Luka 19 - Bibilia Ilagano Lya Kale 2015

Zakayo kūgwīlwa imote

¹ Hūna ū Yesu ūshikīīla mu Yeliko; wabītaga mo dūhū alīlūmbūlīla ajile.

² Walīho ngosha nsabi, ntaale wa batobisha ba goodi; ī lina lyakwe witanagwa Zakayo.

³ Ū munhū ng'wenūyo walī na ng'hūmbū ja kūmona ū Yesu ūmo alī, alīyo akalemeelwa nguno y'ibita lya banhū, nīyo hangī walī nguhī wa baguhī.

⁴ Hūna wimeema nhambo ajile kū būtongi, ūūkalinha mu nkūyū gīkī amone chiza ū Yesu, nguno gwalī haho nī nzīla īyo wabītīlaga.

⁵ Ū Yesu aho washika a h'ipandī lyenīlo, ūlangamīla koi ū kwigūlya ūnola; hūna ūng'wīla, “Bebe Zakayo, ikaga wangū, nguno ī lelo yenīyī nakūdīla ha ng'wako!”

⁶ Akika wangū no, ūng'wegeleja na būyegi.

⁷ Alīyo aho babona gīko, pye a bose bandya kūduguma balīhaya gīkī, “Bing'we mulībona, wingīla kwigasha mu kaya ya ng'wa munhū o shibi!”

⁸ Kūhayimanīla ū Zakayo wīmīīla, ūng'wīla ū Seeba gīkī, “Seeba ī nusu ya sabo yane nalībinha bahabī; hama nīyo nūūlū nanyeekeja munhū shikolo, nakūnshokeja ng'hangala ine!”

⁹ Nang'hwe ū Yesu ūng'wīla gīkī, “Ī lelo īyī būpīji wigelaga a ha kaya īyī, īkī nū ng'wenūyū nang'hwe ng'wana wa ng'wa Abulahamu.

¹⁰ Nguno ū Ng'wana wa Munhū wizile kūkooba na kūpīja īsho shijimīīlile.”

Lūsumo lwa basese na migabo ya hela

¹¹ Aho bataalī būdegeleka ī mihayo yenīyo, ū Yesu ongeja kūbawīla lūsumo. Nguno akasangwa wegeela kūshikīīla ī Yelusalemu; hama nīyo a boi biganikaga gīkī ū būtemi bo ng'wa Mulungu hū būkwilonga ī likanza lyenīlo.

¹² Hūna lūūlū ūbawīla gīkī, “Olīho munhū nebe o lūganda lo nyatemi, akahaya kwīnga kūja kū sī ya kūle, gīkī akatemiwe; hanuma alashoke hangī.

¹³ Ū munhū ng'wenūyo akitana basese bakwe ikūmi ūbagabanhya migabo ikūmi ya hela, ūbakomeleja alībawīla gīkī, ‘Jitūndanyagi jiibyale; nakwiza.’

¹⁴ Alīyo a banhū ba mu sī yakwe baalī batantogilwe, hūna lūūlū būtūma nhūng'wa kūnkūūbīja koi; būhaya gīkī, ‘A bise tūtatogilwe abize ntemi wise ū ng'wenūyū!’

¹⁵ Alīyo ū munhū ng'wenūyo aho owanukūla ū būtemi ūshoka; ūshikīla kūlagīla bitanwe a basese abo walī wabalekela hela, amane būlī ng'wene wapandīkile ginehe ū mu kūjitūndanya.

¹⁶ Ūshika wa kwandya ūhaya, ‘Baba ū ngabo gwa hela jako gwabyalile migabo ikūmi.’

¹⁷ Nang'hwe ūng'wīla, ‘Būgatū ū bebe ūlī nsese wawiza, īkī wabizile ng'wishigwa mu shikolo shido, wabizaga ntaale wa mizengo ikūmi.’

¹⁸ Wiza na wa kabīlī, nang'hwe ūhaya, ‘Baba ū ngabo gwa hela jako gwabyalile migabo itanò.’

¹⁹ Nū ng'wene ūng'wīla gīkī, ‘Nang'ho wabizaga ntaale wa mizengo ītanò.’

²⁰ Na ūngī wiza; lelo ū ng'wene ūshikīla kūhaya gīkī, ‘Baba gūyū ū ngabo gwa hela jako, naalī najibunga ng'widaso nūjibīka.

²¹ Ū nene nakogohile no, nguno nakūdeebile gīkī ūlī ng'wiboneeji, ūkasolaga nī shisho ūtashitūūlile bebe, hangī ūkagesaga nū kūko ūtabībile!’

²² Ū ng'wenūyo ūnshokeja ūng'wīla gīkī, ‘Ū bebe ūlī nsese wabūbi, na lūūlū nakūkwinha nsango, nguno nīyo wikaanīla bebe ng'wenekīlī na nomo gwako. Gashinaga walī ūmanile gīkī nalī ng'wiboneeji wa kūsola nī shisho natashitūūlile nene, na gīkī nakagesaga nū kūko natabībile!

