a banhū bakūbūbona ū būpīji bo ng'wa Mulungu.”

⁷ Mabita mataale ga banhū gakayiza ū kūlī Yohana kūbatījiwa, alīyo ūyūbahūgūla alībawīla gīkī, “Bing'we būbyīle wa shipīlī, nani wamuchagūlile gīkī mugūpeele ū nsango ūyo gūliza?

⁸ Ali lūūlū, twajagi matwajo kūlwa koolecha būkaanīji bo kūgalūka kwing'we. Mutizandya kwiwīla gīkī, ‘Tūlī na nkūlūgenji wise Abulahamu.’ Nguno nalīmuwīla nūūlū kūfuma mu mawe gīt'aya, ū Mulungu adūgije kūmūkīja baana ū Abulahamu.

⁹ Nīyo ī haha īlīho mbasa ītūūlilwe ng'hana ng'hana a ha matina ga mitī. Hū kūhaya būlī ntī ūyo gūtūtwaja matwajo gawiza, gūkūbbutwa, gūponyiwe mu moto.”

¹⁰ Hūna a mabita ga banhū gūyūmūja galīhaya, “Ī gīsī lūūlū twīte ginehe?”

¹¹ Nang'hwe ūbashokeja ūbawīla gīkī, “Ūyo alī na ng'hanjo ibīlī ang'winhe ūyo atī nayo, nū yūyo alī na shilīwa īīte chene.”

¹² A batobisha ba goodi nabo biza ū kūlī we gīkī ababatīīje. Aho bamūja, “Nangi al'a bise twīte ginehe?”

¹³ Nang'hwe ūbawīla, “Ng'ūshikīlīja ū kwīta īyo mulagīlilwe, gwike yaya ū kūkīlanīja.”

¹⁴ Na bashilikale būmūja gīkī, “A bise nise twīte ginehe?” Nang'hwe ūbashokeja, “Oyagi ū kūbiboneela a banhū, nū kūbalembekeja, nīyo muyūfujiwa nī mishahala ying'we.”

¹⁵ Pye a banhū baalī balindīīla mu kwisagīlwa, kūnū bakwideedeng'hanyaga ū mung'holò jabo ūlū gīkī ū Yohana hū walī ng'wene ū Kilisito.

¹⁶ Alīyo ū wei ng'wenekīlī ū Yohana akabashokeja pye a bose ūbawīla gīkī, “Ū nene ng'hana nalīmubatīīja na minzī, alīyo aliza ūyo anikīlile ū būdūla, ūyo natigeleelilwe ū nene nūūlū kūtaligūla matungījo ga shilatū shakwe; ū ng'wenūyo h'ūyo akūmubatīīja na Moyo Ng'wela na moto.

¹⁷ Ū lūhūngo lokwe alī nalo mu nkono gokwe wei ng'wenekīlī, hama ū lūbūūga lokwe akūlūpyagūla alweje pe. Ū būsīga akūbūkuminga chiza abūtūūle ng'wiluuli lyakwe; alīyo a meela akūgapemba mu moto gūtī gwa kūjima!”

¹⁸ Nīyo akabalomeela na kūbahūgūla a banhū mihayo mingī ya mbika na mbika.

¹⁹ Nū ntemi Helode ūng'hūgūla kūlwa nguno ya ng'wa Helodia ūyo walī nke wa ng'wanong'wawe, na kūlwa mihayo yīngī yīngī ī yabūbi īyo wīyītaga.

²⁰ Alīyo ū Helode akamponya ū Yohana mu jeela, ūbiza ongeja gwabūbi gūngī a higūlya ya mibi ī yose!

Kūbatījiwa kwa ng'wa Yesu

²¹ Bahayūbatīījiwa pye a banhū, nū Yesu ūbatīījiwa; aho alīlomba, kūhayimanīla ī ligūlū lyalugūka.

²² Moyo Ng'wela wika alī mu mīlī gītī gwa ng'hūūlū izile a halī we; n'ilaka liza kūfuma ū ng'wigūlū līlīhaya gīkī, “Ū bebe ūlī Ng'wana wane Ntogwa, ūyo nakūyegelile hataale no.”

Kwihela kwa shibyalīlwe sha ng'wa Yesu

²³ Ū Yesu aho alandya kūtūmama walī na myaka gītī makūmi adatū, wiganikīlagwa gīkī olī ng'witūnja o ng'wa Yosefu, ūyo olī ng'wana Eli;

²⁴ ng'witūnja o ng'wa Matati, o ng'wa Lawī, o ng'wa Meliki, o ng'wa Yanai, o ng'wa Yosefu.

²⁵ O ng'wa Matatia, o ng'wa Amosi, o ng'wa Naumu, o ng'wa Hesili, o ng'wa Nagai.

²⁶ O ng'wa Maati, o ng'wa Matatia, o ng'wa Semei, o ng'wa Yosefu, o ng'wa Yuda.

²⁷ O ng'wa Yonani, o ng'wa Lesa, o ng'wa Zelubabeli, o ng'wa Salatieli, o ng'wa Neli.

²⁸ O ng'wa Meliki, o ng'wa Adi, o ng'wa Kosamu, o ng'wa Elimadamu, o ng'wa Eli.

²⁹ O ng'wa Yoshwa, o ng'wa Eliezeli, o ng'wa Yolimu, o ng'wa Matati, o ng'wa Lawī.

³⁰ O ng'wa Simioni, o ng'wa Yuda, o ng'wa Yosefu, o ng'wa Yonamu, o ng'wa Eliakimu.

³¹ O ng'wa Melea, o ng'wa Mena, o ng'wa Matata, o ng'wa Nasani, o ng'wa Daūdi.

³² O ng'wa Yese, o ng'wa Obedi, o ng'wa Boazi, o ng'wa Salimoni, o ng'wa Naasoni.

³³ O ng'wa Aminadabu, o ng'wa Lamu, o ng'wa Esilomu, o ng'wa Falesi, o ng'wa Yuda.

³⁴ O ng'wa Yakobo, o ng'wa Isaka, o ng'wa Abulahamu, o ng'wa Tela, o ng'wa Naholi.

³⁵ O ng'wa Selugi, o ng'wa Leu, o ng'wa Pelegi, o ng'wa Ebali, o ng'wa Saala.

³⁶ O ng'wa Kainamu, o ng'wa Alifakisadi, o ng'wa Shemu, o ng'wa Noa, o ng'wa Lameki.

³⁷ O ng'wa Matusela, o ng'wa Enoka, o ng'wa Yaleti, o ng'wa Mahalaleeli, o ng'wa Kainamu.

³⁸ O ng'wa Enosi, o ng'wa Seti, o ng'wa Adamu, o ng'wa Mulungu.