Luka 24 - Bibilia Ilagano Lya Kale 2015

Kūjūūka kwa ng'wa Yesu

¹ Hūna a ha lūshikū lo kwandya nyuma a bakīma benabo bipuna dilū makīngo, būbūsola nū būgota bo ng'waso nsoga ūbo baalī balonja lonja, būja ū kū shigila.

² Bahayūshika koi, būlīsanga ī liwe lyamalaga kūpilingitiwa lyīnjiagwa a ha shigila.

³ Aho bingīla moi batagūsangile ū mīlī go ng'wa Seeba Yesu.

⁴ Hūna aho bataalī būgūkumya ū mhayo gwenūyo, bagosha babīlī bīmīīla haho bbihī nabo, bazwalile myenda ya būpe būng'weku no no no.

⁵ A bakīma benabo bogoha no, būyūdetema dūhū biyinamīīlaga; a bagosha benabo būbawīla gīkī, “Nibūlī mulīnkoobela mu bafu ū mpanga?

⁶ Atīho a henaha wamalaga kūjūūka. Izūkagwi ūmo akamuwīlīla aho walī Galilaya;

⁷ gīkī, ‘Ū Ng'wana wa Munhū shing'wigeleelilwe kūtūūlwa mu makono ga banhū ba shibi akong'we ha nsalaba, hanuma ū mu lūshikū lo kadatū lwaho akūjūūka.’”

⁸ A bakīma benabo būyizūkwa ī mihayo yakwe.

⁹ Bahayūshoka ū kūfuma ū kū shigila, būbahwegeja pyī ī mihayo yenīyo ab'ikūmi na ūmò, na a bangī pye a bose.

¹⁰ A bakīma abo bakabasomboolela a batūng'wa ī mihayo yenīyo baalī ba Malia Magadalena, na Yoana, nū Malia ū nina wa ng'wa Yakobo, na bichabo bangī abo baalī nabo.

¹¹ Alīyo aho babawīla batīzunije ī mihayo yabo, nguno īkabiza gītī ya nyachilū chilū dūhū.

¹² Gwike ū Petelo ūbūūka, ūpeela ajile ū kū shigila; aho winama kūlola moi wībona ī myenda ya kūjīkīlwa īlekilwe gīko dūhū. Ūkalīla kūshoka kaya, alīkumya ūshingisha gīkī hīmba gwigelega mhayo kī!

Lūgendo lwa kūja Emau

¹³ Ū lūshikū lwenūlo babīlī babo būbūūka lūgendo kūja kwigūngūli lya Emau, ū kwīnga ī Yelusalemu boolīho bū kūle bo kūshika gītī kilomita ikūmi n'īmò.

¹⁴ Ū mu lūgendo lwabo baja bakwisomboojaga pyī īyo yalī yilonga yenīyo.

¹⁵ Aho balī mu kwisombooja na kūlūngalūnga gīko, ū Yesu ng'wenekīlī ūbegeela, ūyūshimīza nabo.

¹⁶ Gwike nūūlū īkī a miso gabo gamonaga, alīyo baalī batang'witegelejaga.

¹⁷ Hūna ūbabūja gīkī, “Bing'we mulīshimīza ng'wiwīla mihayo kī ī yenīyī?” Bīmīīla būjinjimala!

¹⁸ Ūmò wabo, lina lyakwe Kileopa, ūnshokeja ūng'wīla gīkī, “Ū bebe, ī gete ūlī ngeni iyene dūhū shi ū mu Yelusalemu? Ūtamanile ūmo īkūjīlaga ī mihayo yamo ī shikū jenīji?”

¹⁹ Nang'hwe ūbabūja, “Mihayo kī?” Būnshokeja, “Ī ya ng'wa Yesu, ū muna Nazaleti. Ūyo walī ng'hangi, na munhū wa būdūla mu shītwa na mu kalangīle, kū būtongi bo ng'wa Mulungu; nū kū banhū bose!

²⁰ A bagabīji bataale na a basugi bise bakamfunya ūlamulwa nsango gwa kūbūlagwa, ūkong'wa ha nsalaba!

²¹ Alīyo a bise twalisagīlagwa gīkī hū ng'wene akwīkomoola ī Isiraeli! Nīyo ī lelo lūlī lūshikū lo kadatū kwīngīīla aho yilongelile ī mihayo yenīyī.

²² Hama hangī ī lelo bakīma balebe ba mu bise batwibakīja; nguno baalī bipuunaga dilū kūja ū kū shigila.

²³ Alīyo twahayagimanīla bashoka balīhaya batagūbonile ū mīlī gokwe, na gīkī angū baalī bilongelwa na bamalaika būbawīla gīkī alī mpanga!

²⁴ Ahene bamò bise baalī baja ko ū kū shigila, būūkasanga gīt'ūmo baalī bahayīla a bakīma; alīyo ū wei batamonile!”

