Kūshokeela 22 - Bibilia Ilagano Lya Kale 2015

Shilagīlo kūlwa kūgunanha banhū

¹ Ūlū ūbona ng'ombe nūūlū ng'holo ya ndūgūyo īlītagaalīja kūja sagala, yaya ū kwīlekanīja, īnyamage wīshoshe ū kūlī ng'weneyo.

² Ū ng'weneyo ūlū azengile kūle, nūūlū hamo ūtaamanile gete, īswagage wītwale kū ng'wako ūkīlang'hane kūshisha wize akwīkoobaga, ūng'winhe ī sabo yakwe.

³ Ītaga gīko nūūlū ūbona nzobe ya ng'wa munhū yajimīīlaga, nūūlū shizwalo shakwe, nūūlū shikolo shingī shose shose īsho ūjimīīja; yaya ū kūshilekanīja sagala dūhū.

⁴ Ūlū ūmona ndūgūyo alī na nzobe nūūlū ng'ombe yagwaga hihī na nzīla, yaya ū kūnekanīja, ngunanhage ū kwīgūngūmūla.

⁵ Ū nkīma atigeleelilwe kūzwala shizwalo sha bagoosha, nū ngosha yaya ū kūzwala shizwalo sha bakīma, nguno būlī ng'wene ūyo wīta mihayo īlī gīko, alī wa malofu ū kūlī SEEBA Mulungu wako.

⁶ Ūlū ūbona chanjo sha noni bbihī na nzīla, hamo īteelelile mu ntī nūūlū hasī, nī noni yenekīlī ībandīlile a ha ng'hune nūūlū a magī, yaya ū kwīsola ī noni yenīyo hamò nī ng'hune.

⁷ Ūlū ūsola ī ng'hune, nekage ū nina aje; ū mhayo gwenūyū gūkūkwenhela mbango, nīyo ūkūbiza na būlamu būlīhu.

⁸ Ūlū ūzenga numba mhya īlī na ha kwifuulīla ū kwigūlya, ītūūlīlage na ikīgījo ū kū mhelo mhelo, ūtiziyenheleja makoye ga kūchīlwa munhū, ūlū ūgwa kūfuma ū kwigūlya ya numba yako.

⁹ Ū mu ngūnda gwako gwa mizabibu yaya ū kūhamba mbīyū ja mbika ibīlī, ūlū wīta gīko a matina ayo ūlagahambe ū mu ngūnda na a matwajo gakūbiza gatī meela.

¹⁰ Ūtizūtunganīja ng'ombe na nzobe hijoki līmò, gīkī jidute igembe lya kūlīma.

¹¹ Nū bebe yaya kūzwala shizwalo shisumilwe na būlūba wa kitani īsangīlījiwe na booya wa ng'holo.

¹² Ū kū mhembeelo ya shizwalo shako ī sha kūzwala ūkūyūsumīīla masune.

Shilagīlo sha kūlang'hana batooleke

¹³ Ūlū munhū ūntoola ng'wanikī, hūna wa kūhayūlaala nang'hwe ūmbyeeda,

¹⁴ wandya kūja akūnsondagūlaga alīng'haya kībi, “Ū nkīma ūyū nantoolile a hene, alīyo aho naalaala nang'hwe, nūbona gīkī wamala kūlaala na bagosha bangī!”

¹⁵ Na lūūlū a henaho a ba ise nū nina wa ng'wanikī bakūja kū mita gwa nzengo bakafunye būkaanīji ū kū banamhala ba mu nzengo, booleche gīkī ū nshīke wabo walī ataalī kūlaala na ngosha ūngī ose ose.

¹⁶ Ū ise wa ng'wanikī akūbawīla a banamhala, “Ū nene nakanzunīlīja ū ngosha ng'wenūyū antoole ū nshīke wane, alīyo ī haha wambyeedile.

