Kūshokeela 17 - Bibilia Ilagano Lya Kale 2015

¹ Ūtizūfunya kūlī SEEBA Mulungu wako ng'ombe nūūlū ng'holo īyo īlī na būlemehazu nūūlū būsaatu gīkī shibize shitambò kūlī we; nguno ū mhayo gwenūyo gūlī gwa malofu no ū kūlī SEEBA Mulungu wako.

Nsango kūlwa kūkenaagūla ilagane

² Ūlū munhū ngosha, nūūlū nkīma ūyo akwikalaga hamò nang'ho mu nzengo gūmò gwa mizengo īyo SEEBA Mulungu wako alīkwinha, ūbonwa alīīta yabūbi kū būtongi bo ng'wa SEEBA Mulungu wako, alīlīkenaagūla ī lilagane lyakwe,

³ mu nzīla ya kūbatūmamīla bamulungu bangī na kūbalamya, nūūlū kūlamya līīmi na ng'weji nūūlū sonda ja ng'wigūlū, ūbiza alīīta īyo nalīmulemeja,

⁴ ū mhayo gwenūyo ūlū gūshishiwa mu matū gako, īkūkwigeleelwa ūgūgīsīlīje mu welwa ng'holò. Ūlū gūbiza gwa ng'hana hūna yūmanika gīkī mhayo gwa malofu gīko gwītilwe ū mu Isilaeli,

⁵ ū munhū ūyo wagwītile ū gwabūbi ng'wenūyo, abize ngosha nūūlū nkīma, ndimagi muntwale kū mita gwa ha nzengo gwing'we mukamponde mawe ache.

⁶ Ū munhū akūbūlagwa kūlwa būkaanīji bo banhū babīlī nūūlū badatū; atizigela wa kūbūlagwa kūlwa būkaanīji bo munhū ūmò dūhū.

⁷ A hikanza lya kūbūlagwa, a makono ga bakaanīji bakwe gabize ga kwandya ū kūmponda, hū na a banhū a bangī bamponde kūshisha ache. Īkwigeleelilwe ūwīnje gete ū būbi ū mu bing'we.

A bagabīji balī balamuji

⁸ Ūlū ūpandīka mihayo ya kwigeleelwa kūshika kwibanza, alīyo yūbiza milambu ū kūlī bebe, yūkūlemeela ū kwīgoloola; hamo mihayo gītī ya būbūlagi, yombo kūlwa wilemeelwa būlebe, nūūlū banhū kwitūla, ī yenīyo ūkwītwala ū kwipandī īlo SEEBA Mulungu wako alalīsole.

⁹ Ūkwīshisha kū būtongi wa bagabīji, a Balawī, ūūkīyoolecha kū būtongi wa namuji, ūyo alī ntaale ū mu shikū jenījo. Basomboolelage a benabo bakūkwinha ū būlamuji ūbo wigeleelilwe.

¹⁰ Na lūūlū īkūkwigeleelwa wīte gīt'ūmo balakūwīlīle ko ū kwipandī īlo SEEBA alalīsole. Wilang'hane gete, wīshikīlīje pyī īyo balakūwīle kwīyīta.

¹¹ Wīte kūlenganīla nī shilagīlo īsho bakūkūlanga, nū būlamuji ūbo bakūkwinha; hama yaya ū kwīdalaha īyo balakūtonge, ūtizūgema nūūlū hado kūbiza na mbyūla miso ya kūlola kūnū na kūnū.

¹² Nguno ose ose ūyo oolecha būdalahi kūlī ngabīji, nūūlū namuji ūyo īmīīlile a ha nīmo gwenūyo kū būtongi bo ng'wa SEEBA Mulungu wako, ū ng'wenūyo shing'wigeleelilwe kūbūlagwa; īkūkwigeleelwa ūwīnje gete ū būbi ū mu Isilaeli.

¹³ Ū mu gīko bakwigwa pye a banhū bogohe booye ū būdalahi.

Ūyo shiigelile abize ntemi wako

¹⁴ Ūlū līlashike ī likanza lya kwingīla ū mu sī īyo SEEBA Mulungu wako alīkwinha, hūna wīdima yūbiza yako wikala mo; hanuma ūhaya, “Ī gete nane natūūle ntemi, nabize gīt'ūmo galī a mahanga ayo ganipīndije.”

¹⁵ Na lūūlū ilang'hanage gete, nguno shikwigeleelilwe kūtūūla ntemi ūyo asolilwe na SEEBA Mulungu wako, shiigelile abize ūmò wa baana ba ng'wing'we. Yaya ū kūtūūla munhū wihanga līngī, ūyo atī Ng'wisilaeli ng'wiching'wi.

¹⁶ Nīyo ū ntemi ng'wenūyo atigeleelilwe kūsaba falasa ningī jakwe wei ng'wenekīlī; na wilang'hane atizūbatūma a banhū kūja Misili kūjūkooba falasa jingī; nguno Ū SEEBA wamuwīla, “Mutalizūgima kūshoka hangī ū kwenūko gete.”

¹⁷ Na hangī ū ntemi yaya kūpalīka bakīma bingī, nguno bakūngalūcha ī ng'holò yakwe; nū kūsaba no no no ī hela nī zahabu yaya.

¹⁸ Ūlū wigasha a hisumbī lya būtemi, īkūng'wigeleelwa kwandīka mu shitabo shakwe wei ng'wenekīlī ī mihayo ya shilagīlo īshi, andīke kūfuma ū mu shilagīlo īsho bakikalaga nasho bagabīji, a Balawī.

¹⁹ Ī shilagīlo shenīshi akūbiza wa kwikala nasho būl'ikanza, ayūshisoma būlī lūshikū, pyī ū mu būlamu wakwe; adūle kūng'ogoha ū SEEBA Mulungu wakwe, na kūbiza ng'welwa ng'holò ū kūshimīzīla mo ū mu shilagīlo ī shose īshi, hamò na a malange genaya.

²⁰ Atizigūngūhya wei ng'wenekīlī na kūshidalaha ī shilagīlo ū mu ng'holò yakwe, akandya kūtagaalīja akūlondeelaga mamihayo sagala; kūshisha nose pye a baana ba ng'wawe abadalahe; ibone gīkī ū wei nī kaya yakwe hū bene dūhū abo bigeleelilwe būtemi ū mu Isilaeli shikū ja būja na būja.