Luka 13 - Bibilia Ilagano Lya Kale 2015

Ūlū mutagalūkile mukūyagala

¹ Ī likanza lyenīlo, bamò abo baalī henaho būng'wīla mihayo ya bana Galilaya balebe, abo Pilato walī wababūlaga ng'wikanza lya kūfunya shitambo shabo!

² Nang'hwe ū Yesu ūbashokeja alīhaya, “Muliganika gīkī a bana Galilaya abo īkabilongela ī yenīyo, baalī na shibi kūtinda pye a bana Galilaya a bangī?

³ Nalīmuwīla ītī gīko na hado yaya, alīyo ūlū mutagalūkile, na a bing'we pyī mukūyagala gīko!

⁴ Nūūlū hamo muliganika gīkī a banhū abo ikūmi na banaane abo bakagwīlwa numba mu Siloamu būūcha, baalī bakenaagūji no kūtinda pye a bikaji ba Yelusalemu?

⁵ Nalīmuwīla ītī gīko na hado yaya, alīyo ūlū mutagalūkile na a bing'we pyī mukūyagala gīko!”

Lūsumo lwa ntini gūtatwajaga

⁶ Hūna ūbinha lūsumo ūhaya gīkī, “Munhū nebe walī wahamba ntini mu ngūnda gokwe, alīyo būlī ikanza ūlū wiza ho kūlola matwajo walī atapandīkaga!

⁷ Nose ūng'wīla ū nīmi, ‘Ūlībona gīkī yashikaga myaka idatū ī haha nakūmanaga niza a ha ntini gwenūyū kūlola matwajo, alīyo ndūhū nūūlū kūpandīka; ī gete gūbbutage wa, nibūlī gwikale gūnikenaagūja ilaale lyane sagala dūhū!’

⁸ Nang'hwe ū nīmi ūng'wīla, ‘Baba gūlekage nahene ū ng'waka gwenūyū dūhū nagūgeme kūgūbeeja beegeja, nagūtūūlīle na maboleela boleela.

⁹ Ūlū gūtwaja īkūbeelela, alīyo ūlū ītī chene, nahene ūkūgūbbuta!’”

Kūpījiwa kwa nkīma nemehazu

¹⁰ Lūshikū lūngī yalī sabato, ū Yesu walangaga ng'wisinagogi līmò lyaho.

¹¹ Walīmo na nkīma walī wagung'humiwa moyo gwa būgokolo; walī atadūgije kūgūngūmūka kūshisha ikanza lya myaka ikūmi n'īnaane!

¹² Ū Yesu aho wamona ūng'witana ūng'wīla gīkī, “Bebe mayū otaligūlagwa ū mu makoye gako.”

¹³ Ūntūūlīla makono, haho na haho ūgūngūmūka wandya kūnkumīlīja Mulungu.

¹⁴ Ū ntaale w'isinagogi akapelana no aho wabona gīkī ū Yesu wampīja munhū ha sabato, ūbawīla a banhū gīkī, “Bing'we jilīho shikū itandatū ī ja kūtūmama milīmo, mulizage ng'wapījiwa ū mu jenījo, yaya a ha lūshikū lo sabato!”

¹⁵ Nang'hwe ū Yesu ūnshokeja gīkī, “Bing'we bibeeleja, ī gīsī a ha sabato būlī ng'wene ū mu bing'we atataligūlīlaga ng'ombe nūūlū nzobe yakwe waja kwīng'wisha?

¹⁶ Al'ū munhū ūyū oluhiwa na Shetani ikanza lya myaka ikūmi n'īnaane ī yose īyo, nīyo hangī nshīke o ng'wa Abulahamu gete, nibūlī atigeleelilwe ū ng'wene ū kwifuujiwa a ha sabato?”

¹⁷ Aho wīhaya ī yenīyo pye abo bang'wītīlaga wilu bakagooka kībi no! Pyī ī libita lya banhū bīkumīlīja ī yawiza īyo akabeeja.

Shigemeng'hejo shibīlī sha būtemi

¹⁸ Hūna ūhaya gīkī, “Ū būtemi bo ng'wa Mulungu būbizile gītī kī? Hīmba ūlū kūwikolanīja na kī?