²³ Hama nibūlī lūūlū nahene ī hela jane ūtajitwalile nūūlū kū basūlūja, gīkī ūlū nūshoka nasange jibyalanile?’

²⁴ Haho na haho ūbawīla abo baalī bīmīīla hihī henaho gīkī, ‘Ntaajagi ī hela jenījo mung'winhe ūyo alī na migabo ikūmi ya hela.’

²⁵ Nabo būng'wīla, ‘Baba hama īkī ū ng'wenūyo alī na migabo ikūmi!’

²⁶ ‘Nalīmuwīla būlī ng'wene ūyo alī na shikolo akwinhwa, alīyo ūyo atī nasho akūtaajiwa nī shigehu īsho alī nasho.

²⁷ A banishi bane abo batatogilwe nabize ntemi wabo, a bene begelejagi ha būtongi bone aha mubabūlage.’”

Kwingīla mu Yelusalemu nyatemi

²⁸ Aho wamala ū kūhaya ī yenīyo būbūūka bajile Yelusalemu, ū wei walī kū būtongi.

²⁹ Bahayegeela Betifage na Betania, kū lūgūlū ūlo lūkitanagwa lo mizeituni, ūtūma babīlī ba bahemba bakwe.

³⁰ Ūbawīla gīkī, “Jagi ū mu chalo īsho shilī kū būtongi shenīsho; ūlū mulingīle mo mukūbona nzobe mūūga ītungilwe, ītaalī kūdamhīlwa na munhū nūūlū ūmò, ītaligūlīlagi muyenhe.

³¹ Ose ose ūlū ūmubūja gīkī, ‘Nibūlī mulīyītaligūlīla?’ Hayagi gīkī, ‘Nguno alī na nīmo nayo ū Seeba.’”

³² Aho baja abo bakatūng'wa, būūkasanga ng'hana gīt'ūmo akabawīlīla.

³³ Bahayandya ū kwītaligūlīla, a benekīlī nzobe būbabūja, “Nibūlī mulīyītaligūlīla ī nzobe?”

³⁴ Nabo būshosha, “Nguno alī na nīmo nayo ū Seeba.”

³⁵ Hūna bīyenha ū kūlī Yesu ī nzobe yenīyo, aho bīshisha bītūūlīla myenda yabo a ha ngongo, būndamhīja ū Yesu.

³⁶ Aho ajile būyūja bakwambaga myenda yabo ū mu nzīla.

³⁷ Wahayegeela kū ntulumenho gwa lūgūlū lo mizeituni, pyī ī libita lya bahemba bandya kūnkūja na kūngongoola Mulungu n'ilaka lya higūlya kūlwa būdūla būtaale mu mihayo yose īyo baalī bībona.

³⁸ Būyūhaya gīkī, “Akumīlījiwe ū Ntemi, Ūyo aliza mu lina lya ng'wa Seeba; Mhola ū ng'wigūlū, n'ikūjo higūlya no!”

³⁹ Bamò ba Bafalisayo abo baalīmo ū ng'wibita būng'wīla, “Bebe Nangi, bahamage a bahemba bako!”

⁴⁰ Nang'hwe ūshosha ūhaya, “Nalīmuwīla gīkī a benaba nūūlū bakahuumūla, gakūyoganya mawe.”

⁴¹ Aho wegeela hihī wahayūgūbona ū nzengo, ūūgūlīlīīla

⁴² alīhaya gīkī, “Gīt'ūlū ni wabiza wīmanile nang'ho ī mihayo ya mhola ī lelo! Al'ī gīsī, ībisilwe ū kū miso gako!

⁴³ Nguno jikūshika shikū ja banishi bako kūkūgobanīja hose hose, bakūzengeele ndūgū ya kūkūpīndīlīja, bayūkūdumīla kūfuma mhandī jose.

⁴⁴ Bakūkūtaalīka ha sī ū bebe ng'wenekīlī, pye na a baana bako abo ūlī nabo; batūkūlekela iwe nūūlū līmò higūlya y'iwe lichalyo, nguno ūtalīmanile ī likanza lya kūsangwa kwako!”

Kwejiwa kwa hekalu

⁴⁵ Aho wingīla ū mu hekalu ūbapeeja abo bīītīlaga mo byashala būfuma.

⁴⁶ Ūbawīla, “Yandīkilwe gīkī, ‘ī numba yane īkūbiza numba y'ilomba; alīyo a bing'we mukūyītaga kūbiza ipilinga lya basambo!’”

⁴⁷ Ūyūdīla mu hekalu būlī lūshikū akūlangaga; alīyo a bagabīji bataale na a balangi ba shilagīlo, hamò na a basugi ba banhū bakoobaga kūmūlaga.

⁴⁸ Gwike baalī bagayiwa ū gwa kūng'wītīla, nguno pye a banhū bikalaga hamò nang'hwe bakūndegelekaga.