Kūshokeela 8 - Bibilia Ilagano Lya Kale 2015

Būgaliili bo ng'wa SEEBA mu lūgendo

¹ Ilang'hanagi gete mushishikīlīje pyī ī shilagīlo īsho nalīmulagīla ī lelo yenīyī. Nguno hū mukwikala mulī bapanga, nīyo hū mukūkwīla ng'wiyongeje; hangī mukūja mukīdime nī sī īyo SEEBA wabisagīja bakūlūgenji bing'we mu kūbilahīlīla.

² Izūkagwa aho walī ng'witogolo, ū mu shikū ījo SEEBA Mulungu wako walūkūtongeelaga ū mu nzīla pyī ī myaka makūmi anè yose īyī, kūlwa kūkūlanga widoohya, na kūkūgema ashibone īsho shilīmo ū mu ng'holò yako; ūlū gīkī ūdūgije kūshidima ī shilagīlo shakwe nūūlū yaya.

³ Akakwītīla mihayo mingī ya kūkūlanga kwidoohya, ūkūdīīja nzala, hanuma ya henaho ūkūlisha eemanu; shilīwa īsho walī ūtashimanile ū bebe pye na a bakūlūgenji bako. Nguno walī atogilwe kūkūlanga gīkī, ū munhū atūbiza mpanga kūlwa nguno ya shilīīwa gwike, alīyo kūlwa būlī mhayo ūyo gūkūfuma mu nomo go ng'wa SEEBA.

⁴ Ū mu myaka yose makūmi anè yenīyo ūtakoyiwe būzuuka, nūūlū kūbimba magūlū.

⁵ Shikwigelile ūdeebe ū mu ng'holò yako gīkī, ūmo munhū akang'hūgūlīlaga ng'wana wakwe, nū SEEBA Mulungu wako akūkūhūgūlaga gīko.

⁶ Na lūūlū shidimage gete ī shilagīlo sha ng'wa SEEBA Mulungu wako, ūshimīzīle mu nzīla jakwe na mu kūng'ogoha wei.

⁷ Nguno ū SEEBA Mulungu wako alīkūtwala kū sī yawiza, sī ya myongo na malambo ga minzī; na nzwīlo ja kwikala jikūpumunhīkaga minzī mu malago na mu ngūlū.

⁸ Alīkūtwala kū sī ya ngano na būsīga wingī, hamò na mizabibu na mitiini na mikomamanga, na mizeituni na būūkī;

⁹ sī ītī ya kūgeehelwa shilīwa, nūūlū kūgeehelwa na shikolo shingī shose shose yaya, sī ya mawe galī na chūūma, nū mu ngūlū jayo ūdūgije kūfukūūla mo chūūma sha feza.

¹⁰ Na lūūlū ūlū ūlya wigūta ūkūnkumīlīja ū SEEBA Mulungu wako, kūlwa nguno ya kūkwinha sī yawiza.

Ilang'hanage ūtizūdoosa

¹¹ Ilang'hanage ūtizūng'wība ū SEEBA Mulungu wako, wībe ū kūshimīzīla ū mu kahelele kakwe, nī shilagīlo shakwe na a malange gakwe ayo nalīkwinha lelo īyī.

¹² Nguno ūkūlya wigūta, ūzenga na numba jawiza wikala mo,

¹³ na a madaale gako ga ng'ombe, na a ga ng'holo na mbūli gūūkūla; ūkūkwīja na zahabu būyaga nī feza, nī shikolo ī shingī īsho ūlī nasho shūkūkwīlīla.

¹⁴ A henaho ī ng'holò yako īshikile kūdoosa, ūng'wība ū SEEBA Mulungu wako ūyo wakwīnja kūfuma mu sī ya Misili, ī sī ya būsese.

¹⁵ Hū ng'wene ūyo akakūbītya ng'witogolo igalī na lyakogohya, mu sī ng'halamuku ya notà ng'halī; ūmo jilīmo na nzoka ja būsūngū wabūbi, hamò na ng'homi; ū mu shikū jenījo akakwinha minzī kūfuma mu shiganga shidiimu!

¹⁶ Hū ng'wene ūyo akakwinha eemanu ya kūlya aho ūl'ū ng'witogolo lyenīlo, shilīwa īsho bakūlūgenji bako baalī batashimanile na hado yaya. Wakwinhaga gīkī akūlange kwidoohya, na gīkī akūgeme; kūlwa gīkī ū kū shikū ja kū būtongi ī mihayo yako īkūbeelele.

¹⁷ Nīyo ūshikile nūūlū kwiwīla, “Būdūla wane waninhile ū būsabi wenūbū, naasabiwe nguzu ja nkono gwane.”

¹⁸ Alīyo ng'wizūkagwe ū SEEBA Mulungu wako, nguno hū ng'wene akūkwinhaga ū būdūla ū wa kūpandīka ī sabo; kūlwa kūlīshikīlīja ilagane īlo walī wabeeja na bakūlūgenji bako mu kwilahīla, gīt'ūmo īlī ī mihayo nī lelo īyī.

¹⁹ Ūlū ūhūbīla ūng'wība ū SEEBA Mulungu wako, wandya kūlondeela bamulungu bangī na kūbatūmamīla, na kūbinamīla; ī lelo yenīyī nalīmumanya hape, gīkī mukūyagaala gete.

²⁰ Ūmo SEEBA akagakenaagūlīla mahanga ayo akagayagaja gūūng'wīngīla a bing'we, na a bing'we mukūyagaala ūlū ng'ūleka kūng'wigwa ū SEEBA Mulungu wing'we.