Kūshokeela 33 - Bibilia Ilagano Lya Kale 2015

Mbango ja ng'wa Musa kū Baisilaeli

¹ Ū Musa ū munhū o ng'wa Mulungu aho ataalī kūcha walī wabafuuha īji a Baisilaeli;

² ūhaya, “Ū SEEBA akiza kūfuma kū lūgūlū lwa Sinai, ūbilongela kūfuma Seili; waaka kūfuma kū lūgūlū lwa Palani. Akiza na beela bingī no, mashihūmbī na mashihūmbī; ūfuma dakama kū ngūlū jakwe.

³ Na ng'hana ū bebe ūbatogilwe a banhū bako; a beela a bose pye balī mu nkono gwako. A bose bakūtuja mazwi kū magūlū gako, banukūle būganikīlwa kūfuma kūlī bebe;

⁴ Ī shilagīlo īsho Musa watwinha, ū wingīji wa kwibilinga kwa ng'wa Yakobo.

⁵ Ū wei walī ntemi wa Yeshuluni mu shikū ja kwibilinga kwa batongeeji ba banhū hamò nī ng'anda ja Isilaeli.

⁶ Ū Lubeni ni ahangamage, atizūyagaala; na a banhū bakwe ni batizagūūgeeha.

⁷ Ū Yuda ūnombela alīhaya gīkī, ‘SEEBA degelekaga ū kūlīla kwa ng'wa Yuda, ūng'wenhe kū banhū bakwe. Wei ng'wenekīlī akwilwīlīīlaga na makono gakwe, ngunanhage alī na wilwisha na banishi!’”

⁸ Ū Lawī ūng'haya mu mihayo īyī; gīkī, “Ī Tumimu yako nī Ulimu yako leka shiikale mu nkono go ng'wa munhū ūyo ūntogilwe, ūyo ūkangema ng'witogolo lya Masa, ūkoya nang'hwe ū kū minzī ga Meliba.

⁹ A ba ise nū nina akabahaya gīkī, ‘Ū nene natūbalonja a benabo.’ Nūūlū a baana ba ng'wawe atabadīlīlile, pyī nūūlū a baana bakwe atabasaatilwe. A miso gakwe gaalī galolelile ha mhayo gwako, walī alīlang'hanile ī lilagane lyako.

¹⁰ Akūnangaga ū Yakobo a katongeelele kako, alichene, nī shilagīlo ū Isilaeli. Akūja nago ū nīmo gwa kūzuukīja ngazu kū būtongi wako; na shitambò sha kūpemva shūshilīla ha ng'walīlo gwako.

¹¹ Ee SEEBA, ng'wīlūkīlage mu yose īyo akwītaga, nī milīmo ya makono gakwe ūyanukūle. Batūlage ūbabīnze mikīmbīlī abo bakūng'ūbūkīlaga; a banishi bakwe batūlage batizūbūūka hangī gete.”

¹² Ū Benjamini ūng'haya mu mihayo īyī; gīkī, “Ū nganja o ng'wa SEEBA n'alembeelage mu mhola yakwe; hū ng'wene akikalaga ankīngītīīlile na kūnang'hana līīmi ji, nū wikalo bokwe būlī ha mabega gakwe.”

¹³ Ū Yosefu ūng'haya mu mihayo īyī; gīkī, “Ū SEEBA ni ayīīlūkīlage ī sī yakwe, ayenhele wiza bo lūme lwa malunde ga kwigūlya, na wiza bo minzī ayo galī ga hasī, mu gatī ya sī;

¹⁴ nī yose ī yawiza īyo īkenhagwa kwaka kwa līīmi, nī ya kūyeja īyo īkilongaga mu myeji milebe.

¹⁵ Nī sha mpango ntaale īsho shilī mu ngūlū ja kale; na a matwajo ga mu matūmbī ga kale na kale.

¹⁶ Na a manong'ho gawiza ayo sī īkafunyaga nū wingī wago, nī shigongo shakwe ūyo walī ng'wisaka lyabakaga moto. Ī yose yenīyī īng'wikīīle ha ntwe gwakwe ū Yosefu, ha londooji lwakwe ūyo alī ntemi ha gatī ya bang'wawe.

