Luka 23 - Bibilia Ilagano Lya Kale 2015

Yesu kwibanza lya ng'wa Pilato

¹ Hūna lyūbūūka pyī ī libita kūntwala ū Yesu kūlī Pilato,

² būūkandya kūmūūla balīhaya gīkī, “Ū ng'wing'wana ng'wenūyū twamonile akūlīhūbyaga ī lihanga lise; hangī nīyo akūbalemejaga a banhū nū kūtoba ī goodi ya ng'wa Kaisali, akwigīmbaga gīkī ū wei Kilisito, angū nang'hwe ntemi ī gīko!”

³ Hūna ū Pilato ūmūja gīkī, “Angū ū bebe hū ūlī ntemi wa Bayudaya?” Ūnshokeja ūng'wīla, “Bebe h'ūyo wahaya!”

⁴ Ū Pilato ūbawīla a bagabīji bataale nī libita lya banhū gīkī, “Ū nene natūbonaga būbi ū mulī munhū ng'wenūyū!”

⁵ Alīyo bongeja kūhaya gīkī, “Akūjaga ūlanga mihayo ya kūyuuga masala ga banhū hose pye ū mu Būyudaya; nīyo wandīgije Galilaya. Ī haha ūūyū washikaga nū kūūnū!”

Yesu kū būtongi bo ng'wa Helode

⁶ Ū Pilato aho wigwa gīko ūbūja, amane ūlū gīkī ū munhū ng'wenūyo walī muna Galilaya.

⁷ Aho wamana gīkī walī afumile kū būsugi bo ng'wa Helode, ūntūma ū kūlī Helode, ūyo nang'hwe akasangwa alī mu Yelusalemu ī shikū jenījo.

⁸ Ū Helode akayega no ū kūmona ū Yesu, nguno walī na shikū ningī akūlwigwaga ū lūkumo lokwe; nose walī na ng'hūmbū ja kūmona alībeeja mihayo ya kūkumya.

⁹ Hūna wandya kūmūgīlīja mihayo mingī; alīyo ū Yesu atanshokegije nūūlū hado.

¹⁰ Bīmīīla a bagabīji bataale na a balangi ba shilagīlo būteegana kūmūūla.

¹¹ Ū Helode nanhgwe na a bashilikale bakwe, būyūngīmba nyachilū ū Yesu. Būngumīīla līng'wenda ly'ikūjo, hūna ūnshosha kūlī Pilato.

¹² Kūfuma lūshikū lwenūlo ū Helode nū Pilato būnwana, nguno ī kwandya baalī na wanishi.

Yesu ūlamulwa nsango gwa kūbūlagwa

¹³ Hūna ū Pilato ūbitana a bagabīji bataale na a basugi, na a banhū pye a bose.

¹⁴ Ūbawīla gīkī, “Ng'wanenhelaga ū munhū ng'wenūyū, gīkī akūhūbyaga banhū; alīyo angū namūja ning'we ng'wabona, gīkī atī na būbi ū mu mihayo īyo mulīmūūla.

¹⁵ Nīyo pyī nū Helode atabonile būbi bose bose, nguno watūshokeja hangī bise; hū kūhaya īlī hape gīkī atīnīīta mhayo ūyo gwigeleelilwe nsango gwa kūbūlagwa.

¹⁶ Ali lūūlū nahene, lekī nang'hūgūle bo mbooko, nanekele aje!” [

¹⁷ Ū ng'wikanza lya shigukulu yalī īng'wigeleelile kūbataligūlīla munhū ūmò.]

¹⁸ Gwike pyī ī libita lya banhū lyūhoolanīja n'ilaka lya higūlya līlīhaya gīkī, “Ng'wīnjage ū ng'wenūyū, ūtūtaligūlīle Balaba.”

¹⁹ Ū Balaba ūyo wahayiagwa walī watungwa kūlwa kwenheleja nsambo nebe mu nzengo, na kūlwa būbūlagi.

