Luka 21 - Bibilia Ilagano Lya Kale 2015

Inong'ho lya nkīma nchīlwa

¹ Aho wabūūcha miso, ūbabona a basabi balītūūla manong'ho gabo ng'wibīkīlo lya sabo.

² Ūmona na nkīma nchīlwa hangī ng'habī, watūūla mo nang'hwe hela jakwe ibīlī.

³ Hūna ū Seeba ūhaya, “Nalīmuwīla gwa ng'hana gīkī, ū nkīma ū nchīlwa na ng'habī ng'wenūyū, watūūla mo shingī kūtinda pye a bose.

⁴ Nguno pye a bangī balītūūla a manong'ho gabo kūfuma mu būshiigo bo sabo jabo, alīyo ū nkīma ng'wenūyū, nūūlū īkī alī na makoye, watūūla mo pyī īsho walī nasho, kūlwa kwigunanhīla mu būpanga bokwe.”

Kūkambagūlwa kwa hekalu

⁵ Hūna bamona bamò bandya kwīhaya ī hekalu, ūmo yalī īzengilwe na mawe masoga; na a manong'ho ayo gafunyiagwa moi. Nang'hwe ūhaya gīkī,

⁶ “A gose aya mulīgabona genaya, jikūshika shikū lītūsaaga iwe higūlya y'iwe lichalyo, īlo lītūholomolelwa ha sī!”

Wandījo bo makoye

⁷ Nabo būmūja gīkī, “Nangi ī mihayo yenīyī īkūbiza ho nanalī? Shikūbiza ho shimanīkījo kī ūlū yegeela kwilonga?”

⁸ Nang'hwe ūhaya, “Ilang'hanagi, yaya ū kūlemva lemva. Nguno bingī bakūyiza mu lina lyane balīhaya gīkī, ‘Ū nene hū nalī ng'wene;’ na gīkī, ‘Lyegeelaga ī likanza.’ Yaya ū kūbalondeela.

⁹ Nūūlū ng'wandya kwigwa ng'hūlū ja mabūlūgū na mawiyugagūji, yaya ū kogoha, nguno ī yenīyī shiigelile ītonge ū kūbiza ho, alīyo h'ītī gīkī ī ngelelo yashikaga na kūshika.”

¹⁰ Hangī ongeja kūbawīla gīkī, “Būkūbiza ho wiyūbūkīji ha gatī y'ihanga n'ihanga, na būtemi kū būtemi.

¹¹ Na jikūyūding'hima nyahīnga nhaale, na kwilonga mahūūya, na nzala ng'halī mu mapandī na mapandī. Īkūyilonga mihayo ya kogohya, na shimanīkījo shitaale kūfuma ng'wilunde.

¹² Alīyo aho ītaalī ū kwilonga pyī ī yose īyī, bakūyūmudima bamutwala kū masinagogi na mu jeela, kūjūmuluhya; mukūshishiwa na kū būtongi bo batemi na basugi kūlwa nguno ya lina lyane.

¹³ Gwike ī yenīyī īkūgalūka kūbiza ya būkaanīji ū kū bing'we.

¹⁴ Hūna lūūlū a bing'we timbyagi ng'holò, yaya ū kwandya kwiganika ganika ūmo mulayūshokeja.

¹⁵ Nguno nakūng'winha kahayīle na masala, ayo batūdūla kūgīmīla nūūlū kūgaheeba a bilwisha bing'we.

¹⁶ Hangī nīyo nūūlū babyaji bing'we bakūyūmulodeela, pye nūūlū baana bang'wing'we na a badūgū bing'we na a banwani biching'wi; na bamò bing'we bakūyūbūlagwa.

¹⁷ Nīyo pye a banhū bakūmukolwa kūlwa nguno ya lina lyane.

¹⁸ Alīyo lūtūjimīīla nūūlū ni lūywīlī lo kū ntwe gwing'we dūhū.

¹⁹ Ūlū ng'wiyūmīlīja, mukūbūpīja ū būpanga wing'we.”