¹⁷ Wandije kūja akūnsondagūlaga, akūhayaga, ‘Ū nshīke wako naamonile gīkī gashi walī wamala kūlaala na bagosha bangī.’ Alīyo shiishi ī shimanīkījo sha koolecha gīkī ū nshīke wane walī ataalī kūlaala na bagosha.” A babyaji ba ng'wanikī bakoolecha ī shizwalo sha nshīke wabo ū kū banamhala ba mu nzengo.

¹⁸ Ī likanza lyenīlo a banamhala bakūng'wīnja ū ngosha ng'wenūyo a henaho, ūūkatūlwa mbooko.

¹⁹ Hanuma akūlyiwa ihyū lya shekeli igana ja feza, ūng'winha ū ise wa ng'wanikī kūlwa nguno wakenaagūlile lina lya nshīke wa mu Isilaeli. Hama akūnsola aje nang'hwe akongeje kūbiza nke wakwe. Atigeleelilwe kūmpeeja nūūlū kūneka ū mu būpanga wakwe bose.

²⁰ Gwike ū mhayo gwenūyo ūlū gūbiza gwa ng'hana, nū būkaanīji būgaya ū wa koolecha gīkī walī ataalī kūlaala na ngosha aho ataalī kūtoolwa nū munhū ng'wenūyo,

²¹ a henaho akūshoshiwa kaya, wiza ūtūūlwa ha nyango gwa ha ng'wawe, hūna a bagoosha ba mu nzengo būmponda mawe kūshisha ūcha; nguno wītile mhayo gwa minala mu Isilaeli, īkī wītile būmalahya alī mu kaya ya ng'wa ise. Shiigelile ūwīnje gete ū būbi ū mu bing'we.

²² Ūlū ngosha ūsanganījiwa alīshihya na nke wa ngosha ūngī, a bose būbīlī wabo bakūcha; ū ngosha ū nshihya nū nkīma ūyo walūshihyaga nang'hwe. Shiigelile ūwīnje gete ū būbi ū mu Isilaeli.

²³ Ūlū ng'wanikī alūnjiwe hūna ūmanhya na ngosha ūngī mu nzengo ūlaala nang'hwe,

²⁴ bose būbīlī wabo mukūbatwala kū mita gwa nzengo gwenūyo mukabaponde mawe mubabūlage. Ū ng'wanikī akūcha kūlwa nguno walī mu nzengo, alīyo atalīlile gīkī bize banhū kūngunanha, ū ngosha kūlwa nguno washihyaga na nke wa munhū ūngī. Shiigeli ūwīnje gete ū būbi ū mu bing'we.

²⁵ Alīyo ūlū ngosha alī kū malaale ūnsanga ng'wanikī alūnjiwe, hūna ūmpondya ūlaala nang'hwe, ū ngosha ūyo wagwītaga ū mhayo gwenūyo akūbūlagwa wei dūhū.

²⁶ Yaya ū kūng'wītīla mhayo gose gose ū ng'wanikī, nguno atītile mhayo gwigeleelilwe kūbūlagwa; ū mhayo gwenūyūū gūtikīlile nū gwa munhū wa kūng'ūbūkīla nzenganwa ng'wiye ūmūlaga.

²⁷ Nguno ū ngosha ng'wenūyo wansangīlaga kū malaale ū ng'wanikī ūyo alūnjiwe, walī atīho munhū wa kūngunanha.

²⁸ Hama ūlū ngosha ūmanhya na ng'wanikī atalūnjiwe, ūmpondya ūlaala nang'hwe, hūna būding'wa,

²⁹ ū ngosha ng'wenūyo akūnīpa ū ise wa ng'wanikī shekeli makūmi atano ja feza; na akūntoola ū ng'wanikī ng'wenūyo, nguno wankenaagūlaga. Atigeleelilwe kūmpeeja nūūlū kūneka ū mu būpanga wakwe bose.

³⁰ Ītang'wigeleelilwe munhū ose ose kūlaala na nke o ng'wa ise, atigeleelilwe gete kūnkunūja shizwalo ū nke o ng'wa ise.