¹⁷ Alī na shingilima gītī nzagamba mhyeeni; Ī mhembe jakwe jilī gītī ja shadiima nyang'widīīma. Hū jene akūjitūmamīla kūpama mahanga gose, kūshisha na a yayo galī kūle kū ngelelo ya sī. H'ūmo galī a makūmi ga shihūmbī ga ng'wa Efulaimu, alichene, h'ūmo galī a mashihūmbī ga ng'wa Manase.”

¹⁸ Ū Zabuloni ūng'haya mu mihayo īyī; gīkī, “Zabuloni kūyegelage ū kūja kwako kwa hanze, nū bebe Isakaali yegelaga mu maheema gako.

¹⁹ Bakwitana banhū ba mahanga bize kū lūgūlū, bize kūyegele shitambò sha būtūngīlīja; nguno bakūlya shitolyo sha mu nyanza, na bakwigūta shizeeze īsho shibisile mu maseni.”

²⁰ Ū Gadi ūng'haya mu mihayo īyī; gīkī, “Alī na ūyo akūngalīhījaga Gadi wikalo, ī lipandī īlo Gadi akwikalaga gītī shimba ng'hīma. H'ūko akasaasagūlīlaga nkono, pyī nūūlū londooji lwa ha mitwe.

²¹ Ī lipandī lyawiza ūko gwalī gūbīkilwe ngabo gwa ntaale wisolelile kūbiza lyakwe we. Aho bibilinga a batongeeji ba banhū, ū wei wīta mu būtūngīlīja ūbo abūhayile SEEBA, ūmo kalī kalamulīle kakwe kūlwa Baisilaeli.”

²² Ū Dani ūng'haya mu mihayo īyī; gīkī, “Ū Dani ng'wene ng'wana wa shimba, ūyo akwizwanukaga kūfuma Bashani.”

²³ Ū Nafutali ūng'haya mu mihayo īyī; gīkī, “Nafutali ū bebe ng'wene ūfulile wiza bo ng'wa SEEBA, ū bebe ookalile ja kūfuma kūlī we; ūkwīdima ī dakama kūjīlīīla kū nyanza, būbize wingīji wako.”

²⁴ Ū Asheli ūng'haya mu mihayo īyī; gīkī, “Ū mu bitūnja bose ū Asheli afuuhilwe, ni bankūjage pye a baana ba ng'wawe; leka adabbye lūpambala lwakwe mu maguta.

²⁵ A malugalīlo ga ha mibita yako gabize madimu, ga chūūma na shaba; ī nguzu jako jibize gīt'ūmo jilī shikū ja būlamu wako.

²⁶ Atīho ūngī wa kūlenganīla na Mulungu o ng'wa Yeshulumu, ūyo akikaga igashije ha malunde kwiza kūkūgunanha; alichene, higūlya ya malunde ng'wikūjo lyakwe.

²⁷ Ū Mulungu wa welelo alī ipeelelo lyako; a ha sīlīlī yako galīho makono ga welelo bose gakūlang'hanile. Akūkūpeegeja pye a banishi bako; hū ng'wene akūkūwīla, ‘Bakenaagūlage.’

²⁸ Na lūūlū ū Isilaeli akwikala mu mhola we wike; nguno ū wikalo o ng'wa Yakobo būlang'hanilwe mu sī ya shilīwa shingī na divai, ūko malunde gakitaga lūme.

²⁹ Ūlī na lubango Isilaeli! Nani ūngī wa kūlenganījiwa nang'ho, ū wa kūbiza gītī ihanga īlo lyapījiwa na SEEBA? Hū ng'wene alī lūmūda lwako na ngunanhi wako, nīyo hū ng'wene alī līlūshu lyako ly'ikūjo. A banishi bako bakūdetema ū kū būtongi wako, na a mapandī gabo ga higūlya ūkūgapandagīla.”