Kūshokeela 27 - Bibilia Ilagano Lya Kale 2015

Ng'walīlo ha lūgūlū lwa Ebaali

¹ Ū Musa hamò na a banamhala ba Baisilaeli būbalagīla a banhū balībawīla, “Shidimagi pyī ī shilagīlo shenīshi īsho nalīng'winha lelo.

² Ūlū mulagūkīle ū mongo gwa Yolodani ng'wingīle ū mu sī īyo SEEBA Mulungu wing'we alīng'winha, mukūtūūla mawe mataale mugateleleje gatelele.

³ H'ūmo īlī, ūlū ūlagūkīle ū mongo ūshike ū mu sī īyo SEEBA Mulungu wako alīkwinha, ī ya būhondo, gīt'ūmo SEEBA Mulungu wa bakūlūgenji bako walī wakwisagīja, ūkūyandīka ī mihayo ya shilagīlo shenīshi a ha mawe genayo.

⁴ Ūlū ng'ūgūkīla ū mongo gwa Yolodani gatūūlagi a mawe genaya ha lūgūlū lwa Ebaali, gīt'ūmo nalīmulagīīlīla ī lelo īyī; hama mugateleleje gatelele.

⁵ Ūkūbeeja ho na ng'walīlo gwa mawe kūlwa ng'wa SEEBA Mulungu wako. Yaya ū kūtūmamīla shizengelo sha chūūma ū mu kūgūbeeja.

⁶ Alīyo ū ng'walīlo go ng'wa SEEBA Mulungu wako gwenūyo, gūzengage na mawe ga kūfuma kū malaale, hūna ū SEEBA Mulungu wako ūmfunīje ho shitambò sha kūpemva.

⁷ Ūkūfunya ho na shakwinha sha būsangī, ūshilīīle henaho ūyege kū būtongi bo ng'wa SEEBA Mulungu wako.

⁸ Ī mihayo ya shilagīlo shenīshi ūkūyandīka hape hape chiza a ha mawe ayo ūlagatūūle genayo.”

⁹ Hūna ū Musa na a bagabīji, a ba lūganda lwa Lawī, būbawīla pye a Baisilaeli gīkī, “Bebe Isilaeli, lembeelaga nīyo ūdegeleke chiza. Ī haha wabizaga ihanga lya banhū ba ng'wa SEEBA Mulungu wako.

¹⁰ Na lūūlū bizaga ng'wigwi gete ū kūlī SEEBA Mulungu wako, shimīzīlaga ū mu katongeelele kakwe na a malange gakwe ayo nalīkwinha lelo.”

¹¹ Ū mu lūshikū lwenūlo ū Musa ūbakomeleja a banhū alīhaya;

¹² “Ūlū ng'ūgūkīla ū mongo gwa Yolodani, ī ng'anda īji jikwīmīīla kū lūgūlū lwa Gelizimu kūbalombela a banhū, Simioni, Lawī, Yuda Isakaali, Yosefu na Benjamini.

¹³ Ī ng'anda īji jene jikwīmīīla kū lūgūlū lwa Ebaali kūbawīla a banhū a mazumo ayo galīho, Lubeni, Gadi, Asheli, Zabuloni, Dani na Nafutali

¹⁴ A Balawī bakūbawīla pye a Basilaeli n'ilaka lya higūlya gīkī.

Mazumo ha lūgūlū lwa Ebaali

¹⁵ “Azumilwe ū munhū wa kūbeeja shiikolile sha kūlamiwa, sha mbika ya kūpūnza, nūūlū sha kūsula; shikolo īsho shilī sha malofu kūlī SEEBA, nīmo gwa makono ga banhū; hanuma ūshīmīlīja hipandī lyibisile.” A banhū a bose bakūhaya, “Alichene.”

¹⁶ “Azumilwe ū munhū wa kūndalaha ise na nina.” A banhū a bose shibigelile bahaye, “Alichene.”

¹⁷ “Azumilwe ū munhū ū wa kūsaamya iwe lya ha lūbīmbī lwa nzenganwa ng'wiye.” A banhū a bose bakūhaya, “Alichene.”

¹⁸ “Azumilwe ū munhū wa kūng'wīnja mboku mu nzīla, ūntongeela kūja sagala.” A banhū a bose bakūhaya, “Alichene.”

¹⁹ “Azumilwe ū munhū wa kwīliganya ī ng'hana ū mu kalamulīle, ūlū alīnamula ngeni nūūlū munhc wamala bakwe, nūūlū nchīlwa.” A banhū a bose bakūhaya, “Alichene.”

²⁰ “Azumilwe ū munhū wa kūlaala na nke o ng'wa ise, nguno alīīta mhayo gw'ibengwe kūlī ise.” A banhū a bose bakūhaya, “Alichene.”

²¹ “Azumilwe ū munhū wa kūlaala na shiinū yose yose.” A banhū a bose bakūhaya, “Alichene.”

²² “Azumilwe ū munhū wa kūlaala n'ilūmbūye, nshīke o ng'wa ise nūūlū o ng'wa nina.” A banhū a bose bakūhaya, “Alichene.”

²³ “Azumilwe ū munhū wa kūlaala na nina būkwi.” A banhū a bose bakūhaya, “Alichene.”

²⁴ “Azumilwe ū munhū wa kūmūlaga nzenganwa ng'wiye mu mbisīla.” A banhū a bose bakūhaya, “Alichene.”

²⁵ “Azumilwe ū munhū wa kūzunya kūhongwa amūlage munhū ūyo atī na būbi.” A banhū a bose bakūhaya, “Alichene.”

²⁶ “Azumilwe ū munhū ūyo atūyīdima ī mihayo ya mu shilagīlo īshi nūūlū kwīshikīlīja.” A banhū a bose bakūhaya, “Alichene.”