²⁵ Hūna ū Yesu ūbawīla, “A bing'we mulī bachilū chilū, nīyo nī myoyo ying'we midīzu no ū kwīzunya pyī īyo īhayiwe na bahangi.

²⁶ Yalī ītang'wigeleelilwe ū Kilisito kūluha ū mu mihayo yenīyī, hanuma kwingīla ū ng'wikūjo lyakwe?”

²⁷ Na lūūlū wandya kūbasomboolela pyī īyo yandīkilwe kūlwakwe, kwandīja kūlī Musa, na a bahangi a bose.

²⁸ Aho balyegeela ī ligūngūli īlo bajaga, ū ng'wene wīta gītī alīhaya kūbītīīla.

²⁹ Nabo būndayīīla būng'wīla, “Bebe ni olaala henaha; nguno nī likanza lyajaga, wila ū būjikū!” Wingīla ng'hana wikala nabo.

³⁰ Aho lyashika ī likanza lya kūlya wigasha hamò nabo, ūsola ngatī, ūlūmba, hūna ūgūmeganya ūbinha.

³¹ A henaho a miso gabo gūkundūlīlwa būndeeba; alīyo haho na haho ū wei ūjimīīla balolile.

³² Bandya kwiwīla gīkī, “Jalī jitūbīlīlaga īng'holò jise ū mu nzīla, aho walūlūngalūngaga nise, akūtoolekejaga ī mihayo ya mu shandīkwa?”

³³ Ī likanza lyenīlo būbūūka bashokile kūja Yelusalemu, būūkabasanga abo ikūmi na ūmò bibilingaga na a babo baalī hamò nabo,

³⁴ balīhaya gīkī, “Gashi ng'hana ū Seeba wajūūkaga; wang'wilongelaga nū Simoni.”

³⁵ Hūna būbasomboolela ī ya mu nzīla, nū mumo bakandeebela aho wagūmeganya ū ngatī!

Kwiyoolecha kwa Ng'wa Yesu Kū Bahemba

³⁶ Aho bataalī būbasomboolela gīko, bahayimanīla wīmīīla ha gatī yabo ūbagīsha, “Mulī mhola!”

³⁷ Bakibakīla no, hama bogoha; nguno bakiganika babona līng'hangi.

³⁸ Ūbawīla, “Nibūlī mulogoha gīko na kwiganīlīja ū mung'holò jing'we?

³⁹ Nalī nene ng'wenekīlī, galolagi a makono gane nī mhambala jane; munikuumye na kunikuumya mubone, nguno ū moyo gūtī na nofu na maguha, gīt'ūmo mulīnibonela ū nene gīkī nalī nasho ī shenīsho.”

⁴⁰ Aho wamala ū kūhaya ī yenīyo, ūboolekeja a makono gakwe nī mhambala jakwe.

⁴¹ Hūna aho bataalī ū kūzunya chiza, alīyo bokalaga būyegi na kūkumya kūtaale; ūbabūja, “Mulī na shilīwa shose shose a henaha?”

⁴² Būng'winha ibudīka lya ndīlo ya booche.

⁴³ Ūyanukūla wīlya balolile.

⁴⁴ Hūna ūbawīla gīkī, “Ī yenīyī h'ī mihayo yane īyo nikalaga nūmuwīla aho naalī nataalī hamò ning'we, gīkī shiigelile īshikīlījiwe pyī īyo yandīkilwe kūlwa nguno yane, mu shitabo sha ng'wa Musa na mu bahangi, na mu Zabuli.”

⁴⁵ Hūna ūgakundūlīla a masala gabo, būshiitegeleja ī shandīkwa.

⁴⁶ Ūbawīla, “H'ūmo yandīkīlilwe; gīkī ū Kilisito shiigelile aluhiwe, alīyo a ha lūshikū lo kadatū lwaho ajūūke kūfuma mu bafu.

⁴⁷ Hūna a banhū ba mahanga gose, kwandīja Yelusalemu, bakūlomeelwa mu lina lyakwe, mihayo ya kūgalūka na kūlekejiwa kwa shibi.

⁴⁸ A bing'we hū mulī bakaanīji bayo ī mihayo yenīyī.

⁴⁹ Nīyo nakūmutūmīla īsho wang'wisagīja ū Baba; gwike ikalagi dūhū ū mu nzengo, kūshisha mugumīīlwe būdūla bo kūfuma kwigūlya.”

Kūja ng'wigūlū kwa ng'wa Yesu

⁵⁰ Hanuma ūfuma nabo hanze abatongeelile; bahayūshika Betania ūbūūcha a makono gakwe kūbinha lubango.

⁵¹ Aho alībinha lubango gīko, kwimanīla walekana nabo, ūbūūchiwa ng'wilunde.

⁵² Bahayūmala kūnamya būshoka Yelusalemu bokalaga būyegi hataale.

⁵³ Bakayudīla mu hekalu gwa gwa gwa bakūnkumīlījaga Mulungu.