Luka 22 - Bibilia Ilagano Lya Kale 2015

Long'we ya kūmūlaga Yesu

¹ Hūna lūūlū shegeela kūshika shigukulu sha migatī ītī na shibimbya, īsho shikitanagwa pasaka.

² A bagabīji bataale na a balangi ba shilagīlo būsangwa bakūkoobaga nzīla ya kūnyagaja ū Yesu; gwike baalī babogoha a banhū.

³ Ū Shetani ūng'wingīla Yuda, ūyo witanagwa Isikaliote; walī ūmò wa babo ikūmi na babīlī.

⁴ Hūna ū munhū ng'wenūyo ūja kū bagabīji bataale na balang'hani ba hekalu, ūūkalomana nabo ūmo alaboolekegeje ū Yesu bandime.

⁵ Bakayega no, bizunīlīja kūng'winha hela.

⁶ Nang'hwe wizunīlīja nabo mīlī ngima; wandya na kūkooba ng'wanya gwa kūboolekeja, balandime aho ibita lya banhū lītīho.

Kūlonja lonjiwa kwa pasaka

⁷ Hūna lūshika lūshikū ūlo lwalī lwa migatī ītī na shibimbya; ūlo shiigelile īsīnzwe ī ng'holo ya pasaka.

⁸ Ū Yesu ūbatūma ba Petelo na Yohana; ūhaya, “Jagi mukīlonja lonje ī pasaka tūlaalye.”

⁹ Būmūja gīkī, “Ūtogilwe tūje halī ūko tūkīlonja longeje?”

¹⁰ Ūbawīla, “Jagi ū mu nzengo, ūlū mulashike mo mukūmona ngosha aseselile lūnno lwa minzī; nondeelagi mukingīle ning'we ū mu numba īyo alakingīle.

¹¹ Ūlū ng'ūshika ng'wīlagi ū ng'wenekīlī kaya gīkī, ‘Ū Nangi alībūja: Shilī halī ī chumba sha bageni ūmo nakūlīīla pasaka hamò na bahemba bane?’

¹² Akūng'oolekeja chumba shitaale shilī kū golofa shigolanije ng'hana ng'hana, lonja lonjagi ng'wenūmo.”

¹³ Aho baja būsanga gīt'ūmo akabawīlīla, ng'hana bīlonja lonja ī pasaka.

Kūtūūlwa sangīla

¹⁴ Lyahayūshika ī likanza, wigasha kūlya shilīwa hamò nabo a batūng'wa bakwe.

¹⁵ Ūbawīla gīkī, “Naalī na ng'hūmbū ningī no ja kwīlya hamò ning'we ī pasaka yenīyī, kūko nataalī kūluhiwa.

¹⁶ Nguno nalīmuwīla gīkī natīlya hangī, kūshisha aho īkūshikīlījiwa mu būtemi bo ng'wa Mulungu.”

¹⁷ Hūna ūsola shikombe; aho wamala kūlūmba, ūbinha alīhaya gīkī, “Anukūlagi mugabanhe,

¹⁸ nguno nalīmuwīla kūfuma haha, natūng'wa hangī matwajo ga nzabibu kūshisha būshike ū būtemi bo ng'wa Mulungu.”

¹⁹ Ūsola na ngatī, aho wamala kūlūmba ūgūmeganya; ūbinha kūnū alībawīla gīkī, “Ū gwenūyū mīlī gwane, ūyo gūlīfunyiwa kūlwa nguno ying'we, mulīītage gīkī kūlwa kūnizūkwa.”

²⁰ Aho bamala ū kūlya, nī shikombe wīta gīko; ūbawīla gīkī, “Ī shikombe īshi shilī ilagane ipya mu mininga gane, ayo galidīka kūlwa nguno ying'we.

²¹ Gwike managi gīkī, ū nkono gwakwe ū nodeeji wane gūlī hamò nane a ha meza aha!

²² Ū Ng'wana wa Munhū ajile gīt'ūmo īhelelilwe, alīyo alī mu kwihīga kūtaale no ū munhū ūyo alīnodeela!”

²³ Bandya kwibūja boi benekīlī gīkī hīmba nani ū mubo ūyo wahayaga kūgwīta ū mhayo gwenūyo!

Yombo kūlwa būtaale

²⁴ Kūhayimanīla yajūūka yombo a ha gatī yabo; baliyoja gīkī hīmba nani ū mubo igeleelilwe kūbiza ntaale wabo.

²⁵ Nang'hwe ūbawīla, “A batemi ba mahanga h'abo bakabizaga bataale; na a basugi babo bakakumīlījiagwa gīkī bashilela mhīna.

²⁶ Alīyo ū kū bing'we ītī gīko, ū ntaale mu bing'we ni abizage gītī hū ndo, ū nsugi nang'hwe abize gītī ntoneeji.