²⁰ Nang'hwe ū Pilato ūbawīla hangī a banhū, gīkī walī na ng'hūmbū ja kūntaligūlīla ū Yesu.

²¹ Alīyo būhoolanīja balīhaya, “Nkomage ha nsalaba, nkomage ha nsalaba ū ng'wenūyo!”

²² Ūbawīla hangī lūkangala lo kadatū gīkī, “Ī gete wītile būbi kī ū munhū ng'wenūyū? Ū nene natūgūbonaga ū mhayo ūyo gūshikile kūng'wenheleja kūcha; na lūūlū leki nang'hūgūle bo kūntūla nanekele!”

²³ Alīyo bongeja kūhamuka n'ilaka lya higūlya, gīkī akong'we ha nsalaba; nose a malaka gabo gūtinda.

²⁴ Ng'hana ū Pilato ūlamula gīkī gwītwe ūyo bagūlombaga.

²⁵ Ūbataligūlīla ū munhū ūyo bakang'wigongela, ūyo olī otungwa kūlwa nsambo na būbūlagi; ūmfunya ū Yesu gīt'ūmo boolī ū ūtogwa wabo.

Yesu kūkong'wa ha nsalaba

²⁶ Aho balīntwala bakamanhya na munhū ūmò, Simoni muna Kilene, wizaga mu nzengo kūfuma kū ngūnda, būnseseja ū nsalaba, hūna ūja alīshimīza a ha numa ya ng'wa Yesu.

²⁷ N'ibita itaale lya banhū lyankūūbījaga; baalīmo na bakīma bajaga balīlīla ng'hūngū, bakūnīlaga!

²⁸ Alīyo ū Yesu akīīta ūbagalūkīla ūbawīla gīkī, “Bing'we bashīke ba Yelusalemu mutanilīlage ū nene, ilīlagi bing'we benekīlī na baana bing'we.

²⁹ Nguno jikūshika shikū bakūyūhaya gīkī, ‘Balī na lubango a bagūmba, nī nda ījo jitabūūkije baana, pyī nī mbeele ījo jitong'hilwe.’

³⁰ Hanuma bakūyūjiwīla ngūlū gīkī, ‘Tūpondejagi;’ na a matūmbī gīkī, ‘Tūkundīkījagi!’

³¹ Nguno ūlū balīgima kūgwītīla mihayo īlī gīkī ū ntī aho gūtaalī ndoto, alīyo ūlū gūlinda gūūma, īkūbiza ginehe lūūlū ahene!”

³² Na basambo babīlī bakatwalwa kūjūbūlagwa hamò nang'hwe.

³³ Aho bashika h'ipandī līkitanagwa lūpaanga, būnkoma ha nsalaba hamò na a basambo benabo; būlī ng'wene ha nsalaba gokwe, ūmò kū būlyo, ūngī kū lūmoso!

³⁴ Hūna ū Yesu ūhaya gīkī, “Baba balekejage, nguno batūgūmanaga ūyo balīgwīta.” Ī likanza lyenīlo bandya kūshigabanha ī shizwalo shakwe bo kūshesela mbale.

³⁵ A banhū bīmīīla kwiloleela, alīyo a basugi bandya kūyūneeneleja mu būdalahi balīhaya, “Tūhaya ū ng'wenūyū walikalaga ūpīja bangī shi, ni ipījage lūūlū nū wei ng'wenekīlī ūlū ng'hana Kilisito, nsolwa wa ng'wa Mulungu!”

³⁶ A bashilikale nabo būng'wegeela bandya kūngīmba nyachilū, būng'winha siki;

³⁷ kūnū balīhaya gīkī, “Al'ipījage ūlū ūlī ntemi wa Bayudaya!”

³⁸ A higūlya yakwe a ha nsalaba boolīho wandīke būhayile gīkī, “Ūyū ntemi o Bayudaya.”