Būluhi būtaale

²⁰ “Gwike ūlū ng'ūgūbona ū nzengo gwa Yelusalemu gwapīndiwa na mabita, managi gīkī lyegeelaga ī likanza lya kūkenaagūlwa kwago.

²¹ A henaho abo balī mu sī ya Būyudaya ni bapeelelage kū ngūlū; na a babo balī mu nzengo bafume mo, hangī abo balī kū chalo sha hanze batiziza kwingīla mo.

²² Nguno ī shikū jenījo jikūbiza ja kūmalīlwa shiilī, na kūshikīlījiwa kwa mihayo yose īyo yandīkilwe.

²³ Ū mu shikū jenījo bakūbiza mu makoye mataale no abo bakūsangwa balī nda, na a babo bakonhyaga. Nguno būkūbiza ho būluhi būtaale no ū mu sī, na būpelanīlwa ū kū banhū benaba.

²⁴ Bakūyūbūlagwa bo shū, na bakūding'wa nding'wa basalang'hanījiwe mu mahanga gose. Ū nzengo gwa Yelusalemu gūkūtobangwa na banhū ba mahanga gangī kūshisha gashikīīle a makanza ga banhū ba mahanga!”

Kwiza kwa Ng'wana wa Munhū

²⁵ “Hūna shikūbiza ho shimanīkījo ū kū līīmi nū kū ng'weji, nū kū sonda. Hanuma a mahanga ga mu sī gakwandya kūyibakīla bakīla, kūlwa kogoha ng'huutumo gwa mahuuli ga nyanza.

²⁶ A banhū bakūyūchenuka ng'holò kūshisha kūkaba kūlwa boba, nguno ya kwīlindīīla īyo īlabagwīle pye a bikaji ba mu sī. Nguno ū būdūla bo ng'wigūlū būkūtinginyiwa;

²⁷ hūna bakūmona ū Ng'wana wa Munhū alī ng'wilunde, aliza na būdūla n'ikūjo itaale.

²⁸ Ūlū ng'ūbona yandya kūja gīko, īmīīlagi hīgīyī, mubūūche ī mitwe ying'we, nguno numho ū būpīji wing'we wegeelaga.”

Ilangīlagi kū ntini

²⁹ Ūbawīla lūsumo gīkī, “Gūlolagi ū ntini, nī mitī ī yīngī pyī ī yose.

³⁰ Ūlū yandya kūfuluma mukamanaga gīkī gwegeelaga ū ng'waka.

³¹ H'ūmo īlī nī haha ū kū bing'we; ūlū ng'ūbona yandya kwilonga ī yenīyī, managi gīkī ū būtemi bo ng'wa Mulungu wegeelaga.

³² Nalīmuwīla gwa ng'hana gīkī, ī shibyalīlwe īshi shitūbīta kūshisha pyī ī yose yilonge.

³³ Ī ligūlū nī sī shikūbīta, alīyo ī mihayo yane ītīko kūjimīīla na hado yaya!”

Ilang'hanagi mutizilendeja

³⁴ “Hūna lūūlū ilang'hanagi mutizilendeja, īng'holò jing'we jitizūheewa na būponanja bo sabo, nūūlū būleevi na kūkoya koyela ya būpanga ūbū, nose ū lūshikū lwenūlo lūng'wisanganīje.

³⁵ Nguno pye a bikaji ba mu sī yose lūkūbisanganīja, gītī lūtu.

³⁶ Hū kūhaya ikalagi nzūgūlū matū, mubize ba kūlomba mu kwikūmbīlīja būlī ikanza, mulapūlūgūke; ītizūmugwīla ī yose īyo īlī hihī kwiza. Mubize na būdūla bo kwīmīīla ū kū būtongi bo Ng'wana wa Munhū.”

³⁷ Būlī lūshikū ī līīmi wadīlaga mu hekalu akūlangaga, alīyo ī būjikū wafumaga waja kūlaala kū lūgūlū ūlo lūkitanagwa lwa mizeituni.

³⁸ Ūlū wela ī dilū pye a banhū bang'wipunīīlaga, kwiza kūndegeleka ū mu hekalu.