²⁷ Angū ū ntaale ni alī; ūyo igashije akūlyaga shilīwa, nūūlū ūyo akūtagambaga na būtoneeji? Atī ūyo igashije? Īlī gīt'ūmo nalī ū nene ū mu bing'we; nalī gītī ntoneeji!

²⁸ Alīyo a bing'we h'abo mulī hamò nane ū ng'wikanza lya kūgeng'wa kwane pyī ī lyose.

²⁹ Na lūūlū nū nene namubīkīlile būtemi gīt'ūmo Baba anibīkīlile ū nene;

³⁰ gīkī mulabize ba kūyūlya na kūng'wa hamò nane a ha meza yane ū mu būtemi bone. Nīyo muligashe ha masumbī ga būtemi, mubize balamuji ba ng'anda ikūmi n'ibīlī ja Baisilaeli.”

Petelo akūnema Yesu

³¹ “Simoni bebe Simoni, managa gīkī ū Shetani alī na ng'hūmbū no no no ja kūmusūngūla gītī būsīga.

³² Alīyo naamalile kūkūlombela, gīkī ū kūzunya kwako kūtizūchabagīla. Ū bebe ūlū ūlanigalūkīle, ūkūbaguzuhya na a baana bang'wing'we!”

³³ Ū Petelo ūnshokeja gīkī, “Seeba angū nīyo ū nene nazunije nūūlū kūtungwa hamò nang'ho, pyī nūūlū kūcha nang'ho!”

³⁴ Nang'hwe ūhaya, “Petelo nalīkūwīla ī lelo īyī ītūhīla ng'hungulume aho ū bebe ūtaalī kūnilema ng'hangala idatū gīkī ūtanimanile.”

Ikanza lya kūsola shilanga

³⁵ Hūna ū Yesu ongeja kūbawīla gīkī, “Aho nakamutūma kūja mutī na mbogoshi, nūūlū mfuko, nūūlū shilatū, mukagehelwa shikolo?” Būhaya, “Tūtagehelilwe.”

³⁶ Hūna ūhaya, “Alīyo ī haha, ūyo alī na mbogoshi ni īsolage, nū yūyo alī na mfuko nang'hwe īīte chene; ūyo atī na lūshū ni ajinjage nūūlū shizwalo alūgūle.

³⁷ Nguno nalīmuwīla shiigelile gūshikīlījiwe ū mhayo ūyo gwandīkilwe kūlwane; gīkī, ‘Akabalanījiwa mu bagomi’. Na ng'hana īyo nahelelilwe shiigelile īshikīīle a ha būkalīkījo wayo!”

³⁸ Nabo būng'wīla, “Seeba tūlī najo shū ibīlī a henaha.” Nang'hwe ūbawīla, “Jigelaga lūūlū ī jenījo.”

Kūlomba mu lūgūlū lo mizeituni

³⁹ Aho wīnga a henaho, ūja kū lūgūlū lo mizeituni, gīt'ūmo wītīlaga na kale; na a bahemba bakwe būnondeela.

⁴⁰ Wahayūshika ū kwipandī lyenīlo ūbawīla gīkī, “Lombagi mutizingīla mu kūgeng'wa.”

⁴¹ Hūna ūbīngīla, ūja kabbaala ka bū kūle gītī bo kūluuta kawe. Ūūkatuja mazwi wandya kūlomba;

⁴² Ūhaya gīkī, “Baba ūlū ūlīzunya nīngījage ī shikombe shenīshi! Gwike ītī gīt'ūmo natogelilwe nene, alīyo īyo wītogilwe bebe hū yene īshikīlījiwe.” [

⁴³ Malaika ūng'wilongela kūfuma ng'wigūlū, wiza ūnguzuhya.

⁴⁴ Kūlwa kūsaatwa kūtaale, walombaga na būjangīīzu no no no, mu kwifunya kose; kūshisha lūyīlo lūyūtoona ha sī, gītī mamote ga mininga!]

⁴⁵ Wahayūbūūka aho walombelaga, ūja aho baalī a bahemba, ūbasanga balaalaga, nguno ya būpīna.

⁴⁶ Ūbawīla gīkī, “Nibūlī ng'walaalaga? Būūkagi mulombe, mutizingīla mu kūgeng'wa!”

Kūlodeelwa na kūding'wa kwa ng'wa Yesu

⁴⁷ Aho ataalī ūyomba, kūhayimanīla lyashika ibita alītongeelile ū Yuda, ūyo walī ūmò wa babo ikūmi na babīlī. Ūng'wegeela ū Yesu kūmbipa!

