Kūshokeela 6 - Bibilia Ilagano Lya Kale 2015

Wiza wa kūdima shilagīlo

¹ Aka hū kene a kahelele ka ng'wa SEEBA Mulungu wing'we, hamò na a malange nī shilagīlo, īsho akaniwīla kūmulanga, gīkī mushidime aho mulī ū mu sī īyo mulīkīla mongo gwa Yolodani kūja kwīdima ībize ying'we.

² Mubize na logohano ū kūlī SEEBA Mulungu wing'we; a bing'we benekīlī na a bana bing'we, hamò na a baana babo a hanuma yabo. Pyī ī shikū ja būpanga wing'we mushimīzīle ū mu kahelele na a malange gakwe; nī shilagīlo īsho nalīng'winha, ī shikū ja būlamu wing'we jongejiwe.

³ Na lūūlū igwaga Isilaeli, nīyo wīlang'hane pyī ī yenīyī wīshikīlīje, ī mihayo yako īje chiza; mudūle kwibyalana ū mu sī ya būhondo yenīyo, mukwīle gīt'ūmo SEEBA Mulungu wa bakūlūgenji bako wakwisagīja.

Shilagīlo na būtogwa

⁴ Igwaga Israeli, “Ū SEEBA Mulungu wise alī SEEBA ūmo wike,

⁵ na lūūlū ntogagwe ū SEEBA Mulungu wako na ng'holò yako yose, na būpanga wako bose, na nguzu jako jose.

⁶ Ī shilagīlo shenīshi īsho nalīkūlagīla lelo īyī, shitūūlage mu ng'holò yako.

⁷ Īkwigelelilwe ūbalange a baana bako mu welwa ng'holò; ūlū ng'wigashaga mu kaya ng'ūshihooyela, nūūlū mukūyeelaga mu nzīla, nūūlū ūlaalile; nūūlū ng'wikanza lya kūbūūka.

⁸ Shitungage a ha nkono na a ha būshū wako shibize būmanīkījo.

⁹ Na a ha nyango gwako ūkūshandīka; pye na a ha mita gwako.

¹⁰ Ū SEEBA Mulungu wako ūlū alakūshishe ū mu sī īyo walī wabisagīja bakūlūgenji bako, ba Abulahamu, Isaka na Yakobo gīkī akūkwinha, ī sī ya mizengo mitaale na yawiza īyo ūtīzengile bebe,

¹¹ na numba jokalile shikolo shawiza īsho ūtashitūūlile mo bebe, na nzwinzī ja minzī ījo ūtajisīmbile bebe, na migūnda ya mizabibu na ya mizeituni nayo ūtīlīmile bebe; ūkūlya kūshisha wigūte.

¹² Gwike ilang'hanage ūtizūng'wība ū SEEBA ūyo wakwenhile kūfuma Misili, ūkwīnja mu sī ya būsese.

¹³ Ūkūbiza na logohano ū kūlī SEEBA Mulungu wako, ūntūmamīle we wike; hangī hū ng'wene ūyo ūkwilahīla mu lina lyakwe.

¹⁴ Mutizūgima kūlondeela bamulungu bangī, bamulungu ba mahanga ga banhū abo bamupīndije.

¹⁵ Nguno ū SEEBA Mulungu wako ūyo alī hamò nang'ho ng'wene Mulungu wa wilu, na lūūlū ū būpelanu wakwe būkūkwikīīla, akūyagaje ūshile ho gete ū mu sī.

¹⁶ Yaya ū kūngema ū SEEBA Mulungu wing'we gīt'ūmo mukangemela ipandī lya Masa.

¹⁷ Dimagi na welwa ng'holò a kahelele ka ng'wa SEEBA Mulungu wing'we nū būkaanīji wakwe, pye na a malange gakwe ayo wakwinhile.

¹⁸ Beejaga ya būtūngīlīja na yawiza ū kū būtongi bo ng'wa SEEBA, ī mihayo yako īkūbeelele, hū ūkūdūla ū kwīsola ī sī yawiza yenīyo, īyo SEEBA akabisagīja mu kūbilahīlīla bakūlūgenji bako;

¹⁹ gīkī pye a banishi bako akūbapeeja bakwīngīle gīt'ūmo SEEBA ahayīlile.”

Kūbalangīīla baana

²⁰ Ūlū ūkūbūūja ng'witūnja wako ū kū shikū ja kū būtongi, “A kahelele ako SEEBA Mulungu wise wamulagīla, nū būkaanīji wakwe pyī nī shilagīlo, shilī na makūlū kī?”

²¹ Ng'wīlage, “Twalī basese ba ng'wa Falao mu sī ya Misili, alīyo ū SEEBA ūtūfunya ū mu Misili na nkono gwa būdūla.

²² Nīyo ū SEEBA akoolecha būlolelo na mihayo ya kūkumya no, hangī mitaale na ya kūkamaaja; yūbagwīla a bana Misili, nū Falao hamò nī kaya yakwe ī yose, tūlolile na miso gise gīkī.

²³ Alīyo a bise ūtūfunya mo, ūtwenha kūūnū kwiza kūtwinha sī īyo walī wabisagīja ūbilahīlīla bakūlūgenji bise.

²⁴ H'ī nguno yene ū SEEBA ūtūlagīla kūgadima pye a malange genaya, na kūng'ogoha ū SEEBA Mulungu wise, gīkī ītūbeelele ī mihayo, hama ū wei atūlang'hane twikale tūlī bapanga gīt'ūmo tūlī nī lelo īyī.

²⁵ Hūna lūūlū ūlū twilang'hana, tūshidima ī shilagīlo shenīshi pye ū kū būtongi bo ng'wa SEEBA Mulungu wise gīt'ūmo watūlagīīlīla, ū mhayo gwenūyo gūkūbiza gwa būtūngīlīja ū kū bise.”