Kūshokeela 16 - Bibilia Ilagano Lya Kale 2015

Pasaka ya ng'wa SEEBA

¹ Gwizūkagwe ū ng'weji gwa Abibu, wīte shigukulu sha Sabato ya ng'wa SEEBA Mulungu wako ū mu ng'weji gwenūyo, nguno ū mu ng'weji gwa Abibu ū SEEBA Mulungu wako akakwīnja mu sī ya Misili; ūkūfunya mo makanza ga būjikū.

² Ūkūsola ntugo kūfuma ū ng'widaale lyako lya ng'ombe nūūlū lya ng'holo na mbūli, ūje nago kwipandī īlo SEEBA Mulungu wako alalīsole kūlwa wikalo wa lina lyakwe, ūkagūsīnze kwenūko.

³ Ī nyama yenīyo yaya ū kwīlya na ngatī gwa kūbeejiwa na būsu būsangije shibimbya. Ūkūshisha shikū mpungatī ūkūlyaga ngatī gūtī na shibimbya; ngatī gwa būluhi, nguno ūkīnga wangū wangū ū mu sī ya Misili. Ū mu shikū ja būlamu wako bose, ūkūlyizūkwa mu gīko ī likanza lya kwīnga kwako mu sī ya Misili.

⁴ Ū mu shikū mpungatī jenījo, pye a hose ū mu sī yako atizūbiho munhū nūūlū ūmò alī na būsu bose bose būsangije shibimbya. Nī nyama ya shitambò īyo ūkwīfunya ikanza lya mhīndī mu lūshikū lwa kwandya, ītizūsaaga kūshisha kū ntondo dilū.

⁵ Yaya ū kwīsīnza ī Pasaka ūlī ng'wipandī līngī, hose hose ū mu mizengo īyo SEEBA Mulungu wako alīkwinha.

⁶ Ūkwīsīnza ūlī h'ipandī īlo SEEBA Mulungu wako alalīsole kūlwa wikalo wa lina lyakwe. Ī Pasaka ūkwīsīnzīla henaho makanza ga mhīndī, līīmi līlījīlīīla kūlibīla; ī likanza īlo ūkīngīla mu sī ya Misili.

⁷ Ī Pasaka yenīyo ūkwīlya ya booche; ūkwīlya ūlī a h'ipandī īlo SEEBA Mulungu wako alalīsole; hūna ī dilū ūshoka kū maheema gako.

⁸ Shikū itandatū ūkūlya migatī ītī na shibimbya, hūna ū mu lūshikū lwa mpungatī ūbiza na kwibilinga kwela kūlī SEEBA Mulungu wako, hama yaya kwīta nīmo ū mu lūshikū lwenūlo.

Shigukulu sha mifungo

⁹ Ūkūbala mifungo mpungatī kūfuma ī likanza lya kwandya kūgesa shilīwa shako.

¹⁰ Hanuma ya henaho wīta shigukulu sha mifungo kūlī SEEBA Mulungu wako, ūmfunīja shakwinha sha būtogwa kūlenganīla nī ījo SEEBA Mulungu wako akūkwīlūkīlaga.

¹¹ Hūna ūkūnyegela ū SEEBA Mulungu wako, ūlī a h'ipandī īlo alalīsole kūlwa wikalo wa lina lyakwe; ū bebe ng'wenekīlī nū ng'witūnja wako nū nshīke wako, nū nsese wako ngosha na nkīma. Nū Nawī yaya ū kū ng'wība; ūyo alī mu mizengo yako, nū ngeni, nū mpīna, nū nchīlwa ūyo akwikalaga hamò nang'ho.

¹² Izūkagwa gīkī ū bebe walī nsese mu sī ya Misili; hūna lūūlū shidimage chiza ī shilagīlo shenīshi.

Shigukulu sha maduku

¹³ Ī shigukulu sha maduku ūkūshiyegela ikanza lya shikū mpungatī, ūlū lyūbīta ī likanza lya kūkuminga a magesa gako kwīnga ha lūbūūga, nū kwīnja ī divai yako kūfuma ū mu makamīlo gako ga mizabibu.

¹⁴ Ī likanza lya shigukulu shako līlī lya kūyega ū bebe ng'wenekīlī, nū ng'witūnja wako nū nshīke wako, nū nsese wako ngosha na nkīma; pyī nū Nawī, nū ngeni, nū mpīna, nū nchīlwa ūyo akwikalaga mu mizengo yako.

¹⁵ Ikanza lya shikū mpungatī ūkūyega kū būtongi bo ng'wa SEEBA Mulungu wako, ūlī a h'ipandī īlo alalīsole wei. Nguno ū SEEBA Mulungu wako akūkwīlūkīla mu shose īsho ūkūshigesa, nū mu milīmo yako īyo ūkwīta.

¹⁶ Pye a bagosha abo balīmo ū ng'wihanga lyako bakūyūshika kū būtongi bo ng'wa SEEBA Mulungu wako ng'hangala idatū ū mu ng'waka, ū kwipandī īlo alalīsole. Bakwiza ko ng'wikanza lya shigukulu sha migatī ītī na shibimbya, ikanza lya shigukulu sha mifungo, na ng'wikanza lya shigukulu sha maduku. Atizilonga wa kwiza kū būtongi bo ng'wa SEEBA alī makono dalali.

¹⁷ Būlī ūmò wing'we shing'wigelile kwenha shakwinha kūlenganīla nū mumo alakwīlūkīle ū SEEBA Mulungu wako.

Balamuji na batongeeji

¹⁸ Ūkūsola banhū kūfuma ū mu ng'anda jako ī jose ūbatūūle kūbiza balamuji na batongeeji, ū mu mizengo yose īyo alīkwinha SEEBA Mulungu wako; bayūbalamula a banhū mu būtūngīlīja.

¹⁹ Yaya gete ū kwīhūbya ī ng'hana, nūūlū koolecha būsolanhya wa mbika yose yose. Hama ūtizūzunya kūhongwa, nguno ū būhongi būkabbokujaga miso ga bitegeleja, na būkachaamyaga nī mihayo ya batūngīlīja.

²⁰ Ūlū mhayo gūtūngīlīgije, bebe shimīzīlaga mo dūhū ū mu būtūngīlīja, ūdūle kūlama na kwīdima ī sī īyo SEEBA Mulungu wako alīkwinha.

²¹ Ūtizūgima kūsīmbīla ng'hīngī ya līntī kūlwa ng'wa Ashela, wīyiheja ha ng'walīlo ūyo ūlīgūbeeja kūlwa nguno ya ng'wa SEEBA Mulungu wako.

²² Yaya nūūlū kwīmīlīja ng'hīngī y'iwe ya nīmo gwa kwitongelegeja, nguno ī shenīsho shilī sha malofu ū kūlī SEEBA Mulungu wako.