⁴⁸ Nang'hwe ū Yesu ūng'wīla, “Yuda ū Ng'wana wa Munhū ūlīnodeela bo kūmbipa?”

⁴⁹ Abo baalī nang'hwe ū Yesu aho babona yaja gīko; būhaya, “Seeba tūbamamaaje shū!”

⁵⁰ Na ng'hana ūmò wabo ūhubenga līlūshū, lyūbītīla gūtū go būlyo go ntūmami o ntaale wa bagabīji; gūtīnīka!

⁵¹ Nang'hwe ū Yesu ūshosha, “Lekagi ī gīko.” Ūgūkuumya ū gūtū, ūmpīja.

⁵² Hūna ū Yesu ūbawīla a bagabīji bataale na a balang'hani ba hekalu, pye na a banamhala abo baalī biza kūndima; ūhaya gīkī, “Ng'wiza na mapanga na milang'ha gītī kūdima nsambo!

⁵³ Īkī būlī lūshikū nalūdīlaga hamò ning'we mu hekalu, alīyo ng'walī mutūgemaga ū kūnidima. Gwike īlī līlī ikanza ling'we na lya būdūla bo giiti!”

Petelo kūnema Yesu

⁵⁴ Aho bandima būntwala kū ng'wa ntaale wa bagabīji; nū Petelo ūkūūbīja bo ka kūle.

⁵⁵ Bahayūshika būbacha moto ha gwalugwa bigasha; nang'hwe ū Petelo wiza hoi wigasha hamò nabo.

⁵⁶ Aho igashije gīko, ntūmami nkīma ūmona kūlwa būpe bo moto, ūnkalalīla; kūhayimanīla wahaya, “Nū yūyū walī hamò nang'hwe!”

⁵⁷ Ūlema no; kūnū alīhaya gīkī, “Bebe mayū, ū nene nataamanile ū munhū ng'wenūyo!”

⁵⁸ Aho kabīta kakanza kado ūngī ūmona; nang'hwe ūhaya, “Tūhaya nū bebe ūlī ūmò wabo ahene!” Nang'hwe ū Petelo ūhaya, “Bebe ngosha, natī ng'wene!”

⁵⁹ Lyahayūbīta hangī ikanza gītī lya sa īmò, ūngī hangī wandya kūhaya, nīyo alīfunya na būkaanīji gīkī, “Ī gete ng'hana nū ng'wenūyū walī hamò nang'hwe, angū nīyo nang'hwe muna Galilaya!”

⁶⁰ Ū Petelo ūhaya hangī gīkī, “Bebe baba, ū nene natūgūmanaga gete ūyo ūlīgūhaya!” Aho wakalīcha dūhū ū kūyomba gīko, haho na haho yūhīla ng'hungulume.

⁶¹ Nang'hwe ū Seeba wikībūka ūnola ū Petelo; ū Petelo ūgwizūkwa ū mhayo go ng'wa Seeba ūyo walī wang'wīla gīkī, “Ī lelo ūkūnilema ng'hangala idatū aho ng'hungulume ītaalī kūhīla!”

⁶² Gūnchima no, ūfuma hanze ūūkalīla mu kūsaatwa kūtaale!

Yesu ng'wibanza lya Bayudaya

⁶³ A banhū abo banang'hanaga ū Yesu bandya kūngīmba nyachilū na kūntūla, kūnū

⁶⁴ bankundīkījaga ū kū miso; hūna bang'wīla gīkī, “Alimanījaga nani wakūtūla!”

⁶⁵ Būyūmponangīja na mihayo yīngī mingī ya kūnsondagūla!

⁶⁶ Aho wela, a banamhala na a bagabīji bataale na a balangi ba shilagīlo bikobya, hūna wenhwa ū Yesu ng'wibanza lyabo.

⁶⁷ Bandya kūng'wīla, “Bebe tūwīlage ūlū ūlī Kilisito;” nang'hwe ūbawīla gīkī, “Al'īkī nahene nūūlū nakamuwīla mutīko ū kūzunya.

⁶⁸ Hama nūūlū nūmubūja mhayo nahene hangī mutūdūla nūūlū kūnishokeja.

⁶⁹ Gwike kūfuma haha ū Ng'wana wa Munhū akūbiza igashije kū nkono gwa būlyo gwa nguzu, gwa ng'wa Mulungu.”

⁷⁰ Pye a bose būhoolanīja kūhaya gīkī, “Ū bebe hū ūlī Ng'wana wa ng'wa Mulungu?” Nang'hwe ūbawīla, “A bing'we h'abo mulīhaya nalī ng'wene.”

⁷¹ Hūna būhaya gīkī, “Tūtaalī na nguno kī hangī na būkaanīji būngī? Angū twang'wigwa wahaya na nomo gwakwe wei ng'wenekīlī!”