³⁹ Kūhayimanīla, ūmò wa babo baalī bakong'wa ha nsalaba hamò nang'hwe, wang'wīla ū Yesu gīkī, “Tūhaya ūlī Kilisito ahene ū bebe? Ali k'ipījage shi lūūlū, na a bise ūtūpīje!”

⁴⁰ Ū ng'wiye ūng'hama; ūng'wīla gīkī, “Ū bebe ūtūng'ogohaga na Mulungu shi? Angū ūlībona gīkī na a bise tūlī mu nsango hū gūmò dūhū!

⁴¹ Nīyo hangī a bise tūlanukūla mu ng'hana gīt'ūmo shītīle shise shalī; lelo ū munhū ng'wenūyū atīītile nūūlū mhayo gūmò gwa būbi!”

⁴² Hūna ūhaya, “Yesu ūlanizūkwe nane ū mu būtemi wako ūlū washoka!”

⁴³ Nang'hwe ū Yesu ūng'wīla, “Zunyaga nalīkūwīla gwa ng'hana gīkī, ī lelo īyī ūkūbiza hamò nane mu paladiso.”

Kūcha kwa ng'wa Yesu

⁴⁴ Aho yashika gītī sa itandatū shūbiza ho giiti, shīkundīkīja pyī ī sī, kūshisha sa kenda.

⁴⁵ Ī līīmi lyoya ū kwaaka, nī lisenge lya mu hekalu lyūtandūka ha gatī na ha gatī lyūlekana.

⁴⁶ Ū Yesu ūlīla n'ilaka itaale ūhaya, “Baba nagūtūūla mu makono gako ū moyo gwane!” Aho wamala kūhaya gīko ūzumalīka!

⁴⁷ Ū ntaale wa bashilikale igana aho wabona ūmo īkajīla, ūnkumīlīja Mulungu alīhaya gīkī, “Bing'we ū munhū ng'wenūyū ng'hana walī ntūngīlīja!”

⁴⁸ Pye abo baalī biza kwiloleela aho balīshoka būlī ng'wene waja alitūla tūla ha shikuba kūlwa būpīna.

⁴⁹ Alīyo pye abo baalī baamanile, na a bakīma abo baalī banondeela kūfuma Galilaya, bayiloleelaga ī mihayo yenīyī bīmīīlaga ka kūle ho hado.

Kūjīkwa kwa ng'wa Yesu

⁵⁰ Walīho ūmò wa banamhala b'ibanza; munhū ntūngīlīja, hangī wawiza. Witanagwa Yosefu,

⁵¹ muna Alimataya; nzengo gūmò gwaho gwa mu mizengo ya Būyudaya. Ū wei walī atizunīlīgije nalyo ī libanza ū mu būlamuji walyo; nīyo nang'hwe walī abūlindīīlile ū būtemi bo ng'wa Mulungu.

⁵² Ū munhū ng'wenūyo ūja ū kūlī Pilato ūūkagūlomba ū mīlī gwa ng'wa Yesu.

⁵³ Aho wagwicha ūgūlingīīla ng'wenda gwawiza ūgūlaaja mu shigila shipya shalī shisīmbilwe ng'wiwe gīt'ihalo. Gwalī gūtaalī kūlaajiwa mo mīlī nūūlū gūmò.

⁵⁴ Ū lūshikū lwenūlo lwalī lwa kūlonja lonja kūlwa sabato; nīyo nayo yūsangwa yegeela kūshika.

⁵⁵ A bakīma abo baalī biza nang'hwe kūfuma Galilaya bakakūūbīja, būūkashibona ī shigila, nū mumo gūkalaagījiwa ū mīlī gokwe.

⁵⁶ Hūna būshoka kūjūlonja lonja būgota bo ng'waso nsoga na maguta. Alīyo a ha sabato bifuula, gīt'ūmo shilagīlo shihayīlile.