¹⁹ Ū boi būlī gītī kabīyū ka haladali, ako munhū akakasola ūūkakahamba mu ngūnda gokwe. Kahayūzwa kūkūla gūbiza ntī ntaale, kūshisha nose na noni ja kūlala jūpandīka wikalo ū mu matambī gago.”

²⁰ Hanuma hangī ūhaya, “Nawikolanīje na kī ū būtemi bo ng'wa Mulungu?

²¹ Wiyikolile na shibimbya, īsho nkīma akasola ūgulanya mu ngele idatū ja būsu, shūbūdudumya pyī ū bose.”

Kwingīlīla ha mita mpine

²² Ū Yesu aho alīja Yelusalemu, waja akūlangaga ū mu mizengo nū mu magūngūli.

²³ Kūhayimanīla munhū nebe omūja gīkī, “Seeba angū mmho ī gete abo bakūpījiwa balī bagehu no?” Nang'hwe ūbawīla gīkī,

²⁴ “Igaganījagi ū kūbītīla a ha mita ū mpine, nguno balī bingī abo bakūgema ū kwingīla alīyo bakūlemeelwa!

²⁵ Managi gīkī, ū ng'wenekīlī kaya ūlū ūlinda wīmīīla kūgūlugala ū nyango, ning'we ng'ūsangwa mutaalī hanze, mukūhoodisha no, kūnū mukūhayaga; ‘Seeba tūlugūlīlage nise!’ Alīyo ū wei akūmushokeja amuwīle gīkī, ‘A bing'we natūmumanaga, pyī nū kūko mulīfuma!’

²⁶ Ning'we mukūhaya, ‘Angū twalyaga na kūng'wa hamò nang'ho; hama nīyo ū bebe walomeelaga nū mu mapanda gise!’

²⁷ Akūmushokeja amuwīle gīkī, ‘Bing'we bīīti ba mihayo yabūbi, nalīmuwīla natūmanaga ūko mulīfuma, nīngīlagi a henaha!’

²⁸ Kūkūbiza ho kūlīla, na kūshelanya mino; ūlū ng'ūbabona ū mu būtemi bo ng'wa Mulungu a ba Abulahamu na Isaka na Yakobo; hamò na a bahangi a bose, alīyo a bing'we ng'waponyiagwa hanze!

²⁹ Banhū bakūfuma kīya na ng'weli, bangī sukuma na dakama bize bigashe kūlya shilīwa ū mu būtemi bo ng'wa Mulungu.

³⁰ Gwike balīho aha abo balī kū numa, alīyo bakūbiza kū būtongi, na a babo balī kū būtongi, abo bakūbiza ba kū numa!”

Kūgūlīlīīla nzengo gwa Yelusalemu

³¹ Ī likanza lyenīlo biza Bafalisayo kūng'wīla gīkī, “Ni wīnga a henaha, nguno ū Helode alīkooba kūkūbūlaga!”

³² Nang'hwe ūbawīla, “Jagi mukīwīle ī nyamhawa yenīyo gīkī, ‘ī lelo nī ntondo nalīmalīja kūpeeja masamva na kūpīja banhū, ū lo kadatū lwaho nakūbiza namala maja.’

³³ Gwike īnigeleelilwe nabize mu lūgendo ī lelo nī ntondo, nī ntondo būngī; nguno ītadūlīkanile ū ng'hangi achīle hanze ya Yelusalemu!

³⁴ Ee, Yelusalemu, Yelusalemu mūlagibo bahangi; bebe ūyo ūkabapondaga mawe abo ūkatūmīlagwa. Nashishaga ng'hangala jinga nakūgemaga kūbakuminga kuminga a baana bako, gīt'ūmo ngoko īkakumingīlaga zwiyū jayo, yajibandīla mu manana gayo; alīyo mutatogilwe!

³⁵ Managi gīkī ng'walekelagwa ī numba ying'we. Nguno nalīmuwīla mutūnibona hangī kūshisha aho mukūhaya gīkī, ‘Alī na lubango ūyo aliza mu lina lya ng'wa Seeba!’”